كاسپي يتبالىقتارىنىڭ قىرىلۋىنا قاشان كەنىشىندەگى جوبانىڭ قاتىسى بار ما - مينيستر جاۋابى

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ءماجىلىس كۋلۋارىندا كاسپي يتبالىقتارىنىڭ قىرلۋى تۋرالى پىكىر ءبىلدىردى.

«ءيا، 298 دەي باس يتبالىقتىڭ ولىگى تابىلدى. قازىرگى كەزدە دەنەسىنەن كەرەكتى ماتەريالدىڭ ءبارىن الىپ، بۇگىن سول زەرتتەۋ جۇمىستارى ءجۇرىپ جاتىر. ءبىز ءوز جاعىمىزدان سول يتبالىقتاردىڭ تابىلعان جەرىنەن جاعالاۋداعى سۋ سىنامالارىن الدىق. جاقىن ارادا ناتيجەسى شىعادى. سوسىن بىلەمىز، سەبەبى نەدە ەكەنىن. ازىرگە ءبارى لابوراتوريالىق زەرتتەۋدە»، - دەدى مينيستر.

«كاسپيدەگى يتبالىقتاردىڭ قىرىلۋى قاشاعان كەن ورنىنداعى جوبا باستالعالى جيىلەپ كەتتى دەيتىن پىكىرلەر بار. ونداي نۇسقانى قاراپ جاتىرسىزدار ما؟» - دەپ سۇرادى جۋرناليست.

ءمينيستردىڭ سوزىنشە، ازىرگە ونداي نۇسقا قارالىپ جاتقان جوق.

«ولاي تىكە ايتۋعا بولمايدى. ءبارىن اناليز كورسەتەدى. سۋدىڭ اناليزى بار، بۇل جولى دەنەسىنە، اسقازانىنا، تىرناقتارىنا دەيىن ءبارىن الىپ كەتتى. دۇرىستاپ قارايمىز. مەن قازىر ونداي ۆەرسيانى ايتا المايمىن. ۆەرسيا كوپ قوي. ناقتى اناليز شىققاننان كەيىن عانا ايتا الامىز»، - دەدى ەرلان نىسانبايەۆ.

ەسكە سالا كەتەيىك، بۇعان دەيىن ماڭعىستاۋدا يتبالىقتارمەن قوسا بەكىرە تۇقىمداس بالىقتار مەن سۋ قۇستارى دا قىرىلىپ جاتقانىن حابارلاعان بولاتىنبىز.