كەلەر جىلى وزبەكستان ت م ۇ- عا مۇشە ەلدەرمەن بىرلەسىپ عارىشعا سپۋتنيك ۇشىرماق

تاشكەنت. KAZINFORM - بۇل تۋرالى اقپارات جانە بۇقارالىق كوممۋنيكاتسيالار اگەنتتىگىندە وتكەن باسپا ءسوز ءماسليحاتىندا «وزبەكعارىشتىڭ» اەروعارىشتىق قىزمەت جانە عارىش مونيتورينگى جۇيەلەرىن دامىتۋ ءبولىمىنىڭ باستىعى مۋحيددين يبراگيموۆ ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

- بۇگىندە وزبەكستان 600 مىڭنان 1 ميلليون شارشى شاقىرىمعا دەيىنگى اۋماقتى قامتيتىن سپۋتنيك سۋرەتتەرىن ءوزى وڭدەي الادى. قازىر ءبىز جەردى قاشىقتان زوندتاۋمەن اينالىساتىن جەرسەرىكتەردى ىسكە قوسۋدى جوسپارلاپ وتىرمىز. ول ءۇشىن ءتيىستى ۇسىنىستار ازىرلەپ جاتىرمىز جانە بىرنەشە ەلمەن كەلىسسوز باستادىق، - دەدى مۋحيددين يبراگيموۆ.

سونداي-اق، سپيكەر تۇركى مەملەكەتتەرى ۇيىمىنا مۇشە ەلدەرمەن بىرلەسكەن زەرتتەۋ جوباسى قولعا الىنعانىن اتاپ ءوتتى. مۋحيددين يبراگيموۆتىڭ سوزىنشە، قازىر عىلىمي زەرتتەۋلەر جۇرگىزەتىن سپۋتنيك قۇراستىرىلىپ جاتىر. جەرسەرىكتى جاساۋعا «وزبەكعارىش» اگەنتتىگىنىڭ ماماندارى دا جۇمىلدىرىلادى.

- قاتەلەسپەسەم، اتالعان سپۋتنيكتى 2026-جىلى عارىشقا شىعارۋ جوسپارلانعان. ايتا كەتەيىن، بۇل جەرسەرىك وزبەكستاننىڭ ءتول ءونىمى ەمەس، ءبىزدىڭ ماماندار تەك كەيبىر قۇراستىرۋ جۇمىستارىنا قاتىسادى، - دەپ تۇيىندەدى م. يبراگيموۆ.

ەسكە سالايىق، بىلتىر وزبەكستان عارىش كەڭىستىگىن زەرتتەۋگە باعىتتالعان حالىقارالىق شارتقا قوسىلعان ەدى.

بۇعان دەيىن حابارلاعانىمىزداي، قازاقستان مەن وزبەكستان عارىش سالاسىنداعى سەرىكتەستىكتى نىعايتۋعا نيەتتى.