كارىم ءماسىموۆ ءىسى بويىنشا كوميتەتتىڭ بۇرىنعى نە قازىرگى قىزمەتكەرلەرى كۇدىكتى دەپ تانىلماعان – ۇ ق ك

18 جىلعا سوتتالعان ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ قازىر ەلورداداعى تەرگەۋ يزولياتورىندا وتىر. بۇعان ۇ ق ك ەكس-ءتوراعاسىنا قاتىستى ەكى باپ بويىنشا قىلمىستىق ءىستىڭ تەرگەلىپ جاتقانى سەبەپ بولدى.

بۇل تۋرالى ۇلتتىق قاۋىپسىزدىك كوميتەتى Halyq Uni رەسمي ساۋالىنا بەرگەن جاۋابىندا مالىمدەدى.

كارىم ماسىموۆكە قاتىستى قىلمىستىق كودەكستىڭ 218-بابى 3-بولىگى 3-تارماعىندا جانە 366-بابى 4-بولىگىندە كورسەتىلگەن قىلمىستىق قۇقىقبۇزۋشىلىق بەلگىلەرى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر.

بۇل باپتا ادامدار توبىنىڭ الدىن الا ءسوز بايلاسۋى ارقىلى، قىزمەت بابىن پايدالانىپ ىرى مولشەردەگى قىلمىستىق جولمەن الىنعان قاراجاتتى جانە باسقا دا مۇلىكتى بىرنەشە رەت زاڭداستىرۋ ارەكەتى كورسەتىلگەن.

ق ك 218-بابىنا سايكەس ازاماتتىڭ مۇلكى تاركىلەنىپ، 5 جىلدان 10 جىلعا دەيىنگى مەرزىمگە باس بوستاندىعىنان ايىرىلادى.

ايتا كەتەيىك، قىلمىستىق كودەكستە ءدال وسى باپ بويىنشا تولىقتىرۋ بار. ەگەر ادام قىلمىستىق جولمەن الىنعان اقشانى جانە مۇلىكتى زاڭداستىرعانىن ءوز ەركىمەن مالىمدەسە، قىلمىستىق جاۋاپكەرشىلىكتەن بوساتىلادى.

ال قىلمىستىق كودەكستىڭ 366-بابىندا «پارا الۋ» ارەكەتى كورسەتىلگەن. بۇل باپتىڭ 4-بولىگىنە سايكەس ازاماتتىڭ مۇلكى تاركىلەنەدى جانە بەلگىلى ءبىر لاۋازىمدى اتقارۋ قۇقىعىنان ءومىر بويىنا ايىرىلادى.

پارانىڭ 70-80 ەسەلەنگەنگە دەيىنگى سوماسىندا ايىپپۇل سالىنادى نەمەسە 10 جىلدان 15 جىلعا دەيىن باس بوستاندىعىنان ايىرىلادى، - دەلىنگەن زاڭدا.

بۇعان دەيىن كارىم ماسىموۆپەن بىرگە ونىڭ ورىنباسارى بولعان ءانۋار سادىقۇلوۆ (16 جىلعا)، داۋلەت ەرعوجين (15 جىلعا)، مارات ءوسىپوۆ (3 جىلعا) سوتتالدى. ۇ ق ك اقپاراتىنا سايكەس، ماسىموۆكە قاتىستى قىلمىستىق ءىس بويىنشا كوميتەتتىڭ بۇرىنعى نە قازىرگى قىزمەتكەرلەرى كۇدىكتى دەپ تانىلماعان. سوعان سايكەس، ەشكىم قاماۋعا الىنباعان.

ال جاڭا قىلمىستىق ءىستى تەرگەۋگە بايلانىستى كارىم ءماسىموۆ استاناداعى ۇ ق ك تەرگەۋ يزولياتورىندا وتىر.

قاڭتار وقيعاسىنان كەيىن قاماۋعا الىنعان كارىم ءماسىموۆ قىلمىستىق كودەكستىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلدى. وعان جازانى ءىشىنارا قوسۋ ارقىلى 18 جىلعا باس بوستاندىعىنان ايىرۋ، مۇلكى تاركىلەنىپ، ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرۋ جازاسى تاعايىندالدى.

ونىڭ ورىنباسارى بولعان ءانۋار سادىقۇلوۆ قىلمىستىق كودەكستىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلدى. ول 16 جىلعا سوتتالدى. سونداي-اق ءومىر بويى مەملەكەتتىك قىزمەتتە قىزمەت ەتۋ قۇقىعىنان ايىرىلدى.

ۇ ق ك ءتوراعاسىنىڭ بۇرىنعى ورىنباسارى داۋلەت ەرعوجين قىلمىستىق كودەكستىڭ 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلدى. ول 15 جىلعا باس بوستاندىعىنان ايىرىلدى.

ۇ ق ك ءتوراعاسىنىڭ بۇرىنعى ورىنباسارى مارات ءوسىپوۆ قىلمىستىق كودەكستىڭ 362-بابىنىڭ 3-بولىگى بويىنشا كىنالى دەپ تانىلدى جانە وعان مەملەكەتتىك قىزمەتتە قىزمەت اتقارۋ قۇقىعىنان ايىرا وتىرىپ، 3 جىلعا باس بوستاندىعىنان ايىرۋ جازاسى تاعايىندالدى.

2023-جىلدىڭ قىركۇيەگىندە باس پروكۋراتۋرانىڭ ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى سوتقا دەيىنگى تەرگەپ-تەكسەرۋ جۇرگىزىپ جاتقانى حابارلاندى. وعان قاتىستى «قاڭتار وقيعاسى» كەزىندە بيلىك پەن لاۋازىم وكىلەتىن اسىرا پايدالانۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىپ جاتىر.