كاسىپكەرلەرگە 12,6 پايىزبەن نەسيە بەرىلۋى مۇمكىن

استانا. KAZINFORM - قازاقستان حالىق كەڭەسىندە شاعىن جانە ورتا بيزنەستى قولداۋ شارالارىن كەڭەيتۋ ماسەلەسى تالقىلاندى. جيىندا كاسىپكەرلەرگە جىلدىق 12,6 پايىز مولشەرلەمەمەن تىكەلەي نەسيە بەرۋ جانە مەملەكەتتىك قولداۋدى اۋىلداعى شاعىن بيزنەسكە قولجەتىمدى ەتۋ ۇسىنىلدى.

ا
Фото: Халық кеңесі

قازاقستان حالىق كەڭەسىندە نۇرتاي سابيليانوۆتىڭ توراعالىعىمەن وڭىرلىك دامۋ جانە كاسىپكەرلىكتى قولداۋ جونىندەگى كوميسسيانىڭ وتىرىسى ءوتتى. مەملەكەت باسشىسى قاسىم-جومارت توقايەۆتىڭ «جاڭا تاريحي كەزەڭىندەگى قازاقستاننىڭ وزەكتى مىندەتتەرى» اتتى جولداۋىندا ايقىندالعان مىندەتتەردى ىسكە اسىرۋ اياسىندا قاتىسۋشىلار شاعىن جانە ورتا بيزنەستى دامىتۋعا قولايلى جاعدايلار جاساۋ جانە مەملەكەتتىك ساياساتتى جەتىلدىرۋ جونىندەگى ۇسىنىستاردى قاراستىردى.

وتىرىسقا وڭىرلىك دامۋ جانە جەرگىلىكتى ءوزىن-ءوزى باسقارۋ كوميتەتىنىڭ باسشىسى تابيعات زەينۇلقابدەن، سونداي-اق ورتالىق مەملەكەتتىك ورگاندار مەن قارجى ينستيتۋتتارىنىڭ وكىلدەرى قاتىستى.

جيىن بارىسىندا شاعىن جانە ورتا بيزنەستىڭ بۇگىنگى جۇمىس ىستەۋ جاعدايى جانە ونىڭ دامۋىنا كەدەرگى كەلتىرەتىن ماسەلەلەر تالقىلاندى. قاتىسۋشىلار كرەديتتەردىڭ قولجەتىمدىلىگىن ارتتىرۋ، مەملەكەتتىك باعدارلامالاردىڭ تيىمدىلىگىن كۇشەيتۋ، سالىقتىق اكىمشىلەندىرۋدى جەتىلدىرۋ جانە وڭىرلەردەگى ىسكەرلىك بەلسەندىلىكتى جانداندىرۋ جولدارىن قاراستىردى.

نۇرتاي سابيليانوۆ شاعىن جانە ورتا بيزنەس - ەكونوميكانىڭ نەگىزگى قوزعاۋشى كۇشتەرىنىڭ ءبىرى ەكەنىن اتاپ ءوتتى. ۇلتتىق ستاتيستيكا بيۋروسىنىڭ مالىمەتىنشە، ەلىمىزدە 2 ميلليونعا جۋىق شوب سۋبەكتىسى جۇمىس ىستەيدى، وندا 4 ميلليونعا جۋىق ادام ەڭبەك ەتەدى. ال 2026-جىلدىڭ ءبىرىنشى جارتىجىلدىعىندا ولاردىڭ جالپى ىشكى ونىمدەگى ۇلەسى 40,4 پايىزعا جەتكەن. سونىمەن قاتار بۇگىنگى تاڭدا بيزنەستىڭ دامۋىنا جوعارى پايىزدىق مولشەرلەمەمەن بەرىلەتىن كرەديتتەر، كەپىلزاتتىڭ جەتكىلىكسىزدىگى، اكىمشىلىك كەدەرگىلەر جانە وڭىرلەردەگى ينفراقۇرىلىمنىڭ السىزدىگى ءالى دە توسقاۋىل بولىپ وتىر. وسىعان بايلانىستى ول مەملەكەتتىك ورگاندار مەن دامۋ ينستيتۋتتارىن ەسەپ بەرۋمەن شەكتەلمەي، اتالعان ماسەلەلەردى شەشۋگە باعىتتالعان ناقتى ۇسىنىستار ازىرلەۋگە شاقىردى.

