كاسپيدىڭ تايازدانۋى ماسەلەسى قالاي شەشىلەدى - نۇرلان نوعايەۆ

 ماڭعىستاۋ وبلىسىنىڭ اكىمى نۇرلان نوعايەۆ ەلوردادا ەسەپتىك بريفينگتە كاسپي تەڭىزىنىڭ تارتىلۋىنىڭ سەبەپتەرى مەن شەشۋ جولدارىن ايتتى، دەپ حابارلايدى Kazinform.

«سۋ قورلارىنىڭ تارتىلۋىن الەمدىك ءۇردىس دەپ ەسەپتەيمىز. بايقاپ قاراساڭىزدار، باسقا ەلدەردە دە سارقىراپ جاتقان وزەن- كولدەر تارتىلىپ، كەۋىپ جاتىر. سونىڭ اسەرى بىزگە دە ءتيىپ وتىر. كاسپي تەڭىزى دە قازىر تايازداپ بارادى. وسىنى ەسكەرە وتىرىپ، مەملەكەت باسشىسى كاسپي تەڭىزىنىڭ پروبلەمالارىمەن اينالىساتىن عىلىمي- زەرتتەۋ ينستيتۋىن قۇرۋ جونىندە تاپسىرما بەردى. بۇل ينستيتۋت سۋ رەسۋرستارى مينيسترلىگى جانىنان قۇرىلدى. كاسپيدىڭ تايازدانۋى تەڭىز جاعاسىندا تۇراتىن ماڭعىستاۋلىقتاردى عانا ەمەس، بۇكىل قازاقستاندى تولعاندىرادى»، - دەدى ن. نوعايەۆ ورتالىق كوممۋنيكاتسيالار قىزمەتىندە.

وبلىس اكىمى بۇل ماسەلەنىڭ عىلىمي نەگىزبەن شەشىلۋىن قامتاماسىز ەتەتىنىن جانە ونىمەن ارنايى ينستيتۋت اينالىساتىنىن جەتكىزدى.

«حالىقارالىق دەڭگەيدە اتقارىلىپ جاتقان ىستەر مەن قابىلدانعان شارالار، قۇقىقتىق- نورماتيۆتىك اكتىلەر قابىلداۋ جونىندەگى ماسەلەلەر جانە كاسپيي تەڭىزىندەگى جانۋارلاردى، بالىقتاردى جانە باسقا دا فلورا مەن فاۋنانى ساقتاۋ ماسەلەلەرىمەن تىڭعىلىقتى وسى ينستيتۋت اينالىسادى. بۇل ۋاقىتتىڭ ەنشىسىندەگى ماسەلە»، - دەيدى ءوڭىر باسشىسى.