كەلەر جىلى استىق ونىمدىلىگى قانداي بولادى - مينيسترلىك جاۋاپ بەردى
اۋىل شارۋاشىلىعى ۆيتسە- ءمينيسترى ازات سۇلتانوۆ ەلىمىزدەگى استىق شىعىمدىلىعىنا قاتىستى تۇسىنىك بەردى، دەپ حابارلايدى Kazinform.
«قازىر كەلەر جىلعى استىق ونىمدىلىگىنە قاتىستى ناقتى بىردەڭە ايتۋ ءالى ەرتە. كەيبىر وڭىرلەردە ءداندى داقىلداردى جيناۋ اياقتالمادى، ەگىننىڭ 98 پايىزى جينالدى. توقتاۋسىز جاۋعان جاڭبىرعا بايلانىستى قازىر جەكەلەگەن ءداندى داقىلداردى جيناۋ جالعاسىپ جاتىر. ەگىن جيناۋدى اياقتاعان كاسىپورىندار كەلەر جىلعا دايىندالۋعا كىرىسەدى. ءتيىستى بولجامدى تەك 2024 -جىلى كوكتەمدە عانا ايتا الامىز»، - دەدى سەناتتا تىلشىلەر سۇراعىنا جاۋاپ بەرگەن ا. سۇلتانوۆ.
ونىڭ ايتۋىنشا، ەلىمىزدە بيىلعىداي جاۋىن- شاشىن 10 جىلدان بەرى بولماعان.
«كليماتتىڭ اسەرىنەن ەشكىم دە ساقتاندىرىلماعان. اسىرەسە، بيىل كۇزدە جاۋىن- شاشىن ۇزاققا سوزىلاتىنىن بولجاۋ مۇمكىن بولمادى. كەيبىر وڭىرلەردەگى جاز كەزىندەگى قۇرعاقشىلىقتان كەيىن تولاسسىز جاڭبىر ءبىرازعا باردى. مۇنداي جاڭبىر 10 جىلدان استام ۋاقىت بويى بولماعانىن «قازگيدرومەت» راستادى. اۋىل شارۋاشىلىعى تاۋارىن وندىرۋشىلەردىڭ وسىنداي جاعدايدا شىعىنعا باتپاس ءۇشىن ەگىن ەگۋ ناۋقانىن ۋاقتىلى جۇرگىزىپ، ەگىن وراعىن ۇزاققا سوزىپ الماي، تەز ارادا ىسكە اسىرۋ كەرەك. ەگەر تەحنيكا جەتكىلىكتى بولسا، جاۋىن- شاشىن باستالماي تۇرىپ مۇمكىندىگىنشە مول ءونىم الۋعا بولادى»، - دەدى ۆيتسە- مينيستر.
اۋىل شارۋاشىلىعى ۆيتسە- ءمينيسترى ءىرى اۋىل شارۋاشىلىعى كومپانيالارى جاڭبىرعا دەيىن استىقتىڭ ەداۋىر بولىگىن جيناپ ۇلگەرگەنىن ايتتى.
«بىزدە حالىقتى نانمەن، ۇنمەن، ماكارونمەن قامتاماسىز ەتەتىن جوعارى ساپالى استىق بولادى. ال ساپاسى تومەن ءونىمدى مال شارۋاشىلىعىن دامىتۋ ءۇشىن جەمدىك ماقساتتا پايدالانادى. شارۋالارعا بارلىق قاجەت رەسۋرستى - تۇقىمدى، تىڭايتقىشتى، وسىمدىكتەردى قورعاۋ قۇرالدارىن الدىن الا ساتىپ الۋى ءۇشىن جەڭىلدەتىلگەن نەسيەلەر ارقىلى كومەكتەسەمىز. مەملەكەت باسشىسىنىڭ تاپسىرماسى بويىنشا ءبىز اۋىل شارۋاشىلىعى تەحنيكاسىن جاڭارتۋدى جالعاستىرامىز»، - دەدى ۆەدومستۆو وكىلى.
ونىڭ سوزىنشە، بيىل كەيبىر شاعىن شارۋاشىلىقتار تەحنيكاسىنىڭ بولماۋىنان ءىرى فەرمەرلىك قۇرىلىمداردىڭ ەگىن جيناپ بولۋىن كۇتكەن. ويتكەنى شاعىن شارۋاشىلىقتار ءىرى كومپانيالاردىڭ تەحنيكاسىن جالعا الىپ ءجۇر. ءبىراق وسى جىلى ءىرى اۋىلشارۋاشىلىق قۇرىلىمدارى دا جاۋىن- شاشىنعا بايلانىستى قيىندىققا تاپ بولىپ، تەحنيكانى جالعا بەرۋ مەرزىمىن كەشىكتىردى.
سونىمەن قاتار ول اتالعان قولداۋ شارالارىنىڭ وزىندە كەلەر جىلعى ەگىننىڭ ونىمدىلىگى جوعارى بولاتىنىنا كەپىلدىك بەرە المايتىنىن جەتكىزدى.
«ەشكىم كەپىلدىك بەرە المايدى، بۇل ءوز كەزەگىندە اۋا رايىنا دا بايلانىستى. اتاپ ايتقاندا، شارۋالارمەن بىرگە جاقسى ءونىم الۋ ءۇشىن تەك قاجەت العىشارتتاردى عانا جاساي الامىز»، - دەدى ۆيتسە- مينيستر.
