«كەلەشەك» باعدارلاماسى ارقىلى جيناقتالعان قارجىعا تۇرعىن ءۇي ساتىپ الۋعا بولادى
ءبىلىم گرانتىن ۇتقان تۇلەكتەردىڭ «كەلەشەك» باعدارلاماسى بويىنشا جيناقتالعان قارجىعا تۇرعىن ءۇي ساتىپ الۋ مۇمكىندىگى بار.
بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى، دەپ حابارلايدى Kazinform.
«2024-جىلدان باستاپ كەز-كەلگەن اتا-انا سەرىكتەس بانكتەردىڭ بىرىنە بارىپ، سول جەردە بالانىڭ وقۋىنا اقشا جينايتىن ارنايى شوت اشا الادى. اتا-انا شوت اشقاندا 1 ا ە ك (3450 تەڭگە) قۇيۋ قاجەت. بۇل مينيمالدى سوما. ءبىزدىڭ مينيسترلىك اتا-انالاردى قولداۋ ماقساتىندا باستاپقى ىنتالاندىرۋ كاپيتالىن بەرەدى»، - دەدى ساياسات نۇربەك ۇكىمەت ۇيىندە وتكەن باسپا ءسوز ءماسليحاتىندا.
ونىڭ ايتۋىنشا، الداعى ۋاقىتتا جينالعان سومانى «ۇلتتىق قور - بالالارعا» جوباسى شوتىندا جيناقتالاتىن قاراجاتپەن بىرىكتىرۋگە بولادى.
«ەگەر بالا ءبىلىم گرانتىن جەڭسە «كەلەشەك» باعدارلاماسى بويىنشا جيناقتالعان قارجىعا تۇرعىن ءۇي ساتىپ الۋعا نەمەسە وتباسىنداعى باسقا بالالارعا بەرە الادى. ءبىز بالالارىمىز ساپالى ءبىلىم الۋى ءۇشىن اتا-انالارعا بارىنشا قولداۋ كورسەتەمىز»، - دەپ تولىقتىردى مينيستر.