باستاپقى كاسىپكەرلەر مەن جەرگىلىكتى وندىرۋشىلەرگە قولداۋ كورسەتۋدىڭ ناقتى قۇرالدارى تۋرالى ق ر ۇلتتىق ەكونوميكا مينيسترلىگى دەپارتامەنتىنىڭ ديرەكتورىنىڭ مىندەتىن اتقارۋشى دينارا تاجەنوۆا باياندادى. «دامۋ» قورىمەن جانە «اتامەكەن» ۇ ك پ- مەن بىرلەسىپ، ۆەدومستۆو كاسىپكەرلەرگە كونسۋلتاتسيالىق كومەك كورسەتىپ، ء«بىر اۋىل - ءبىر ءونىم» جانە «ىسكەر ايماق» وڭىرلىك باستامالارىن ىلگەرىلەتىپ وتىر.

«دامۋ» قورىنىڭ وكىلى بولات ەسماعامبەتوۆ پەن «اتامەكەن» ۇ ك پ باسقارۋشى ديرەكتورى كسەنيا سەمەنچۋك قارجىلىق جانە قارجىلىق ەمەس قولداۋ كورسەتۋ تەتىكتەرىن ءتۇسىندىرىپ، الەۋمەتتىك كاسىپكەرلەرگە ارنالعان جەڭىلدىكتەرگە جەكە توقتالدى. كسەنيا سەمەنچۋكتىڭ ايتۋىنشا، «ىسكەر ايماق» باعدارلاماسى اۋىلدار مەن شاعىن قالالاردى دامىتۋعا باعىتتالعان جانە ناقتى وڭىرلىك قاجەتتىلىكتەردى ەسكەرە وتىرىپ جۇزەگە اسىرىلادى.

سونداي-اق كاسىپكەرلەرگە ارنالعان سيفرلىق جوبالارعا ەرەكشە قىزىعۋشىلىق تانىتىلدى. ولاردىڭ قاتارىندا قولونەرشىلەرگە ارنالعان Sheber پلاتفورماسى، BusinessGO سەرۆيسى جانە ساۋدا نىساندارىنا ارنالعان SaudaHub جۇيەسى بار.

تالقىلاۋ قورىتىندىسى بويىنشا تاراپتار قولداۋ شارالارىنىڭ قولجەتىمدىلىگى مەن اشىقتىعىن ارتتىرۋعا باعىتتالعان ءبىرقاتار ناقتى ۇسىنىستارىن ورتاعا سالدى. قاتىسۋشىلار، ەڭ الدىمەن، اۋىلدىق جەرلەردە جانە ساۋدا سالاسىندا ەڭبەك ەتەتىن ءوزىن-ءوزى جۇمىسپەن قامتىعان ازاماتتار اراسىندا اقپاراتتىق-ءتۇسىندىرۋ جۇمىستارىن كۇشەيتۋ قاجەت دەگەن ورتاق پىكىرگە كەلدى. تسيفرلىق داعدىلاردىڭ جەتكىلىكسىزدىگى سالدارىنان كوپتەگەن ءىسىن جاڭادان باستاعان كاسىپكەرلەر وزدەرىنە تيەسىلى جەڭىلدىكتەر مەن قولداۋ باعدارلامالارى تۋرالى بىلە بەرمەيدى.

ءوز كەزەگىندە نۇرتاي سابيليانوۆ مەملەكەت جىل سايىن تەك جاقسى نەسيەلىك تاريحى بار ءبىر زاەمشىلاردى عانا قولداۋمەن شەكتەلمەۋى كەرەكتىگىن اتاپ ءوتتى. قولداۋ اياسىن كەڭەيتىپ، باستاپقى كومەككە مۇقتاج بارلىق كاسىپكەرلەرگە، اسىرەسە اۋىلدىق جەرلەردەگى ميكرو جانە شاعىن بيزنەس جوبالارىنا ناقتى مۇمكىندىك بەرۋ ماڭىزدى. وسىعان بايلانىستى وتىرىستا سۋبسيديالاۋدان بىرتىندەپ باس تارتىپ، قولجەتىمدى تىكەلەي كرەديتتەۋگە كوشۋ تۋرالى ۇسىنىس تا ايتىلدى. جىلدىق مولشەرلەمە 12,6 پايىز دەڭگەيىندە بولعاننىڭ وزىندە، مۇنداي تەتىك كاسىپكەرلەردىڭ الدەقايدا كەڭ اۋقىمىن قامتۋعا مۇمكىندىك بەرەدى.

