كاسپي تەڭىزىنىڭ دەڭگەيى 119 سانتيمەتىرگە كوتەرىلدى
استانا. KAZINFORM- بيىل كاسپي تەڭىزىنىڭ سولتۇستىك- شىعىس بولىگىنىڭ (اتىراۋ وبلىسى) دەڭگەيى 119 س م-گە كوتەرىلدى، دەپ حابارلايدى ق ر سۋ رەسۋرستارى جانە يرريگاتسيا مينيسترلىگىنىڭ باسپا ءسوز قىزمەتى.
باسپاسوز قىزمەتىنىڭ مالىمەتتەرىنە قاراعاندا، ءساۋىر-مامىر ايلارىندا جايىق وزەنى ارقىلى تاسقىن سۋىنىڭ مول كەلۋى، سونداي- اق سۋ رەسۋرستارى جانە يرريگاتسيا مينيسترلىگى مەن جەرگىلىكتى اكىمدىك بىرلەسىپ سالعان قوسىمشا ارنالار ءتيىمدى اسەر ەتتى.
ەستەرىڭىزگە سالا كەتەيىك، سۋ تاسقىنى كەزىندە كاسپي تەڭىزىنە جايىق وزەنى ارقىلى شامامەن 7,4 ميلليارد تەكشە مەتر سۋ جىبەرىلدى. تاسقىن سۋىن تەڭىزگە وتكىزۋ ءۇشىن اتىراۋ وبلىسى بويىنشا «قازسۋشار» فيليالى قوسىمشا كانالداردى پايدالاندى. ول ارنالار ارقىلى كاسپييگە 350 ميلليون تەكشە مەتر سۋ كەلدى.
«قازسۋشار» ماماندارى ارنالاردىڭ بارلىعىندا تازارتۋ، نىعايتۋ جانە باسقا دا جۇمىستار جۇرگىزدى. مىسالى، «سوكولوك» كانالىنىڭ بويىندا ۇزىندىعى 14,5 شاقىرىم بولاتىن قوسىمشا كانال قازىلدى، ول ارقىلى تاسقىن سۋى كاسپيگە جىبەرىلدى.
«تاسقىن سۋى تەك سۋ قويمالارىنا جينالىپ قانا قويماي، 12,4 ميلليارد تەكشە مەتر سۋ توعاندارعا، ليماندار مەن تابيعي شابىندىقتارعا جىبەرىلدى. سۋ تاسقىنى باستالعاننان بەرى بالقاش كولىنە 3,3 ميلليارد تەكشە مەتر سۋ جىبەرىلدى. سونىمەن قاتار، سولتۇستىك ارالعا سۋ جىبەرۋ جۇمىسى جالعاسىپ جاتىر. جىل باسىنان تەڭىزگە 1,1 ميلليارد تەكشە مەتردەن استام سۋ كەلدى»، - دەدى سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ.
