كاسپيدە قىرىلعان يتبالىقتار سانى 100 دەن اسىپ جىعىلدى
اقتاۋ. KAZINFORM - ماڭعىستاۋ وبلىسىندا كاسپي تەڭىزىنىڭ جاعالاۋىنان تابىلعان يتبالىق ولەكسەلەرىنىڭ سانى 103 كە جەتتى.
بالىق ينسپەكتسياسىنىڭ قىزمەتكەرلەرى جاعالاۋدى قاراۋ كەزىندە 25 يتبالىق ولەكسەسىن تاپقانىن مالىمدەپ وتىر.
«جۇمىس توبىنىڭ قۇرامىنا كىرەتىن جەرگىلىكتى اتقارۋشى ورگاندار، مامانداندىرىلعان عىلىمي ۇيىمدار، كاسپي يتبالىعىن زەرتتەۋ جانە وڭالتۋ ورتالىعى، گيدروبيولوگيا جانە ەكولوگيا ينستيتۋتى، قازاقستاندىق قولدانبالى ەكولوگيا اگەنتتىگى، ميكروبيولوگيا جانە ۆيرۋسولوگيا عىلىمي-وندىرىستىك ورتالىعى، وبلىستىڭ ۆەتەريناريالىق قىزمەتى، ەكولوگيا جانە پوليتسيا دەپارتامەنتتەرى، تابيعات قورعاۋ پروكۋراتۋراسى اتالعان جاعداي جونىندە جەدەل حاباردار ەتىلدى. ينسپەكتسيا مەن جەرگىلىكتى اتقارۋشى ورگان وكىلدەرىنەن تۇراتىن جۇمىس توبى يتبالىق تابىلعان ورىنعا شىقتى. بۇگىنگى تاڭدا تابىلعان ءولى يتبالىقتاردىڭ جالپى سانى 103 ۇشاعا ءوتتى»، - دەدى بالىق ينسپەكتسياسىنىڭ وكىلدەرى.
29-ناۋرىز بەن 1-ءساۋىر ارالىعىندا ءتۇپقاراعان اۋدانىندا كاسپي تەڭىزىنىڭ جاعالاۋىنا مونيتورينگ جۇرگىزۋ كەزىندە 78 ءولى يتبالىق ۇشاسى تابىلعان بولاتىن.
كەيىن ماڭعىستاۋ وبلىسىنىڭ ەكولوگيا دەپارتامەنتى اتالعان اۋماقتان سۋ سىناماسىن الىپ، ۆەتەريناريالىق ستانتسيا مەن گيدروبيولوگيا جانە ەكولوگيا ينستيتۋتىنىڭ قىزمەتكەرلەرى ىشكى اعزالاردىڭ ءتىنىن (باۋىر، وكپە) ءىشىنارا ىرىكتەدى.
سونداي-اق، كاسپي يتبالىعىن زەرتتەۋ جانە وڭالتۋ ورتالىعى ءتيىستى زەرتحانالىق زەرتتەۋلەر جۇرگىزۋ ءۇشىن ازۋ، تىرناق جانە ءجۇن سىنامالارىن زەرتحانالىق زەرتتەۋ جۇرگىزۋگە جىبەردى.
