كەلەسى 2025 -جىلدى گەندەرلىك تەڭدىك جىلى دەپ جاريالاۋ ۇسىنىلدى
استانا. KAZINFORM - قازاقستان كاسىپوداقتار فەدەراتسياسىنىڭ ءتوراعاسى ساتىبالدى داۋلەتالين العاش رەت ۇيىمداستىرىلعان ەڭبەكشى ايەلدەردىڭ فورۋمىندا گەندەرلىك تەڭدىك ماسەلەسىن كوتەردى.
«گەندەرلىك تەڭدىك - جالپىعا ورتاق پروبلەما، ونى شەشۋ بارىنە پايدالى. كوپتەگەن ەلدە گەندەرلىك كەمسىتۋشىلىكتى جويۋ ماسەلەلەرىمەن اينالىساتىن مەملەكەتتىك دەپارتامەنتتەر نەمەسە تەڭدىك مينيسترلىكتەرى قۇرىلعان. كاسىپوداقتار فەدەراتسياسى 2025 -جىلدى گەندەرلىك تەڭدىك جىلى دەپ جاريالاۋدى ۇسىنادى. كاسىپوداقتارداعى ايەلدەردىڭ وكىلدىگىنە كەلسەك، باستاۋىش ءتوراعالاردىڭ كوپشىلىگى ايەلدەر. ولاردىڭ دەنى ادامدارمەن تىكەلەي جۇمىس ىستەيدى، ولاردىڭ سۇراقتارىنا جاۋاپ بەرىپ، باسشىمەن ماسەلەلەردىڭ ناقتى شەشىمىن تابادى. بۇل مۇمكىن ايەلدەر جاۋاپتى، اتقارۋشى بولعاندىقتان دا شىعار»، - دەدى ساتىبالدى داۋلەتالين ەلوردادا ءوتىپ جاتقان قازاقستان ەڭبەكشى ايەلدەرىنىڭ I فورۋمىندا.
كاسىپوداقتار فەدەراتسياسى ءتوراعاسىنىڭ ايتۋىنشا، ايەلدەر ەموتسيونالدى بولعاندىقتان جۇمىستاعى ماسەلەلەرگە بەي-جاي قارامايدى.
«ءبىزدىڭ كاسىپوداقتىڭ سالالىق كاسىپوداقتارى مەن اۋماقتىق ۇيىمدارىن نەگىزىنەن ەر ادامدار باسقارادى، ياعني 23 سالالىق كاسىپوداقتىڭ تەك 4 ىن ايەلدەر باسقارادى، ال 18 اۋماقتىق ۇيىمداردىڭ ىشىندە نەبارى 5 ايەل باسشى بار. كورىپ وتىرعانىڭىزداي، كاسىپوداق ۇيىمدارىنىڭ جوعارعى دەڭگەيلەرىندە ولاردىڭ جالپى مۇشەلىك قۇرامداعى ۇلەسىمەن سالىستىرعاندا پروپورتسيونالدى ەمەس»، - دەيدى ول.
قازىر ەلوردادا «ەڭبەك سالاسىنداعى ايەلدەر: جاڭا شەشىمدەر ۋاقىتى» اتتى قازاقستان ەڭبەكشى ايەلدەرىنىڭ ءى فورۋمى ءوتىپ جاتىر. شارانى ۇيىمداستىرۋشى - قازاقستاننىڭ كاسىپوداقتار فەدەراتسياسى.
اۆتور
داۋلەت ىزتىلەۋ
