كاريم بەنزەماعا لاڭكەستەرمەن بايلانىسى بار دەگەن ايىپ تاعىلدى
فرانسۋز فۋتبولىنىڭ جۇلدىزى، 2022 -جىلعى «التىن دوپتىڭ» يەگەرى كاريم بەنزەما يزرايل مەن حاماس اراسىنداعى قاقتىعىسقا بايلانىستى جانجالعا قالدى، دەپ حابارلايدى Kazinform اگەنتتىگى CNN جاڭالىقتارىنا سىلتەمە جاساپ.
دۇيسەنبى كۇنى فرانسيانىڭ ىشكى ىستەر ءمينيسترى جەرالد دارمانەن فرانسۋزدىق CNews باسىلىمىنا بەرگەن سۇحباتىندا بەنزەمانى فرانتسيا تەرروريستىك ۇيىم دەپ سانايتىن «مۇسىلمان باۋىرلار» ءدىني- ساياسي توبىمەن بايلانىسى بار دەپ ايىپتادى.
تەلەارناعا بەرگەن سۇحباتىندا دارمانەن ونىڭ مينيسترلىگى 1100 يسلامشىل ۇيىمدى جاپقانىن ايتتى.
«سوڭعى اپتالاردا مەنى اسىرەسە بەنزەما مىرزانىڭ، ءبارىمىز بىلەتىندەي، «مۇسىلمان باۋىرلار» قوزعالىسىمەن (ق ر- دا تىيىم سالىنعان - رەد. ەسكەرتپەسى) قاتىسى بار ەكەنى بەلگىلى بولعانى تاڭقالدىردى»، - دەدى ول.
دارمانەن ءوز مالىمدەمەسىن راستايتىن ەشقانداي دالەل كەلتىرمەدى. CNN دارمانەن ءسوزىن ايعاقتايتىن تۇسىنىكتەمە الۋ ءۇشىن فرانسيانىڭ ىشكى ىستەر مينيسترلىگىنە حابارلاستى.
سارسەنبى كۇنى فرانسيا پارلامەنتىنىڭ سەناتورى ۆالەري بۋايە مينيستر دارمانەننىڭ مالىمدەمەسىنە سۇيەنىپ، كاريم بەنزەمانى فرانسۋز ازاماتتىعىنان ايىرۋعا شاقىردى، دەپ جازدى Politico.eu.
- ءمينيستردىڭ مالىمدەمەسى راس بولسا، كاريم بەنزەماعا قارسى سانكسيالاردى قاراستىرۋىمىزعا تۋرا كەلەدى، - دەدى كونسەرۆاتيۆتى رەسپۋبليكالىق پارتيانىڭ ۆيتسە- پرەزيدەنتى بۋايە X الەۋمەتتىك جەلىسىندە جاريالاعان حابارلاماسىندا.
بۋايە بەنزەمانى كاسىپقوي فۋتبولشى الاتىن ەڭ جوعارى جەكە ماراپات «التىن دوپتان» ايىرۋ - «العاشقى سيمۆولدىق سانكسيا» بولۋى مۇمكىن ەكەنىن جانە ەكىنشى جازا رەتىندە ونى فرانسۋز ازاماتتىعىنان ايىرۋدى ۇسىندى.
بەنزەما ۋەفا چەمپيوندار ليگاسىن بەس رەت جەڭىپ، «رەال- مادريد» فۋتبول كومانداسى ءۇشىن 354 گول سوقتى، ال وتكەن جازدا ساۋد ارابياسىنىڭ كاسىبي ليگاسى «ال- يتتيحاد» كومانداسىنا اۋىسقان بولاتىن.
شابۋىلشى فرانسيا ەرلەر قۇراماسىنىڭ ساپىندا 97 ويىن وتكىزىپ، 37 گول سوقتى جانە بارلىق ۋاقىتتاعى ەڭ مىقتى فرانسۋز ويىنشىلارىنىڭ ءبىرى رەتىندە تانىلدى. ول 2007 -جىلعى دەبيۋتىنەن كەيىن وتكەن جىلى ۇلتتىق قۇراماداعى قىزمەتىنەن كەتتى.
دارمانەننىڭ ايىپتاۋ ءسوزى بەنزەما جەكسەنبى كۇنى يزرايل مەن حاماس اراسىنداعى قاقتىعىستا پالەستينالىقتاردى قولدايتىنىن مالىمدەگەننەن كەيىن ايتىلدى.
«ءبىزدىڭ بار قۇلشىلىعىمىز ايەلدەردى دە، بالالاردى دا اياماي قىرىپ جاتقان ادىلەتسىز جارىلىستاردىڭ قۇربانى بولعان گازا حالقىنا ارنالادى»، - دەپ جازدى بەنزەما X الەۋمەتتىك جەلىسىندە.
«مۇسىلمان باۋىرلار» - يسلامدى جاي ءدىن ەمەس، ءومىر ءسۇرۋ سالتى دەگەن سەنىمگە نەگىزدەلگەن ءدىني- ساياسي توپ (ق ر- دا تىيىم سالىنعان - رەد. ەسكەرتپەسى) . ول سەكۋلياريزمنەن باس تارتۋدى جانە سالاۋاتتى وتباسىلاردىڭ، قاۋىمداستىقتار مەن مەملەكەتتەردىڭ نەگىزى رەتىندە قۇران ەرەجەلەرىنە قايتا ورالۋدى جاقتايدى.
دەمونسترانت توپتار وتكەن اپتادا پاريج كوشەلەرىنە شىعىپ، فرانسيا ۇكىمەتىنىڭ ەلدە پالەستينانى قولدايتىن شەرۋلەرگە تىيىم سالۋىنا قارسى شىقتى.
دارمانەن قوعامدىق تارتىپكە الاڭداۋشىلىق ءبىلدىرىپ، شەرۋلەرگە تىيىم سالىناتىنىن جاريالادى.
«پالەستينانى قولدايتىن شەرۋلەرگە تىيىم سالۋ كەرەك، ويتكەنى ولار قوعامدىق ءتارتىپتى بۇزۋى مۇمكىن»، - دەدى مينيستر.
ول، سونداي- اق، پوليتسيانى فرانسۋز يەۆرەيلەرى باراتىن بارلىق جەرلەردى، ماسەلەن سيناگوگالار مەن مەكتەپتەردى قورعاۋعا شاقىردى جانە فرانتسۋز جەرىندە انتيسەميتيزم ارەكەتتەرىن جاساعان كەز كەلگەن شەتەلدىكتىڭ «تەز ارادا دەپورتاتسيالاناتىنىن» ايتتى.
