كاسىپكەرلەر مەن تۇرعىنداردان اقشا بوپسالاعان توپ ۇستالدى
قىزىلوردا. KAZINFORM - قىزىلوردا وبلىستىق پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى وبلىستىق پروكۋراتۋراسىنىڭ ۇيلەستىرۋىمەن ۇيىمداسقان قىلمىستىق توپتى قۇرىقتادى.
جەدەل ىزدەستىرۋ بارىسىندا توپ مۇشەلەرىنىڭ كاسىپكەرلەر مەن ازاماتتاردان «كۇش قولدانامىن» دەپ قورقىتۋ ارقىلى اقشا بوپسالاپ، تۇزەۋ مەكەمەلەرىندەگى سوتتالعاندارعا ارنالعان «ورتاق قورعا» قارجى جيناۋمەن اينالىسقانى انىقتالدى.
- تەرگەۋ بارىسىندا قىلمىستىق ارەكەتتەردىڭ بىرنەشە ەپيزودى دالەلدەنىپ، سانكتسيالانعان ءتىنتۋ جۇرگىزىلدى. ناتيجەسىندە تراۆماتيكالىق جانە پنيەۆماتيكالىق قارۋلار، وق-دارىلەر، اقشا قاراجاتى جانە وزگە دە ايعاق زاتتار تاركىلەندى. سونىمەن قاتار جابىرلەنۋشىلەر مەن كۋالاردان جاۋاپ الىنىپ، بانك اۋدارىمدارى مەن سيفرلىق دالەلدەمەلەر زەرتتەلىپ، قىلمىستىق توپتىڭ زاڭسىز ارەكەتتەرى تولىق راستالدى. اتالعان دەرەكتەر بويىنشا قورقىتىپ الۋ، زاڭسىز قارۋ ساقتاۋ، بۇزاقىلىق جانە ۇيىمداسقان قىلمىستىق توپ قۇرۋ مەن وعان قاتىسۋ فاكتىلەرى بويىنشا بىرنەشە قىلمىستىق ءىس تىركەلدى. قىلمىستىق توپتىڭ 8 مۇشەسى كۇدىكتى رەتىندە تانىلىپ، سوت سانكسياسىمەن كۇزەتپەن ۇستاۋ تۇرىندەگى بۇلتارتپاۋ شاراسى قولدانىلدى، - دەلىنگەن پوليتسيا حابارلاماسىندا.
سوتقا دەيىنگى تەرگەپ-تەكسەرۋ اياقتالىپ، قىلمىستىق ءىس سوتقا جولداندى. سوت ۇكىمىمەن ۇيىمداسقان قىلمىستىق توپتىڭ جەتەكشىسى مەن بەلسەندى مۇشەلەرىنە 4 جىلدان باستاپ 11 جىلعا دەيىن مەرزىمگە باس بوستاندىعىنان ايىرۋ جازاسى تاعايىندالىپ، ۇكىم زاڭدى كۇشىنە ەندى.
