كەلەر جىلدان باستاپ وزبەكستاندا بۋكمەكەرلىك كەڭسەلەردىڭ قىزمەتىنە رۇقسات بەرىلەدى
تاشكەنت. KAZINFORM - وزبەكستان پرەزيدەنتى شاۆكات ميرزيەيەۆ «تاۋەكەلگە نەگىزدەلگەن لوتەرەيا مەن ويىنداردى ۇيىمداستىرۋ جانە وتكىزۋ ءتارتىبىن رەتتەۋدى جەتىلدىرۋ جونىندەگى شارالار» جارلىعىنا قول قويدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
قۇجاتقا سايكەس، 2025-جىلدىڭ 1-قاڭتارىنان باستاپ پەرسپەكتيۆالىق جوبالار ۇلتتىق اگەنتتىگىنىڭ ليتسەنزياسىن العاندارعا بۋكمەكەرلىك قىزمەتتى ۇيىمداستىرۋعا رۇقسات ەتىلەدى.
اتالعان اگەنتتىك ونلاين ويىنداردى، بۋكمەكەرلىك قىزمەتتى، سونداي-اق لوتەرەيالاردى ۇيىمداستىرۋ جونىندەگى قىزمەتتى رەتتەۋ جانە ليتسەنزيالايتىن ۋاكىلەتتى مەملەكەتتىك ورگان رەتىندە ايقىندالعان. بەرىلەتىن ليتسەنزيا نەگىزىندە ۇيىمداستىرىلاتىن بۋكمەكەرلىك ستاۆكالارعا، ونلاين ويىندار مەن لوتەرەيالارعا تەك 18 جاستان اسقان وزبەكستاندىقتار مەن شەتەلدىكتەر قاتىسا الادى.
«2025-جىلدىڭ 1-قاڭتارىنان باستاپ 5 جىل مەرزىمگە ونلاين ويىن، لوتەرەيا ۇيىمداستىراتىن جانە بۋكمەكەرلىك قىزمەتپەن اينالىساتىن زاڭدى تۇلعالار بارلىق تولەنگەن ۇتىس پەن قايتارىلعان ستاۆكالاردى شەگەرگەندەگى جيىنتىق تابىسىنىڭ 4 پايىزى كولەمىندە سالىق تولەيدى»، - دەلىنگەن قۇجاتتا.
بۇل رەتتە بۋكمەكەرلىك كەڭسەلەردە ءباس تىككەندەردىڭ جەكە تۇلعالاردىڭ تابىسىنا سالىق سالىنبايدى. پەرسپەكتيۆالىق جوبالار ۇلتتىق اگەنتتىگىنىڭ تۇسىندىرۋىنشە، بۇل شارالار ازاماتتاردىڭ قۇقىعى مەن مۇددەسىن قورعاۋعا، ويىنعا دەگەن تاۋەلدىلىكتىڭ الدىن الۋعا جانە كۇرەسۋگە، ەلدەگى قاراجاتتىڭ سىرتقا كەتۋىن توقتاتۋعا باعىتتالعان.
