كاسىپكەرلەردى تەكسەرۋ مەن جاۋاپقا تارتۋ اناعۇرلىم ازايادى

Фото: otyrar.kz
Фото: otyrar.kz

استانا. KAZINFORM - الداعى 2030-جىلعا قاراي شاعىن جانە ورتا بيزنەستىڭ جالپى ىشكى ونىمىندەگى ۇلەسى 40 پايىزعا جەتۋى كەرەك. بۇل تۋرالى ق ر پرەمەر-ءمينيسترى ءاليحان سمايىلوۆ ايتىپ بەردى.

«قابىلدانعان شارالار ناتيجەسىندە شاعىن جانە ورتا بيزنەستىڭ جالپى ىشكى ونىمىندەگى ۇلەسى 36,5 پايىزعا دەيىن ءوستى. ال 2030-جىلعا قاراي بۇل كورسەتكىشتى 40 پايىزعا دەيىن جەتكىزۋىمىز كەرەك. وسى ماقساتقا جەتۋ ءۇشىن قازىردىڭ وزىندە كاسىپكەرلىك قىزمەتتە جاڭا رەتتەۋشى ساياسات ەنگىزىلۋدە. ءقازىر «تازا پاراقتان باستاۋ» رەفورماسى بيزنەستى بەلسەندىرۋ جولىندا ىنتالاندىرۋشى شارالاردىڭ تيىمدىلىگىن ارتتىرۋدا. بۇگىنگى تاڭدا 9 مىڭ ارتىق تالاپ الىنىپ تاستالدى. قالعان 1 مىڭعا جۋىعى بيزنەستى جۇرگىزۋ جونىندەگى زاڭ جوباسى شەڭبەرىندە الىنادى. بۇل قۇجات قازىر سەنات قاراۋىندا»، - دەدى ءا. سمايىلوۆ ۇكىمەتتىڭ بۇگىنگى وتىرىسىندا.

ۇكىمەت باسشىسى بيىلدان باستاپ باقىلاۋ مەن قاداعالاۋ سالالارىندا تاۋەكەلدەردى باسقارۋدىڭ اۆتوماتتاندىرىلعان جۇيەسى ىسكە قوسىلعانىن ەسكە سالدى. بۇل بيزنەستى جوسپارلى تەكسەرۋ مەن كاسىپكەرلەردى جاۋاپقا تارتۋ جاعدايلارىن ءبىرشاما قىسقارتادى. وسى ارقىلى بيزنەس اكىمشىلىك جۇكتەمەنىڭ تومەندەگەنىن سەزىنۋى كەرەك.

«سونىمەن قاتار سالىقتىق ىنتالاندىرۋ اياسىندا بىلتىردان بەرى 4 پايىز ستاۆكامەن بولشەك سالىق رەجيمى ەنگىزىلدى. ەڭبەكاقى تولەۋ قورىنان ءبىرىڭعاي تولەم ەنگىزىلىپ، ميكرو جانە شاعىن بيزنەسكە جالپى قارجىلىق جۇكتەمە 34,5 پايىزدان 20 پايىزعا دەيىن تومەندەدى. دەگەنمەن كەيبىر ماسەلەلەر شەشىلمەگەن كۇيىندە قالىپ وتىر، ولار ءوز كەزەگىندە كاسىپكەرلىكتىڭ دامۋىنا كەدەرگى كەلتىرۋدە. مىسالى اكىمدىكتەر بيزنەستىڭ بازالىق ينفراقۇرىلىمعا قوسىلۋ بويىنشا ارتىپ كەلە جاتقان قاجەتتىلىگىن يگەرە الماي وتىر. وڭىرلەر جوسپارلانعان جوبالاردى ۋاقىتىلى پايدالانۋعا بەرۋ ءۇشىن ينجەنەرلىك جەلىلەر مەن كوممۋنيكاتسيالاردى جەدەلدەتىپ جۇرگىزۋلەرى قاجەت»، - دەدى سپيكەر.

سوڭعى جاڭالىقتار