كەدەن قىزمەتىنە قۇقىق قورعاۋ ورگانىنىڭ فۋنكسيالارىن بەرۋ قاجەت - بەكتەنوۆ

استانا. KAZINFORM - بۇل تۋرالى پرەمەر-مينيستر ولجاس بەكتەنوۆ ءماجىلىس دەپۋتاتى ابزال قۇسپاننىڭ كەدەن قىزمەتىن دەربەس ورگان رەتىندە قالپىنا كەلتىرۋ تۋرالى ساۋالىنا بەرگەن جاۋابىندا ءمالىم ەتتى.

- جۇك تاسىمالى كولەمىنىڭ ارتۋىمەن بىرگە سانكسيا سالىنعان تاۋارلاردىڭ، قوسارلانعان ماقساتتاعى تاۋارلاردى، كونتراباندانى وتكىزۋدىڭ، جالعان دەكلاراتسيالاۋدىڭ جانە وزگە دە زاڭ بۇزۋشىلىقتاردىڭ قاۋىپ-قاتەرى دە ارتا تۇسەدى. ەلدىڭ ەكونوميكالىق جانە ۇلتتىق قاۋىپسىزدىگىن قورعاۋ، سونداي-اق قازىرگى زامانعى قاۋىپ-قاتەرلەرگە قارسى ءىس-قيمىل ءۇشىن كەدەن قىزمەتىنىڭ فۋنكسيالارىن قايتا قاراۋ، ونىڭ ىشىندە وعان قۇقىق قورعاۋ ورگانىنىڭ فۋنكسيالارىن بەرۋ قاجەت بولىپ وتىر. دەگەنمەن كوتەرىلىپ وتىرعان ماسەلەنى شەشۋ كەزىندە كەدەن قىزمەتىنە قۇقىق قورعاۋ ورگانى مارتەبەسىن بەرۋ جانە وعان تاۋارلاردىڭ، قارۋ-جاراق پەن ەسىرتكىنىڭ كونترابانداسىنا قاتىستى سوتقا دەيىنگى تەرگەۋ جۇرگىزۋ قۇقىعىن بەرۋ قارجىلىق مونيتورينگ اگەنتتىگى مەن ۇلتتىق قاۋىپسىزدىك كوميتەتىنىڭ قازىرگى قۇرىلىمدىق بولىمشەلەرىنىڭ قىزمەتىن قايتالاۋعا الىپ كەلەتىنىن ەسكەرگەن ءجون، - دەپ جازىلعان پرەمەر-ءمينيستردىڭ جاۋابىندا.

ەسكە سالساق، ءماجىلىس دەپۋتاتى ابزال قۇسپان پرەمەر-مينيستر ولجاس بەكتەنوۆتىڭ اتىنا كەدەن قىزمەتىندەگى پروبلەمالار تۋرالى ساۋال جولداپ، كەدەن قىزمەتىن قارجى مينيسترلىگىنەن دەربەس ورگان رەتىندە قالپىنا كەلتىرۋدى ۇسىنعان بولاتىن.