جيىندا كوميسسيا مۇشەلەرى قارجى مينيسترلىگىنىڭ وكىلدەرىنە Baqylauda سيفرلىق مونيتورينگ پلاتفورماسىنىڭ جۇمىسىنا قاتىستى ساۋالدارىن قويدى. حالىق كەڭەسىنىڭ مۇشەلەرى مەن ساراپشىلار دەرەكتەردى ينتەگراتسيالاۋ جۇمىستارىنىڭ قازىرگى كەزەڭى جانە جۇيەنىڭ تولىققاندى ناتيجەلەرىن قاشان كورسەتەتىنى جونىندە سۇرادى. پلاتفورما، ەڭ الدىمەن، ازاماتتار ءۇشىن قولايلى ءارى اشىق بولۋى ءتيىس ەكەنى اتاپ ءوتىلدى. ول بولىنگەن بيۋدجەت قاراجاتىنىڭ قانشالىقتى ءتيىمدى يگەرىلىپ جاتقانىن جانە ونىڭ ۇلتتىق ەكونوميكاعا قانداي ناقتى پايدا اكەلەتىنىن كورنەكى تۇردە كورسەتۋى قاجەت.

سونىمەن قاتار پرەزيدەنت جولداۋىندا قويىلعان مىندەتتەر اياسىندا قاتىسۋشىلار بيزنەستىڭ قىزمەتىنە مەملەكەتتىك باقىلاۋ جۇرگىزۋ جانە مونيتورينگ جاساۋ ماسەلەسىن دە كوتەردى. نۇرتاي سابيليانوۆ بۇل ماسەلەنى جان- جاقتى زەردەلەپ، وتكەن جىلدارداعى تاجىريبەنى تالداۋ جانە سالىستىرمالى ءتاسىل نەگىزىندە بايىپپەن قاراستىرۋ قاجەتتىگىن اتاپ ءوتتى. ونىڭ ايتۋىنشا، باقىلاۋ شارالارىن ۇيىمداستىرۋ كەزىندە دەنساۋلىق ساقتاۋ جانە ۇلتتىق قاۋىپسىزدىك سياقتى ستراتەگيالىق ماڭىزى بار سالالاردىڭ ەرەكشەلىكتەرى مىندەتتى تۇردە ەسكەرىلۋى ءتيىس. الايدا بيزنەستى شەكسىز تەكسەرۋگە جول بەرۋگە بولمايدى. بۇل رەتتە بارلىق شەشىمدەر وبەكتيۆتىلىك قاعيداتىنا نەگىزدەلۋى قاجەت.

بىرلەسكەن جۇمىستى ودان ءارى جالعاستىرۋ جونىندەگى ۇسىنىستارى مەن ءوز كوزقاراستارىن اۋىل شارۋاشىلىعى، قارجى مينيسترلىكتەرىنىڭ وكىلدەرى جانە باسقا دا قاتىسۋشىلار ورتاعا سالدى. پىكىر الماسۋ قورىتىندىسى بويىنشا قاتىسۋشىلار بيزنەستى مەملەكەتتىك قولداۋ ساياساتىن جەتىلدىرۋگە باعىتتالعان پراكتيكالىق ۇسىنىمدار كەشەنىن ازىرلەدى.

ۇسىنىستار مەملەكەتتىك باعدارلامالاردىڭ تيىمدىلىگىن ارتتىرۋعا، اكىمشىلىك جۇكتەمەنى ازايتۋعا جانە شاعىن جانە ورتا كاسىپكەرلىكتىڭ تۇراقتى دامۋى ءۇشىن جاڭا مۇمكىندىكتەر قالىپتاستىرۋعا باعىتتالعان. قورىتىندى قۇجاتتى بەيىندى كوميتەتتىڭ قاراۋىنا ەنگىزۋ جوسپارلانىپ وتىر.

ايتا كەتەيىك، بۇعان دەيىن قۇرىلتاي دەپۋتاتتارى ەكى اپتادا 18 مىڭعا جۋىق اداممەن كەزدەسىپ، ءبىرقاتار ماڭىزدى تاقىرىپ كوتەرگەنىن جازدىق.