كاسپيدە قاتىنايتىن كرۋيز لاينەرى قانداي پورتتارعا توقتايدى

استانا. قازاقپارات 2025-جىلدىڭ اقپان-ناۋرىز ايلارىندا كاسپيدە كرۋيز لاينەرى تولىققاندى جۇرە باستايدى. بۇل تۋرالى تۋريزم جانە سپورت مينيسترلىگىنەن ءمالىم ەتتى.

«ءوڭىردىڭ تۋريستىك الەۋەتىن دامىتۋعا رەسەيلىك „ۆلاديمير جيرينوۆسكي“ (2024 -جىلدىڭ باسىندا اتاۋى وزگەرتىلگەن، بۇرىن „ۇلى پەتر“ دەپ اتالعان) كرۋيز لاينەرىنىڭ پايدالانۋعا بەرىلۋى وڭ اسەر ەتەدى. استراحان وبلىسى مادەنيەت جانە تۋريزم مينيسترلىگىنىڭ اقپاراتى بويىنشا „لوتوس“ استراحان كەمە جاساۋ زاۋىتىندا جاسالىپ جاتقان لاينەر 2024 -جىلدىڭ سوڭىنا دەيىن (قاراشا- جەلتوقسان) تولىعىمەن تاپسىرىلىپ، قولدانىسقا بەرىلۋى كەرەك. لاينەر „سۋداعى بەس جۇلدىزدى قوناق ءۇي“ تۇجىرىمداماسىنا سايكەس كەلەدى. پايدالانۋعا بەرۋ اكىسىن 2025 -جىلدىڭ باسىندا الامىز»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.

ۆەدومستۆو مالىمەتىنشە، 2025 -جىلدىڭ اقپان-ناۋرىز ايلارىندا لاينەر كاسپيدە تولىققاندى جۇرە باستايدى.

«لاينەردىڭ بولجامدى كىرۋ پورتتارى: استراحان (رەسەي)، اقتاۋ (قازاقستان)، تۇرىكمەنباشى (تۇرىكمەنستان)، اميراباد، نوۋشەحر، ەنزەلي پورتى (يران يسلام رەسپۋبليكاسى)، باكۋ (ازەربايجان رەسپۋبليكاسى)، ماحاچكالا (رەسەي). جالپى، لاينەردى پايدالانۋ اياسىندا „اقتاۋ تەڭىز ساۋدا پورتى“ ۇ ك» ا ق جەلىسى بويىنشا ءتيىستى دايىندىق جۇمىستارى جۇرگىزىلىپ جاتىر. لاينەر ەلىمىزگە كەلەتىن تۋريستەر اعىنىن ارتتىرۋعا جانە تۋريزم سالاسىندا قىزمەت كورسەتەتىن جەرگىلىكتى كومپانيالاردىڭ ودان ءارى دامۋىنا وڭ اسەرىن تيگىزەدى»، - دەدى مينيسترلىكتەن.