كاسپيدە قازا بولعان اسكەري قىزمەتشىلەردىڭ سانى 12 گە جەتتى، ەكەۋى ىزدەستىرىلىپ جاتىر
استانا. KAZINFORM - قانات بوزىمبايەۆ ءالى تابىلماعان اسكەري قىزمەتشىلەردى ۇزدىكسىز ىزدەستىرۋدى تاپسىردى، دەپ حابارلايدى وبلىس اكىمدىگىنىڭ باسپا ءسوز قىزمەتى.
ۆەدومستۆو ءمالىم ەتكەندەي، ق ر پرەمەر-ءمينيسترىنىڭ ورىنباسارى قانات بوزىمبايەۆ باستاعان ۇكىمەتتىك كوميسسيا ماڭعىستاۋ وبلىسىنداعى توتەنشە جاعداي بولعان جەردە جۇمىسىن جالعاستىرىپ جاتىر. وقيعا ورنىندا جۇمىلدىرىلعان مەملەكەتتىك ورگانداردىڭ ءىس-قيمىلى جانە ىزدەستىرۋ-قۇتقارۋ جۇمىستارى ۇيلەستىرىلۋدە. قازىرگى تاڭدا نەگىزگى مىندەت - ورنالاسقان جەرى انىقتالماعان ەكى اسكەري قىزمەتشىنى ىزدەستىرۋ.
- ناقتىلانعان مالىمەتكە سايكەس، وقۋ-جاتتىعۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنە بايلانىستى 17 ادام سۋعا كەتكەن. ونىڭ 12 ءسى قازا تاۋىپ، ءۇش اسكەري قىزمەتشى قۇتقارىلدى. قالعان ەكى اسكەري قىزمەتشىنى ىزدەستىرۋ جۇمىستارى جالعاسۋدا، - دەلىنگەن حابارلامادا.
قانات بوزىمبايەۆ ءالى تابىلماعان اسكەري قىزمەتشىلەردى قاجەتتى بارلىق كۇشتەر مەن قۇرالداردى تارتا وتىرىپ، تاۋلىك بويى ۇزدىكسىز ىزدەستىرۋدى قامتاماسىز ەتۋدى تاپسىردى. سونداي-اق قازا تاپقان اسكەري قىزمەتشىلەردىڭ وتباسىلارىنا قاجەتتى ماتەريالدىق جانە وزگە دە كومەك كورسەتۋ تاپسىرىلدى.
ۋاكىلەتتى ورگاندار وقيعانىڭ بارلىق ءمان-جايىن انىقتاۋ بويىنشا جۇمىس جۇرگىزىپ جاتىر. كوميسسيانىڭ جۇمىسى مەن وقيعا ورنىنداعى ىزدەستىرۋ-قۇتقارۋ ءىس-شارالارى جالعاسۋدا.
ەسكە سالايىق، 2026-جىلعى 24-قىركۇيەكتە كاسپييدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسىپ جاتىر.
كەيىنىرەك اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.
ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى.
كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.
سونىمەن قاتار، پرەزيدەنت قاسىم- جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.
اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىن بولدى.
25-قىركۇيەك قازاقستاندا جالپى ۇلتتىق ازا تۇتۋ كۇنى بولاتىنى بەلگىلى بولدى.
