كاسپي تەڭىزىندە جوعالعان ەكى اسكەري قىزمەتشىنىڭ دەنەسى تابىلدى: ىزدەستىرۋ وپەراتسياسى اياقتالدى
استانا. KAZINFORM - كاسپي تەڭىزى اكۆاتورياسىندا جۇرگىزىلگەن ىزدەستىرۋ- قۇتقارۋ وپەراتسياسى اياقتالدى. بۇل تۋرالى قورعانىس مينيسترلىگىنىڭ باسپا ءسوز قىزمەتى حابارلادى.
بۇگىن، 25-قىركۇيەكتە، ساعات 9:15 شاماسىندا ۇزدىكسىز جۇرگىزىلگەن ىزدەستىرۋ- قۇتقارۋ جۇمىستارى بارىسىندا بۇعان دەيىن ءىز-ءتۇزسىز جوعالعان ەكى اسكەري قىزمەتشىنىڭ - سەرجانت مانسۇر گۋماروۆ پەن ماتروس ميراس تۇردىبەك ۇلىنىڭ دەنەلەرى تابىلدى.
ەسكە سالايىق، قايعىلى وقيعا وقۋ-جاۋىنگەرلىك مىندەتتى ورىنداۋ بارىسىندا اۋا رايىنىڭ كەنەتتەن كۇرت ناشارلاۋىنان ورىن الىپ، ناتيجەسىندە 17 اسكەري قىزمەتشىنى اشىق تەڭىزگە الىپ كەتكەن بولاتىن. ولاردىڭ ۇشەۋى قۇتقارىلىپ، 14 اسكەري قىزمەتشى قازا تاپتى.
- قازاقستان رەسپۋبليكاسى قورعانىس مينيسترلىگىنىڭ جانە قارۋلى كۇشتەرىنىڭ باسشىلىعى مەن جەكە قۇرامى قازا تاپقان اسكەري قىزمەتشىلەردىڭ تۋعان-تۋىستارى مەن جاقىندارىنا قايعىرىپ كوڭىل ايتادى.
قازا بولعان اسكەري قىزمەتشىلەردىڭ وتباسىلارىنا قاجەتتى جان-جاقتى، ونىڭ ىشىندە ماتەريالدىق جانە پسيحولوگيالىق كومەك كورسەتىلەدى، - دەلىنگەن مينيسترلىك حابارلاماسىندا.
