كەلەر جىلدان باستاپ «كوكتوبە» مۇناراسى تۇندە جارقىراپ تۇرادى

الماتىدا كوپكە تانىمال ورىندار مەن ساياباقتار اباتتاندىرىلاتىن بولادى. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە مەدەۋ اۋدانىنىڭ اكىمى ەركەبۇلان ورازالين ايتتى، دەپ حابارلايدى Kazinform.

سپيكەردىڭ سوزىنشە، بيىل شىلدە ايىندا جەكە قاراجات ەسەبىنەن ساۋلەت ەسكەرتكىشى ق ر پرەزيدەنتى جانىنداعى ۇلتتىق عىلىم اكادەمياسى عيماراتىن كۇردەلى جوندەۋ جۇمىستارى باستالعان. جوبادا سونداي-اق عىلىم اكادەمياسىنا ىرگەلەس اۋماقتاعى شوقان ءۋاليحانوۆ اتىنداعى الاڭ مەن شەۆچەنكو كوشەسى جاعىنان ىرگەلەس جاتقان سكۆەردى اباتتاندىرۋ كوزدەلگەن. قازىر جۇمىستار %90 عا اياقتالدى.

«وسىعان ۇقساس جۇمىستار عىلىم اكادەمياسى عيماراتىنا ىرگەلەس پۋشكين كوشەسىنە جاقىن الاڭدا دا جۇرگىزىلۋدە. بۇل جوبا «حالىق قاتىساتىن بيۋدجەت» باعدارلاماسى اياسىندا جۇزەگە اسۋدا. ءۇش الاڭداعى جۇمىستار جىل سوڭىنا دەيىن اياقتالادى. سونداي-اق، قالا نىشاندارىنىڭ ءبىرى «كوكتوبە» تەلەمۇناراسىن ساۋلەتتىك-كوركەمدىك جارىقتاندىرۋ جۇمىستارى جوسپارلانعان. قۇرىلىس-مونتاجداۋ جۇمىستارى 2024 -جىلدىڭ قاڭتار ايىندا باستالىپ، مامىر ايىندا اياقتاۋ جوسپارلانۋدا»، - دەدى سپيكەر.

قوعامدىق كەڭىستىكتەردى دامىتۋ اياسىندا «سامال-1» شاعىن اۋدانىندا ورنالاسقان «جۋرناليستەر» ساياباعىن رەكونستركسيالاۋ جۇمىستارى جىل سوڭىنا دەيىن جۇرگىزىلەدى. «الاتاۋ» شاعىن اۋدانى تۇرعىندارىنىڭ وتىنىشىمەن بيىل يبراگيموۆ كوشەسىندە سكەيت-پاركتىڭ قۇرىلىسى باستالدى. جۇمىستار جىل سوڭىنا دەيىن اياقتالادى.

«اياقتالۋ ساتىسىندا تۇرعان كەلەسى جوبا ول - دوستىق داڭعىلىنان «ەسەنتاي» وزەنىنە دەيىنگى وسپانوۆ كوشەسىندەگى جاياۋ جۇرگىنشىلەر ايماعى. جوبا اياسىندا ۇزىندىعى 500 مەترگە جۋىق تروتۋار جولى كەڭەيتىلدى. جاياۋ جۇرگىنشىلەر ايماعىنىڭ باستى ەرەكشەلىگى 80 سۋرەتشىنىڭ كوركەم كومپوزيتسيالارىمەن بەزەندىرىلگەن گراففيتي قابىرعاسى بولدى»، - دەدى ەركەبۇلان ورازالين.

ول بيىل قىركۇيەك ايىنىڭ باسىندا جەكە قاراجات ەسەبىنەن «كوك - توبە» ساياباعىنا دەيىن ۇزىندىعى 1,2 شاقىرىم جاياۋ جۇرگىنشىلەر جولىن سالۋ جۇمىستارى باستالعانىن ايتتى. بۇگىنگى كۇنى جول سالۋ جانە اسفالتتاۋ بويىنشا نەگىزگى جۇمىستار جاسالدى. جارىقتاندىرۋ مەن باسقا دا جۇمىستار 2024 -جىلدىڭ كوكتەمىندە اياقتالادى.

بيىل سونداي-اق «كوك بازاردى» جاڭعىرتۋ جۇمىستارى باستالدى. جەلىلەردى قايتا جاڭارتۋ جۇرگىزىلۋدە، ورتالىق كىرەبەرىستىڭ الدىندا بەتون جابىندىسىن جاڭارتۋ، تىرەك كونسترۋكسيالارىن كۇشەيتۋ، اۋماقتى اباتتاندىرۋ جوسپارلانۋدا. جۇمىستاردى 2025 -جىلدىڭ سوڭىنا دەيىن اياقتاۋ جوسپارلانىپ وتىر.

ەسكە سالساق، الماتى اكىمى ەربولات دوسايەۆ بۇعان دەيىن «كوك بازاردىڭ» جاڭارتىلاتىنى تۋرالى ايتقان بولاتىن.

اۆتور

دۋمان ارعىنگەلدى