Kaspi ،Kazakhmys جانە KAZ Minerals اكسيونەرلەرى مەن باسشىلارى س ق و- داعى تۇرعىن ۇيلەردى قالپىنا كەلتىرۋگە 60 ميلليارد تەڭگەگە دەيىن بولەدى - قانات بوزىمبايەۆ
استانا. KAZINFORM - سولتۇستىك قازاقستان وبلىسىنا پرەمەر-ءمينيستردىڭ ورىنباسارى قانات بوزىمبايەۆ، «Kazakhmys Holding» ج ش س ديرەكتورلار كەڭەسىنىڭ ءتوراعاسى ەدۋارد وگاي، Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم، سونداي-اق «KAZ Minerals Management» ج ش س باسقارما ءتوراعاسى ەلدار مامەدوۆ بولىپ، قالپىنا كەلتىرۋ جۇمىستارىنىڭ بارىسىمەن تانىستى. سونىمەن قاتار جەرگىلىكتى تۇرعىندارمەن كەزدەستى.
سۋ تاسقىنى باستالعالى وبلىستا 3898 ءۇيدى سۋ باسقان. ساياجاي اۋماعى ايتارلىقتاي زارداپ شەكتى - 6597 ۋچاسكە. وبلىس اكىمدىگىنىڭ مالىمەتىنشە، سۋ باسقان تۇرعىن ۇيلەردىڭ 40 پايىزىنىڭ ودان ءارى تۇرۋعا جارامسىز بولۋى مۇمكىن.
ءۇيسىز قالعاندار ۋاقىتشا جاتاقحاناعا ورنالاستىرىلدى. ۆيتسە-پرەمەر ولارعا مەملەكەت تاراپىنان قارجىلىق قولداۋ شارالارىن ەسكە سالدى. ءقازىردىڭ وزىندە 3383 وتباسى 100 ا ە ك كولەمىندە ءبىر رەتتىك جاردەماقى الدى. 1600 دەن استام وتباسىنا 600 ميلليون تەڭگە قوسىمشا تولەم قاراستىرىلعان.
سونداي-اق وبلىس تۇرعىندارىنا KAZ Minerals ،Kazakhmys Holding جانە Kaspi.kz اتتى ءۇش ءىرى كومپانيا قازاقستاندا سۋ تاسقىنىنان زارداپ شەككەندەر، نەگىزىنەن سقو ءۇشىن 60 ميلليارد تەڭگەگە دەيىن بولەتىنى تۋرالى حابارلاندى.
«مەملەكەت باسشىسىنىڭ تاپسىرماسى بويىنشا مەن ءۇش ءىرى كومپانيانىڭ اكسيونەرلەرىمەن جانە باسشىلىعىمەن بىرگە ءسىزدىڭ وڭىرگە كەلدىم. جالپى سوماسى 60 ميلليارد تەڭگە سۋ تاسقىنىنان زارداپ شەككەندەرگە پاتەر ساتىپ الۋعا جانە ءۇي سالۋعا باعىتتالادى»، - دەدى پرەمەر-ءمينيستردىڭ ورىنباسارى حالىقپەن كەزدەسۋىندە.
وبلىس اكىمدىگىنە ەكى اپتا ىشىندە تۇرعىن ۇيلەردى باعالاپ، ونى قالپىنا كەلتىرۋدى باستاۋدى تاپسىردى.
«مۇنداي جاعداي ءبىزدىڭ ەلدە ءبىرىنشى رەت بولىپ وتىر. بۇل ناعىز اپات ەكەنىن ءوز كوزىممەن كوردىم. ەشكىم بەيجاي قالماۋى كەرەك. مۇندا ءبارى تەڭ. ۇكىمەتپەن بىرگە قولدان كەلگەننىڭ ءبارىن جاساۋعا تىرىسامىز»، - دەدى Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم.
سولنەچنوە-2 اۋىلىندا ءبىر ءتيپتى 100 ءۇيدىڭ قۇرىلىسى باستالىپ تا كەتتى. 10 مەردىگەرلىك ۇيىم جۇمىلدىرىلدى. جوبا وبلىس اكىمدىگى مەن «قازاقستان حالقىنا» قورى اراسىندا قول قويىلعان مەموراندۋم اياسىندا باستالدى. باسپانانى جازدىڭ ورتاسىنا دەيىن اياقتاۋعا مۇمكىندىك بەرەتىن قاجەتتى ينجەنەرلىك ينفراقۇرىلىم مەن كوممۋنيكاتسيالار بار.
بۇدان كەيىن قانات بوزىمبايەۆ يندۋستريا جانە قۇرىلىس ءمينيسترى قانات شارلاپايەۆ پەن مەردىگەرلەردىڭ قاتىسۋىمەن كەڭەس وتكىزدى.
«يندۋستريا جانە قۇرىلىس مينيسترىنە وبلىستى قاجەتتى قۇرىلىس ماتەريالدارىمەن قامتاماسىز ەتۋدى، قۇرىلىس ماتەريالدارىنىڭ باعاسىن ۇنەمى قاداعالاپ، ونىڭ قىمباتتاۋىنا جول بەرمەۋدى تاپسىرامىن. ءار تيىنعا سۇرانىس بولاتىنىن مەردىگەرلەر مەن اكىمدىككە تاعى دا ەسكە سالامىن. وڭىرلەردى قالپىنا كەلتىرۋ ۇدەرىسىنە قۇقىق قورعاۋ ورگاندارى جۇمىلدىرىلىپ، جاعدايدى مۇقيات قاداعالاپ وتىر. اۋا رايى سالقىنداعانشا زارداپ شەككەندەردىڭ بارلىعىن قونىستاندىرۋىمىز كەرەك»، - دەپ تۇيىندەدى ءسوزىن پرەمەر-ءمينيستردىڭ ورىنباسارى.
