كەلەسى جىلى 3,9 ميلليون قازاقستاندىق دەكلاراتسيا تاپسىرۋعا مىندەتتەلەدى
2024-جىلعى 1- قاڭتاردان باستاپ زاڭدى تۇلعالاردىڭ باسشىلارى مەن قۇرىلتايشىلارى (قاتىسۋشىلارى)، جەكە كاسىپكەرلەر، سونداي-اق ولاردىڭ جۇبايلارى سىندى شامامەن 3,9 ميلليون ادام دەكلاراتسيا تاپسىرۋعا مىندەتتەلەدى.
بۇل تۋرالى قارجى ۆيتسە-ءمينيسترى ەرجان ءبىرجانوۆ ءتۇسىندىردى، دەپ حابارلايدى Kazinform.
ايتا كەتەيىك، 2021-جىلى 1- قاڭتاردان قازاقستاندا كەزەڭ-كەزەڭىمەن جالپىعا بىردەي دەكلاراتسيا ەنگىزىلگەن ەدى. بۇل جىلى مەملەكەتتىك قىزمەتشىلەر جانە ولارعا تەڭەستىرىلگەن ادامدار جانە ولاردىڭ جۇبايلارى - شامامەن 580 مىڭ جەكە تۇلعا دەكلاراتسيا تاپسىرعان ەدى.
«بيىل ەكىنشى كەزەڭدە - مەملەكەتتىك ورگاندار مەن كۆازيمەملەكەتتىك سەكتور قىزمەتكەرلەرى جانە ولاردىڭ جۇبايلارى - شامامەن 2,1 ميلليون ادام قامتىلدى. ال ءۇشىنشى كەزەڭدە - 2024-جىلعى 1- قاڭتاردان باستاپ دەكلاراتسيانى زاڭدى تۇلعالاردىڭ باسشىلارى مەن قۇرىلتايشىلارى (قاتىسۋشىلارى)، جەكە كاسىپكەرلەر، سونداي-اق ولاردىڭ جۇبايلارى تاپسىرادى. بۇل شامامەن 3,9 ميلليون ادامدى قامتيدى»، - دەدى ەرجان ءبىرجانوۆ سەناتتىڭ قارجى جانە بيۋجەت كوميتەتىندە وتكەن وتىرىستا.
ءتورتىنشى كەزەڭدە - 2025-جىلعى 1- قاڭتاردان باستاپ ازاماتتاردىڭ قالعان ساناتتارى (مىسالى، جەكە قۇرىلىم قىزمەتشىلەرى، زەينەتكەرلەر، ءۇي شارۋاسىنداعى ادامدار، ستۋدەنتتەر جانە باسقالار) ۇسىناتىن بولادى.
مۇندا 6,4 ميلليون استام ادامدى قامتۋ جوسپارلانۋدا. جالپى العاندا، جالپى دەكلاراتسيالاۋ جۇيەسىنە 13 ميلليون جۋىق ادام كىرۋى قاجەت.
«جالپىعا بىردەي دەكلاراتسيالاۋ جۇيەسىندە جەكە تۇلعالار بارلىق شەتەلدىك اكتيۆتەرىن، جىلجىمالى جانە جىلجىمايتىن مۇلكىن كورسەتەتىن «كىرىس» دەكلاراتسياسىن ۇسىنۋى كەرەك. ماسەلەن: شەتەلدەگى جىلجىمايتىن مۇلىك جانە كولىك؛ شەتەل بانكىندەگى 7,3 مىڭ ا ق ش دوللارىنان جوعارى اقشا؛ شەتەلدىك كومپانياعا قاتىسۋ ۇلەسى؛ باعالى قاعازدار، سيفرلىق اكتيۆتەر (بيتكويندەر جانە ت. ب.)؛ ۇلەستىك قاتىسۋ شارتى؛ التىن قۇيماسى؛ زياتكەرلىك مەنشىك جانە اۆتورلىق قۇقىق وبەكتىلەرى؛ 34,5 ميلليون تەڭگە شەگىندە قولما-قول اقشا؛ نوتاريالدى كۋالاندىرىلعان باسقا تۇلعالارمەن قارىز شارتى؛ قۇنى 3,4 ميلليون تەڭگەدەن اساتىن باسقا مۇلىكتەر»، - دەپ ءتۇسىندىردى قارجى ۆيتسە-ءمينيسترى.
دەكلاراتسيانى تۇرعىلىقتى جەرى بويىنشا 2024-جىلعى 15- قىركۇيەككە دەيىن تاپسىرۋ قاجەت. ونى «سالىق تولەۋشىنىڭ كابينەتى»، ەلەكتروندى ۇكىمەت ۆەب-پورتالى، «e-salyqاzamat» ، Halyk، بانك سەنتركرەديت موبيلدى قوسىمشالارى ارقىلى ىسكە اسىرۋعا بولادى.
