كاتونقاراعايعا اۋەجاي قاشان سالىنادى - ءمينيستردىڭ جاۋابى

ۇكىمەت وتىرىسىندا كولىك ءمينيسترى مارات قارابايەۆ شىعىس قازاقستان وبلىسىنىڭ كاتونقاراعاي اۋدانىندا اۋەجاي سالۋ ماسەلەسى قاراستىرىلىپ جاتقانىن بايانداعان. ودان كەيىن وتكەن باسپا ءسوز كونفەرەنسياسىندا مينيستر اتالعان جوبا تۋرالى ناقتىراق مالىمەت بەردى، دەپ حابارلايدى Kazinform.

«قارجىلاندىرۋ كوزى رەسپۋبليكالىق بيۋجەتتەن بولادى. ويتكەنى ول تۋريستىك باعىتتاعى جوبا، ءبىراق ينۆەستورلار ءۇشىن ءالى دە ءبىر تارتىمدى باعىت ەمەس. سوندىقتان قارجىلاندىرۋ كوزى تەك قانا رەسپۋبليكالىق بيۋجەتتەن بولادى.

ءالى دە وسىنشا ادام ۇشادى، وسىنشا بولادى دەگەن دايىن ءبىر ەسەبىمىز جوق. ول تەك اكىمدەردىڭ اۋىسقانىنا بايلانىستى ەمەس. ءبىز بالقاشتى رەتتەدىك، ءۇشارالدى رەتتەدىك، ءۇرجاردى رەتتەدىك. بۇلار - شاعىن اۆياتسيا سالاسى. سونىڭ رەتىمەن ەندى كاتونقاراعايعا دا جەتىپ وتىرمىز. قازىر زايساننىڭ اۋە قاتىناسىندا ءبىراز پروبلەمالار بولىپ وتىر. ءبىرىنشى ماقسات - سول زايساندى رەتتەۋ. جاڭا ۇشۋ-قونۋ جولاعىن سالۋ ماسەلەسى بار. قازىرگى تۇرعان جەرىندە ءارى قاراي ونى دامىتايىق دەسەك، ول جاقتا سانيتارلىق جانە باسقا دا ماسەلەلەر بار»، - دەدى مينيستر.

ۆەدومستۆو باسشىسى جوبانىڭ تەزىرەك ىسكە اسۋى كاتونقاراعايدا تۋريزمنىڭ قانشالىقتى داميتىنىنا بايلانىستى ەكەنىن اتاپ ءوتتى.

«قازىر ول جاققا ءبىر كومپانيا كەلىپ، بەسجۇلدىزدى ۇلكەن قوناق ءۇي سالامىن دەپ جوسپارلاپ وتىر. ەگەر سونداي جوسپار بولسا، وندا بولادى. ويتكەنى كاتونقاراعايداعى تۋريزم ماۋسىمدىق بيزنەس بولىپ تۇر. ءۇش اي عانا ىستەيدى قازىر. ەگەر شىنىمەن ۇلكەن كومپانيالار كەلىپ، ۇلكەن قوناق ءۇي سالىپ، تۋريزم جىل بويى ىستەپ تۇراتىن بولسا، رەسپۋبليكالىق بيۋجەتتەن ۇشۋ-قونۋ جولاعىن دا سالۋعا، تەرمينال سالۋعا قاراجات بولۋگە دايىنبىز دەپ تۇرمىز»، - دەدى مارات قارابايەۆ.