كاسپيدەگى قايعىلى وقيعا: مينيسترلىك ءتىرى قالعان ءۇشىنشى اسكەري قىزمەتشى تۋرالى ايتتى

مينيسترلىكتىڭ رەداكسيا ساۋالىنا بەرگەن جاۋابىندا ءتىرى قالعان ءۇشىنشى اسكەري قىزمەتشىنىڭ باتىس قازاقستان وبلىسىنىڭ تۇرعىنى نيكيتا ۋدالوۆ ەكەنى ايتىلعان. قازىر ول دارىگەرلەردىڭ باقىلاۋىندا، جاعدايى جاقسى، دەپ ناقتىلادى ۆەدومستۆونىڭ باسپا ءسوز قىزمەتى.

بۇعان دەيىن تاعى ەكى اسكەري قىزمەتشىنىڭ امان قالعانى بەلگىلى بولعان ەدى. ولار - اتىراۋ وبلىسىنىڭ تۇرعىنى بەكەت قۋاندىق جانە ماڭعىستاۋ وبلىسىنىڭ تۇرعىنى اقجول تەمىرحان.

وقيعادان كەيىن اقجول تەمىرحان اۋىر جاعدايدا اۋرۋحاناعا جەتكىزىلىپ، جانساقتاۋ بولىمىنە جاتقىزىلعان. كەلەسى كۇنى ەسىن جيىپ، جاعدايى تۇراقتانعان.

بەكەت قۋاندىق تا دارىگەرلەردىڭ باقىلاۋىندا، دەپ حابارلادى قورعانىس مينيسترلىگى.

بۇعان دەيىن ونىڭ اتا-اناسى بەكەت قۋاندىقتىڭ اۋرۋحاناعا جاتقىزىلماعانىن، ءوزىن جاقسى سەزىنەتىنىن جانە وزدىگىنەن ءجۇرىپ-تۇرا الاتىنىن ايتقان بولاتىن.

ايتپ كەتەيىك، اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.

سونىمەن قاتار، پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.

اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىنى ايتىلدى.

بۇگىن كاسپيدە ەكى اسكەري قىزمەتشىنى ىزدەۋ وپەراتسياسىنا جۇزدەگەن ادام جۇمىلدىرىلعانى حابارلاندى.

سونىمەن قاتار اسكەري قىزمەتشىلەردىڭ قاۋىپسىزدىگىنە جاۋاپتى تۇلعالار كۇدىككە ىلىنگەنى تۋرالى جازعان ەدىك.

ايتا كەتەلىك كاسپيدەگى توتەنشە جاعدايدان كەيىن قۇتقارىلعان اسكەري قىزمەتشى ەسىن جيعان ەدى.

بۇگىن كاسپي تەڭىزىندە جوعالعان ەكى اسكەري قىزمەتشىنىڭ دەنەسى تابىلىپ، ىزدەستىرۋ وپەراتسياسى اياقتالعان ەدى.

كاسپيدەگى اسكەري قىزمەتشىلەردىڭ قازاسىنا بايلانىستى قىلمىستىق ءىس ەكى باپ بويىنشا تەرگەلىپ جاتىر.

قىزمەتكە سالعىرت قاراۋ جانە كورابل جۇرگىزۋ قاعيدالارىن بۇزۋ بويىنشا اۋىر زارداپتارعا اكەپ سوققان قىلمىستىق قۇقىق بۇزۋشىلىقتار جاسادى دەگەن كۇدىكپەن قازاقستان رەسپۋبليكاسى قارۋلى كۇشتەرىنىڭ جوعارى جانە اعا كوماندالىق قۇرامىنداعى جاۋاپتى لاۋازىمدى تۇلعالار ۇستالدى.

قورعانىس ءمينيسترى، اۆياتسيا گەنەرال-لەيتەنانتى داۋرەن قوسانوۆ كىنالى تۇلعالار جاۋاپكەرشىلىكتەن جالتارمايتىنىن ايتتى.

سونداي-اق، قازا بولعان اسكەري قىزمەتشىلەردىڭ وتباسىلارىنا جينالعان قاراجاتتى ارنايى كوميسسيا بولەدى.