«كەلەشەك» ءبىرىڭعاي ەرىكتى جيناقتاۋ جۇيەسىنىڭ شارتى قانداي

استانا. KAZINFORM - مەملەكەت باسشىسىنىڭ تاپسىرماسىن ىسكە اسىرۋ ماقساتىندا «كەلەشەك» ءبىرىڭعاي ەرىكتى جيناقتاۋ جۇيەسى ازىرلەندى.

عىلىم جانە جوعارى ءبىلىم مينيسترلىگى مالىمەتىنشە، مەملەكەتتىك قولداۋدىڭ بۇل شاراسى قازاقستان بالالارىنا 5 جاستان باستاپ 18 جاسقا تولعانعا دەيىن ەلدە جانە شەتەلدە ءبىلىم بەرۋ قىزمەتتەرىنە، سونىڭ ىشىندە جوعارى، سونداي- اق تەحنيكالىق جانە كاسىپتىك ءبىلىم بەرۋ قىزمەتتەرىنە اقى تولەۋ ءۇشىن قارجى قاراجاتىن تۇراقتى جيناقتاۋ ماقساتىنا ارنالعان.

«كەلەشەك» جۇيەسىنە قاتىسۋ ءۇشىن اتا- انالار مەملەكەتتىك ءبىلىم بەرۋ جيناقتاۋ جۇيەسىنىڭ قاتىسۋشىلارى بولىپ تابىلاتىن ەكىنشى دەڭگەيدەگى بانكتەردە جانە ساقتاندىرۋ كومپانيالارىندا شوت اشۋى قاجەت. وندا اعىمداعى كۇنتىزبەلىك جىلى 5 جاسقا تولعان بالالارعا 60 ا ە ك (2025 -جىلى 235920 تەڭگەنى قۇرايدى) جانە جەتىم بالالار ءۇشىن 120 ا ە ك (471840 تەڭگە) مولشەرىندە باستاپقى ءبىلىم بەرۋ كاپيتالى، %5-7 مولشەرىندە مەملەكەتتىك سىيلىق اقىنىڭ جىل سايىنعى تولەمى جانە ينۆەستيتسيالىق تابىس ەسەپتەلەتىن بولادى.

«كەلەشەك» جۇيەسىنىڭ شارتى - اتا- انالار كەمىندە 12 ا ە ك مولشەرىندە جىل سايىنعى مىندەتتى ەڭ تومەنگى جارنانى تولەۋى ءتيىس.

شوتتاردى قازاقستاننىڭ دەپوزيتتەرگە كەپىلدىك بەرۋ قورى، ال ساقتاندىرۋ تولەمدەرىنىڭ سوماسىن ساقتاندىرۋ تولەمدەرىنە كەپىلدىك بەرۋ قورى ساقتاندىرادى.

مەملەكەتتىك ءبىلىم بەرۋ گرانتىن العان جاعدايدا قاراجاتتى جوعارى وقۋ ورنىنان كەيىنگى ءبىلىم الۋعا پايدالانۋعا بولادى.

سونىمەن قاتار، جيناقتالعان قاراجاتتى تۇرعىن ءۇي جاعدايىن جاقسارتۋعا باعىتتاۋعا جانە قاجەت بولعان جاعدايدا ءۇشىنشى تۇلعالارعا بەرۋگە بولادى.

پرەزيدەنت «كەلەشەك» جيناقتاۋ جۇيەسى تۋرالى زاڭعا قول قويعانىن جازعان بولاتىنبىز.