كەلەر جىلى ۇكىمەت قانداي زاڭ جوبالارىن ازىرلەيدى

ق ر ادىلەت ءمينيسترى ازامات ەسقارايەۆ ۇكىمەتتىڭ 2024 -جىلعا ارنالعان جوسپار جوباسى تۋرالى ايتىپ بەردى، دەپ حابارلايدى Kazinform.

ءمينيستردىڭ ايتۋىنشا، جوسپار جوباسى مەملەكەتتىك ورگانداردىڭ ۇسىنىستارى نەگىزىندە ازىرلەندى جانە 21-قىركۇيەكتە زاڭ جوبالاۋ قىزمەتى جونىندەگى ۆەدومستۆوارالىق كوميسسيادا ماقۇلداندى.

«باستاپقىدا جوسپار جوباسىندا 16 زاڭ جوباسىن ازىرلەۋ كوزدەلگەن ەدى. بۇگىنگى كۇنى جوسپارعا شامالى وزگەرىستەر ەنگىزىلدى. اتاپ ايتقاندا، پارلامەنت دەپۋتاتتارىنىڭ ۇقساس زاڭ جوباسىنا باستاماشىلىق جاساعانىنا بايلانىستى تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا زاڭ جوباسى جوسپاردان الىپ تاستالدى. ارحيۆ ءىسى جانە مادەنيەت ماسەلەلەرى بويىنشا جانە «كاسىبي پاراساتتىلىققا تەستىلەۋ تۋرالى» زاڭ جوبالارى قوسىمشا ەنگىزىلدى»، - دەدى ا. ەسقارايەۆ ۇكىمەتتىڭ قورىتىندى وتىرىسىندا.

مينيستر ايتقانداي، جوسپاردا 18 زاڭ جوباسىن ازىرلەۋ كوزدەلگەن، ونىڭ ىشىندە پارلامەنتكە ءبىرىنشى جارتىجىلدىقتا 3، ەكىنشى جارتىجىلدىقتا - 15 زاڭ جوباسىن ەنگىزۋ جوسپارلانۋدا.

اتالعان زاڭ جوبالارىنىڭ كونسۋلتاتيۆتىك قۇجاتتارى ۆەدومستۆوارالىق كوميسسيادا ماقۇلدانعان.

بۇعان دەيىن ا. ەسقارايەۆ مەملەكەتتىك ورگانداردىڭ زاڭ جوبالاۋ جۇمىسىن ناشار جوسپارلاعانىن سىنعا العان ەدى.

«2024 -جىلى 18 زاڭ جوباسىن ازىرلەۋ قاجەت بولادى. ولاردىڭ ىشىندە جاڭا تسيفرلىق كودەكس جوباسى، سونداي-اق يننوۆاتسيالىق قىزمەت سالاسىن مەملەكەتتىك قولداۋ جۇيەسىن جەتىلدىرۋ ماسەلەلەرى بويىنشا زاڭ جوباسى ەرەكشە ماڭىزدى. اتالعان زاڭ جوبالارىنىڭ قابىلدانۋى IT-سالانى دامىتۋعا، پەرسپەكتيۆالى ستارتاپتار سانىن ۇلعايتۋعا، قوسىمشا ينۆەستيتسيالار تارتۋعا مۇمكىندىك بەرەدى»، - دەدى پرەمەر-مينيستر ءاليحان سمايىلوۆ.

ءبىلىم جانە عىلىم سالاسىن دامىتۋ، سونداي-اق ۋنيۆەرسيتەتتەردى ورنىقتى قارجىلاندىرۋدى قامتاماسىز ەتۋ ماقساتىندا نىسانالى كاپيتال قورى تۋرالى زاڭ جوباسى ازىرلەنەدى.

قۇقىق قورعاۋ ورگاندارىندا سىبايلاس جەمقورلىقتىڭ الدىن الۋ ماقساتىندا جاڭا زاڭ جوباسى ارقىلى كاسىبي ادەپتىلىكتى تەكسەرۋ ينستيتۋتى ەنگىزىلەدى.