كارتوپ باعاسى الداعى 2-3 كۇندە تۇراقتانادى
استانا. KAZINFORM – ق ر اۋىل شارۋاشىلىعى ەگىنشىلىك دەپارتامەنتىنىڭ ديرەكتورى نازگۇل حاتەپوۆا ۇكىمەتتە كارتوپ باعاسىنىڭ كەنەتتەن قىمباتتاۋى جونىندە پىكىر ءبىلدىردى.

− باعانىڭ كوتەرىلۋى نەمەسە ءتۇسۋى تەندەنتسياسى تۇراقتى باقىلاۋدا. سوڭعى ءۇش كۇننىڭ وزىندە باعانىڭ تومەندەۋ فاكتىلەرىن كورىپ وتىرمىز. استانا بويىنشا كارتوپ كەشە 433 تەڭگە بولسا، بۇگىن 280 تەڭگە. ماگنۋم مەن كوتەرمە ساۋدا ورتالىقتارىنداعى جەدەل اقپارات تا بىزدە بار. الداعى 2-3 كۇندە بۇل قازاقستان بويىنشا باعاعا اسەر ەتىپ، كەلەسى اپتادا تۇراقتى باعا ورنايدى دەپ سەنەمىز، − دەدى ن. حاتەپوۆا ۇكىمەت كۋلۋارىندا.
بۇل رەتتە كارتوپتىڭ شارۋالاردان ساتىپ الىناتىن وزىندىك قۇنى - 170-180 تەڭگە.
− سىرتقى نارىقتا كارتوپقا سۇرانىس وتە جوعارى. بۇل ءبىر جاعىنان اۋىل شارۋاشىلىعى ءونىمىن وندىرۋشىلەر ءۇشىن جاقسى. ويتكەنى ءوز ونىمدەرىن ءتيىمدى باعادا ساتا الادى. الايدا باعا ىشكى فاكتورعا اسەرىن تيگىزىپ وتىر. ياعني سىرتقى نارىقتا جوعارى سۇرانىس بولعاندىقتان ىشكى باعادا كوتەرىلىپ كەتتى. بۇل ماسەلەنى تۇراقتاندىرۋ ءۇشىن كارتوپ ەكسپورتىنا تىيىم سالىندى، - دەپ ءتۇسىندىردى ن. حاتەپوۆا.
ەسكە سالا كەتسەك، اقتوبەدە كارتوپ باعاسى بىردەن 100 تەڭگەگە قىمباتتاپ كەتتى.
ىشكى نارىقتاعى كارتوپ باعاسىن تۇراقتاندىرۋ ماقساتىندا 18-قاڭتاردا وتكەن ساۋدا قىزمەتى ماسەلەلەرى جونىندەگى ۆەدومستۆوارالىق كوميسسيا وتىرىسىندا كارتوپتى ءۇشىنشى ەلدەرگە اكەتۋدى 6 اي مەرزىمگە شەكتەۋ تۋرالى شەشىم قابىلداندى.
ال، اۋىل شارۋاشىلىعى مينيسترلىگى كارتوپ قورى ىشكى قاجەتتىلىكتى تولىق قامتاماسىز ەتۋگە جەتكىلىكتى ەكەنىن مالىمدەگەن بولاتىن.