كارىم ءماسىموۆ ءىسى جوعارعى سوتقا جەتتى مە

استانا. KAZINFORM - جوعارعى سوتقا ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆتىڭ ءىسى كاسساتسيالىق تارتىپپەن تۇسپەدى جانە وندىرىستە جوق. بۇل جايىندا اتالعان ۆەدومستۆونىڭ Kazinform اگەنتتىگىنىڭ رەسمي ساۋالىنا بەرگەن جاۋابىندا ايتىلعان.

ەستەرىڭىزگە سالا كەتسەك، 2022 -جىلدىڭ قاڭتارىندا ك. ءماسىموۆتىڭ ۇستىنەن مەملەكەتكە وپاسىزدىق جاساۋ فاكتىسىمەن سوتقا دەيىنگى تەرگەۋ باستالعانى ءمالىم بولدى.

ول ۇلتتىق قاۋىپسىزدىك كوميتەتىنىڭ ءتوراعاسى لاۋازىمىنان 6-قاڭتاردا بوساتىلىپ، 8-قاڭتار كۇنگى تۇتقىنعا الىندى جانە تەرگەۋ يزولياتورىنا قامالدى.

كارىم ماسىموۆكە قاڭتار وقيعاسى بويىنشا ايىپ تاعىلعان بولاتىن. باس پروكۋرور بەرىك اسىلوۆ اتاپ وتكەندەي، تارتىپسىزدىك كەزىندە ءماسىموۆتىڭ تاپسىرماسى بويىنشا ۇ ق ك دەپارتامەنتتەرىنىڭ جەكە قۇرامى جۇمىس ورنىن تاستاپ كەتكەن.

2022 -جىلدىڭ تامىز ايىنىڭ سوڭىندا ۇ ق ك-نىڭ بۇرىنعى باسشىسى مەن ونىڭ ورىنباسارلارى مەملەكەتتىك وپاسىزدىق جاساۋعا، بيلىكتى كۇشپەن باسىم الۋعا تىرىسۋعا، بيلىك پەن لاۋازىمدىق وكىلەتتىكتى اسىرا پايدالانۋعا كىنالى دەپ تانىلدى.

ال ءماسىموۆتىڭ ءىسى «اسا قۇپيا» بەلگىسىمەن ءوتتى.

كارىم ءماسىموۆتىڭ مۇلكىن تاركىلەپ، مەملەكەتتىك قىزمەتتە لاۋازىم اتقارۋ قۇقىنان ءومىر بويىنا ايىرۋ ارقىلى 18 جىلعا سوتتالدى.

ول ۇكىمگە شاعىم ءتۇسىردى.

2023 -جىلدىڭ ماۋسىمىندا استانالىق سوت ۇكىمنىڭ تۇتقىندى قاماۋدا ۇستاۋ بولىگىن عانا جۇمسارتتى.

2023 -جىلدىڭ قاراشاسىندا ۇلتتىق قاۋىپسىزدىك كوميتەتى Kazinform اگەنتتىگىنە ك. ماسىموۆكە قاتىستى ق ك 218-بابى «قىلمىستىق جولمەن الىنعان اقشانى جانە وزگە مۇلىكتى زاڭداستىرۋ (جىلىستاتۋ)» جانە 366-بابى «اسا ءىرى كولەمدە پارا الۋ» بويىنشا سوتقا دەيىنگى تەرگەۋ ءجۇرىپ جاتقانىن حابارلاعان ەدى.

سول سەبەپتى قىلمىستىق ءىس اياسىندا تەرگەۋ امالدارىن جۇرگىزۋ ماقساتىندا استانا قالاسى ۇ ق ك تەرگەۋ يزولياتورىندا وتىر.

اۆتور

مارلان جيەمباي