كاسپيدە قىرىلعان يتبالىقتاردىڭ ءولىمىنىڭ سەبەبى نەدە

итбалық
Фото: Балық шаруашылығы комитеті

اقتاۋ. KAZINFORM - ءساۋىر ايىنىڭ باسىندا كاسپي تەڭىزىندە قىرىلعان يتبالىقتاردى زەرتتەۋ بويىنشا جاۋاپتى تاراپ مالىمەت تاراتتى.

ماڭعىستاۋ وبلىستىق ەكولوگيا دەپارتامەنتى 29-ناۋرىز بەن 8-ءساۋىر ارالىعىندا جۇزدەن استام تەڭىز جانۋارى بەلگىسىز جاعدايدا قىرىلعان سوڭ ءتيىستى سىنامالاردىڭ زەرتحاناعا جىبەرىلگەنىن اتادى. الايدا يتبالىقتاردىڭ ولىمىنە ناقتى قانداي جاعدايدىڭ سەبەپ بولعانى ازىرگە انىقتالماي وتىر.

«ناۋرىز ايىنىڭ سوڭى مەن ءساۋىر ايىنىڭ باسىندا ءتۇپقاراعان اۋدانى اۋماعىنداعى كاسپي تەڭىزىنىڭ جاعالاۋىنان 78 ءولى يتبالىق ۇشاسى تابىلدى. وسىعان قاتىستى ماڭعىستاۋ وبلىسىنىڭ ەكولوگيا دەپارتامەنتى سۋ سىنامالارىن الىپ، ۆەتەريناريالىق ستانسيا مەن گيدروبيولوگيا جانە ەكولوگيا ينستيتۋتىنىڭ قىزمەتكەرلەرى ىشكى اعزالاردىڭ تىندەرىن (باۋىر، وكپە) ءىشىنارا ىرىكتەدى. ال كاسپي يتبالىعىن زەرتتەۋ جانە وڭالتۋ ورتالىعى ءتيىستى زەرتحانالىق زەرتتەۋلەر جۇرگىزۋ ءۇشىن ازۋ، تىرناق جانە ءجۇن سىنامالارىن الدى. بۇگىنگى كۇنى زەرتحانالىق زەرتتەۋلەر ءالى جالعاسىپ جاتىر»، - دەدى ەكولوگيا دەپارتامەنتىنىڭ ماماندارى.

سونىمەن قاتار، ءساۋىر ايىنىڭ 8-كۇنى اتالعان اۋماقتان تاعى 25 يتبالىقتىڭ ولەكسەسى تابىلعان بولاتىن.

«قولدانىستاعى ءوزارا ءىس-قيمىل سحەماسىنا سايكەس جۇمىس توبىنىڭ بارلىق مۇشەلەرىنە جەدەل تۇردە حابارلانىپ وتىر. بۇگىنگى تاڭدا تابىلعان قىرىلعان يتبالىقتاردىڭ جالپى سانى 103 باستى قۇرادى. كاسپي تەڭىزىنىڭ جاعالاۋ ايماعىنا مونيتورينگ جۇرگىزۋ جۇمىستارى تۇراقتى جالعاسۋدا»، - دەدى دەپارتامەنت وكىلدەرى.

وتكەندە ايدىڭ سوڭىندا ماڭعىستاۋدا تەڭىز جاعاسىنان قىرىقتان استام يتبالىقتىڭ ولەكسەسى تابىلدى.

كەيىن ولاردىڭ سانى كوبەيىپ، ءتيىستى ورىندار 80 گە جۋىقتاعانىن اتادى. سوڭعى رەت دەپارتامەنت ماماندارى تەڭىز جاعالاۋىنا شىعىپ قالعان جۇزدەن استام تەڭىز جانۋارى تىركەلگەنى حابارلادى.

وسىدان كەيىن جەرگىلىكتى اكىمدىك يتبالىق ۇشالارىن جيناپ، جويۋ جۇمىستارىن جۇرگىزگەن.

سوڭعى جاڭالىقتار