كۋشنەر رەسەي مەن ۋكراينا اراسىنداعى قاقتىعىستى رەتتەۋ جونىندە كوپجاقتى كەزدەسۋ وتەتىنىن مالىمدەدى
استانا. KAZINFORM – ا ق ش رەسەيمەن، ۋكراينامەن جانە ەۋروپاداعى سەرىكتەستەرىمەن قاقتىعىستى بەيبىت جولمەن رەتتەۋ جونىندەگى كەلىسسوزدەردى جالعاستىرىپ جاتىر. بۇل تۋرالى دجارەد كۋشنەر X الەۋمەتتىك جەلىسىندەگى پاراقشاسىندا جازدى.
كۋشنەردىڭ ايتۋىنشا، ول ا ق ش پرەزيدەنتىنىڭ ارنايى وكىلى ستيۆ ۋيتكوففپەن بىرگە رەسەي پرەزيدەنتىنىڭ كومەكشىسى يۋري ۋشاكوۆپەن تەلەفون ارقىلى سويلەسكەن. تاراپتار بەيبىت كەلىسسوزدەردەگى قول جەتكىزىلگەن ىلگەرىلەۋ مەن الداعى قادامداردى تالقىلاعان.
بۇدان بولەك، ۋكراينا وكىلدەرىمەن جانە ەۋروپاداعى سەرىكتەستەرىمەن دە اڭگىمە وتكەن. وعان گەرمانيا، فرانسيا، ۇلى بريتانيا، پولشا جانە يتاليانىڭ ۇلتتىق قاۋىپسىزدىك جونىندەگى كەڭەسشىلەرى، سونداي-اق ەۋروپالىق وداق پەن ناتو وكىلدەرى قاتىسقان.
كۋشنەردىڭ سوزىنشە، تالقىلانعان ماسەلەلەردىڭ ءبىرى - ەۋروپا مەن رەسەي اراسىنداعى ديالوگتى جولعا قويۋ.
كەلىسسوزگە قاتىسۋشىلار جاقىن ارادا وتەدى دەپ جوسپارلانعان كەلەسى كوپجاقتى كەزدەسۋدىڭ كۇن ءتارتىبىن ازىرلەۋگە دە كىرىسكەن.
كۋشنەر قاقتىعىستى توقتاتۋمەن قاتار، بولاشاقتا جاڭا قاقتىعىستاردىڭ الدىن الۋعا مۇمكىندىك بەرەتىن قاۋىپسىزدىك جۇيەسىن قۇرۋ دا باستى ماسەلەلەردىڭ ءبىرى ەكەنىن اتاپ ءوتتى.
سونداي-اق ول ا ق ش- تىڭ ۋكراينا جانە ەۋروپاداعى سەرىكتەستەرىمەن بىرلەسىپ جۇمىس ىستەپ جاتقان ءۇش نەگىزگى باعىتىن اتادى. ولار - ۋكرايناعا سەنىمدى قاۋىپسىزدىك كەپىلدىكتەرىن بەرۋ، ونىڭ ەۋروپالىق وداققا قوسىلۋ مۇمكىندىگىن قامتاماسىز ەتۋ جانە ەكونوميكانى قالپىنا كەلتىرۋدىڭ كەشەندى جوسپارىن ازىرلەۋ.
سوڭعى باعىت بويىنشا ەۋروپاداعى سەرىكتەستەرمەن، دۇنيەجۇزىلىك بانكپەن جانە باسقا دا ۇيىمدارمەن بىرلەسىپ جۇمىس ىستەۋ كوزدەلگەن. بۇل قارجىلىق تۇراقتىلىقتى قولداۋعا، ينفراقۇرىلىمدى قالپىنا كەلتىرۋگە جانە ينۆەستيتسيا تارتۋعا باعىتتالعان.
بۇعان دەيىن ۋكراينا پرەزيدەنتى ۆلاديمير زەلەنسكيدىڭ ا ق ش وكىلدەرى پۋتينمەن كەلىسسوز جۇرگىزگەننەن كەيىن بىردەن ولارمەن كەزدەسكەنى حابارلانعان بولاتىن.
زەلەنسكيمەن كەزدەسۋدىڭ الدىندا، 12-قاراشادا رەسەي پرەزيدەنتى ۆلاديمير پۋتين كرەملدە ستيۆ ۋيتكوففپەن جانە دجارەد كۋشنەرمەن كەلىسسوز وتكىزدى. تاراپتار ابۋ-دابيدە وتكەن ءۇشجاقتى كونسۋلتاتسيالاردىڭ قورىتىندىسىن، گۋمانيتارلىق ماسەلەلەردى، اۋماقتىق رەتتەۋدى جانە الداعى ديالوگتىڭ مۇمكىندىكتەرىن تالقىلادى.
بۇل كەزدەسۋگە دەيىن، 10-11-قاراشادا ابۋ-دابيدە رەسەي، ا ق ش جانە ۋكراينا وكىلدەرى كەلىسسوز جۇرگىزگەن ەدى. ونىڭ قورىتىندىسى بويىنشا تاراپتار تۇتقىن الماسۋعا جانە ديپلوماتيالىق بايلانىستاردى جالعاستىرۋعا كەلىسكەن.