كاسپيدە ءۇش ادام مىنگەن قايىق تەڭىزگە اعىپ كەتتى

ت ج م باسپا ءسوز قىزمەتىنىڭ مالىمەتىنشە، وتكەن تۇندە ءتۇپقاراعان اۋدانىنداعى كاسپي تەڭىزىنىڭ جاعالاۋىندا قاتتى جەلدىڭ سالدارىنان ءۇش ادام وتىرعان ۇرلەمەلى قايىق اشىق تەڭىزگە اعىپ كەتكەن. ولاردى ىزدەۋگە ت ج م كۇشتەرى دەرەۋ شىقتى.

- قۇتقارۋشىلار جوعالعان ادامداردى تاۋىپ، جاعالاۋعا جەتكىزدى. مەديتسينالىق كومەك قاجەت بولعان جوق،-دەلىنگەن حابارلامادا.

ت ج م قازاقستاندىقتارعا ەسكەرتۋ جاساپ، جەل كۇشەيگەن كەزدە سۋعا شىقپاۋدى جانە قاۋىپسىزدىك ەرەجەلەرىن ساقتاۋدى سۇرادى.

ەسكە سالايىق، 2026-جىلعى 24-قىركۇيەكتە كاسپيدەگى اسكەري وقۋ-جاتتىعۋ كەزىندە 14 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسىپ جاتىر.

كەيىنىرەك اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.

ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى.

كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.

سونىمەن قاتار، پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ- جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.

اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىن بولدى.

25-قىركۇيەكتە قازاقستاندا جالپى ۇلتتىق ازا تۇتۋ كۇنى جاريالاندى.