كەلەسى جىلى ۇ ب ت-عا بالاما جاڭالىق ەنگىزىلەدى
استانا. KAZINFORM - عىلىم جانە جوعارى ءبىلىم مينيسترلىگى كەلەسى جىلى ۇلتتىق ءبىرىڭعاي تەستىلەۋدە ەنگىزىلەتىن جاڭاشىلدىقتى اتادى.
- بيىل ەشقانداي وزگەرىس بولمايدى. ءبارى بۇعان دەيىن جاريالانعان كەستە بويىنشا وتەدى. ەكى سىناق تەستىلەۋ وتكىزىلدى. ەندى ءبىرىنشى نەگىزگى ۇلتتىق ءبىرىڭعاي تەستىلەۋ باستالادى، - دەدى مينيستر اقوردادا ب ا ق وكىلدەرىنىڭ ساۋالىنا وراي.
ونىڭ ايتۋىنشا، كەلەسى جىلدان باستاپ بالاما رەتىندە ىلكى رەجيمدە جاڭا AIT (Admission Insight Test) تەستىلەۋى قوسىلادى. ونى ETS تەحنولوگياسى سالاسىندا الەمدىك كوشباسشى كومپانيالاردىڭ ءبىرى ازىرلەيدى.
- ETS دەلەگاتسياسى ءبىزدىڭ فيليالدارمەن العاشقى كەزدەسۋ وتكىزۋ ءۇشىن كەشە استاناعا كەلدى. سىناما تەستىلەۋ كەلەسى جىلى دا ساقتالادى. نەگىزىنەن ونى جويىپ، تەك ءبىر عانا ۇ ب ت قالادى دەگەن الاڭداۋشىلىق بولعان ەدى. سول سەبەپتى سىناما فورماتى دا ساقتالادى، بۇل ماڭىزدى. سەبەبى مۇنداي تەستىلەۋ ءالسىز جاعىڭدى انىقتاۋعا مۇمكىندىك بەرەتىن دياگنوستيكا قۇرالى رەتىندە ءوزىن جاقسى قىرىنان كورسەتتى. وسىلايشا، كەلەسى جىلى جاڭا تەست تۇرىندەگى بالاما پايدا بولادى. دەمەك، نەگىزگى ۇ ب ت-نى جىلىنا ءبىر رەت قانا تاپسىرۋعا بولادى. ءبىراق سىناما تەستىدەن ءوتۋ مۇمكىندىگىنە قالدىرامىز، - دەدى ساياسات نۇربەك.
بۇعان دەيىن ۇكىمەت پەداگوگيكالىق جوعارى وقۋ ورىندارىنا قابىلداۋ ءتارتىبىن وزگەرتىپ، ۇ ب ت جۇيەسىن جاڭعىرتۋدى جانە تالاپكەرلەردى ىرىكتەۋدىڭ جاڭا تاسىلدەرىن ەنگىزۋدى جوسپارلاپ وتىرعانىن جازعان ەدىك.
