كاسىپكەر ايەلدەرگە بيزنەستى دامىتۋ جولدارى ۇيرەتىلدى

кәсіпкер әйелдер
Фото: Алма Мұқанова

الماتى. KAZINFORM - ەۋروپالىق قايتا قۇرۋ جانە دامۋ بانكى (ە ق د ب) قازاقستان ۇكىمەتىنىڭ قولداۋىمەن «ايەلدەر ميكروبيزنەستە» وقىتۋ باعدارلاماسىنا قاتىسۋعا ءوتىنىم قابىلداۋدى باستادى.

بۇل جوبا بيزنەسىن دامىتۋعا ۇمتىلاتىن جانە ءارتۇرلى الەۋمەتتىك نەمەسە ەكونوميكالىق كەدەرگىلەرگە تاپ بولاتىن كاسىپكەرلەر ءۇشىن ارنايى جاسالعان.

قازاقستانداعى ە ق د ب شاعىن جانە ورتا بيزنەستى دامىتۋ باعدارلاماسىنىڭ باسشىسى الما قاسىموۆانىڭ ايتۋىنشا، قازاقستانداعى شاعىن جانە ورتا بيزنەس سەكتورىنداعى كاسىپورىنداردىڭ 49 پايىزىن ايەلدەر باسقارادى. الايدا، ورتا جانە ءىرى بيزنەستە ولاردىڭ ۇلەسى ايتارلىقتاي تومەن - سايكەسىنشە 36 پايىز جانە 19 پايىز.

«ءبىزدىڭ باستى ماقساتىمىز، ميسسيامىز - قولجەتىمدى جانە ساپالى وقىتۋ ارقىلى ايەلدەر باسقاراتىن شاعىن كاسىپورىندارعا ءوسۋ مۇمكىندىگىن بەرۋ»، - دەپ اتاپ ءوتتى الما قاسىموۆا.

وقىتۋ قازاق جانە ورىس تىلدەرىندە ونلاين-فورماتتا 5 اي بويى وتەدى. قاتىسۋشىلار وقۋدى كەز كەلگەن ۋاقىتتا باعدارلاما اياسىندا باستاي الادى. كۋرس بيزنەستىڭ نەگىزگى اسپەكتىلەرىن قامتيتىن 6 مودۋلدەن تۇرادى: ماركەتينگ، ساتۋ، قارجى، جەكە باسقارۋ، وپەراتسيالىق باسقارۋ، ستراتەگيا، اۆتوماتتاندىرۋ جانە جاساندى ينتەللەكت.

اتالمىش باعدارلاما قازاقستاندا ءۇشىنشى رەت وتكىزىلىپ جاتىر. الدىڭعى جوبالار 1500 گە جۋىق كاسىپكەر ايەلگە ءوز داعدىلارىن نىعايتۋعا جانە بيزنەستەرىن جاقسارتۋعا مۇمكىندىك بەردى.

جوبانى «ديالوگ» ترەنينگ جانە كونسالتينگ كومپانياسى جۇزەگە اسىرادى.

«باعدارلاماعا وتىنىمدەردى قابىلداۋ قازىرگى ۋاقىتتا اشىق جانە ءبىز ءوز كاسىپورىندارىن دامىتقىسى كەلەتىن ايەلدەردى باستاماعا قوسىلۋعا جانە جاڭا ءبىلىم مەن داعدىلاردى يگەرۋ مۇمكىندىگىن پايدالانۋعا شاقىرامىز. تىركەلۋ جانە تولىق اقپارات پلاتفورما سايتىندا»، - دەدى سپيكەر.

سوڭعى جاڭالىقتار