كاسپيدىڭ تايازدانۋىن تەجەۋ ءۇشىن قانداي جۇمىستار جۇرگىزىلىپ جاتىر
استانا. KAZINFORM - كاسپي تەڭىزىندەگى سۋ دەڭگەيىنىڭ اۋىتقۋىن زەرتتەيتىن ساراپشىلاردىڭ جۇمىس توبىنا قازاقستان تاراپىنان قاتىساتىن قۇرام جاساقتالىپ جاتىر.

بۇل تۋرالى Kazinform ساۋالىنا ق ر سۋ رەسۋرستارى جانە يرريگاتسيا مينيسترلىگىنىڭ رەسمي جاۋابىندا ايتىلدى.
ۆەدومستۆو مالىمەتىنشە، كاسپيدەگى احۋالدى جاعاسىنداعى مەملەكەتتەر ءجىتى قاداعالاپ وتىر.
- كاسپي تەڭىزىندەگى سۋ كولەمى مەن قالىپتى جاعدايى كاسپيي ماڭى مەملەكەتتەرىنىڭ باقىلاۋىندا. جاعداي كاسپي تەڭىزىن قورعاۋ جونىندەگى نەگىزدەمەلىك كونۆەنتسيا (تەگەران كونۆەنتسياسى) شەڭبەرىندەگى سامميتتەر مەن وتىرىستاردا قارالادى. تەگەران كونۆەنتسياسىنىڭ تاراپتارى - قازاقستان رەسپۋبليكاسى، ازەربايجان رەسپۋبليكاسى، يران يسلام رەسپۋبليكاسى، رەسەي فەدەراتسياسى جانە تۇرىكمەنستان. 2024 - جىلعى 18- قاراشادا باكۋ قالاسىندا سور29 - سامميتى اياسىندا ازەربايجان تاراپىنىڭ توراعالىعىمەن «كليماتتىڭ وزگەرۋى جاعدايىندا كاسپي تەڭىزى دەڭگەيىنىڭ تومەندەۋى» تاقىرىبىندا ءىس- شارا ءوتتى. تالقىلاۋ بارىسىندا كاسپي تەڭىزى دەڭگەيىنىڭ تومەندەۋ ماسەلەسىن شۇعىل شەشۋ، ەكولوگيالىق داعدارىستىڭ سالدارىن جەڭىلدەتۋگە ارنالعان ءتيىمدى جول كارتاسىن ازىرلەۋ جانە ىسكە اسىرۋ ءۇشىن ب ۇ ۇ جۇيەسى اياسىندا وڭىرلىك ىنتىماقتاستىقتى كەڭەيتىپ، سەرىكتەستىك قاتىناستاردى نىعايتۋ سياقتى تۇجىرىمدار جاسالدى، - دەلىنگەن حابارلامادا.
سونداي-اق ازەربايجان تاراپىنىڭ باستاماسىمەن كاسپي تەڭىزىنىڭ تايازدانۋى ماسەلەسىن كاسىبي ماماندارمەن بىرگە تالقىلاۋ ماسەلەسى كوتەرىلگەن.
- كاسپي تەڭىزىنىڭ تايازدانۋى بويىنشا بەسجاقتى فورماتتا تالقىلاۋدى كاسپيي تەڭىزى سۋ دەڭگەيىنىڭ اۋىتقۋىن زەرتتەۋ بويىنشا ساراپشىلار جۇمىس توبىنىڭ الاڭىندا جۇرگىزۋ ۇسىنىلدى. قازىرگى ۋاقىتتا قازاقستان تاراپىنان وسى جۇمىس توبىنا قاتىساتىن قۇرام قالىپتاستىرىلۋدا. سونداي- اق، بۇل ماسەلەلەر ۇلتتىق دەڭگەيدە «كاسپي تەڭىزىنىڭ قازاق عىلىمي- زەرتتەۋ ينستيتۋتى» ارقىلى قاجەتتى ماماندار مەن ساراپشىلاردى تارتا وتىرىپ، قاراستىرىلاتىن بولادى، - دەلىنگەن جاۋاپتا.
ماماندار كاسپي سۋى 2006 - جىلدان بەرى 2 مەتردەي تومەندەگەنىن ايتادى. وعان ەدىل جانە جايىق وزەندەرىنىڭ جوعارعى اعىستارىندا سالىنعان سۋ قويمالارىنىڭ اسەرى بارى ايتىلىپ ءجۇر. سوندىقتان دا بۇل 5 مەملەكەت بىرلەسە وتىرىپ تالقىلايتىن، شەشەتىن ماسەلە.
ەسكە سالا كەتەيىك، بۇعان دەيىن كاسپي تەڭىزى جاعالاۋدان الىستاپ بارا جاتقانى تۋرالى جازعان ەدىك.