كانۆوندو-2024: بۇگىن جاس وسپىرىمدەر وليمپياداسىنىڭ الاۋى تۇتانادى

وليمپيادا
كوللاج: olympics.com/Midjourney

استانا. KAZINFORM - بۇگىن وڭتۇستىك كورەيانىڭ كانۆوندو قالاسىندا وتەتىن IV قىسقى جاس وسپىرىمدەر وليمپياداسىنىڭ الاۋى تۇتانادى.

استانا سپورتشىلاردى سالتاناتپەن شىعارىپ سالدى

15-قاڭتار كۇنى استاناداعى جاقسىلىق ۇشكەمپىروۆ اتىنداعى جەكپە-جەك سارايىندا كانۆون-2024 IV قىسقى جاس وسپىرىمدەر وليمپياداسىنا قاتىساتىن سپورتشىلاردى سالتاناتتى شىعارىپ سالۋ ءراسىمى ءوتتى.

وليمپيادا
فوتو: ادىلەت ءبىرىمقۇلوۆ/kazinform

اتالعان شارادا كونكيمەن جۇگىرۋ سپورتىنىڭ وكىلى كريستينا شۋمەكوۆا مەن شورت-ترەكشى ەراسىل شىڭعىسحانعا كوك تۋىمىز تابىستالىپ، سپورتشىلار انت بەرەدى. جيىنعا ق ر تۋريزم جانە سپورت ءمينيسترى، ۇلتتىق وليمپيادا كوميتەتىنىڭ باسشىلارى، سپورت ارداگەرلەرى مەن وليمپيادا ويىندارىنىڭ جۇلدەگەرلەرى قاتىستى.

ەل نامىسىن 42 سپورتشى قورعايدى

وڭتۇستىك كورەياداعى جاس وسپىرىمدەر وليمپياداسىندا قازاقستان نامىسىن سپورتتىڭ 5 ءتۇرى مەن 10 ديستسيپلينا بويىنشا 42 سپورتشى قورعايدى. اتاپ ايتار بولساق، بياتلون، كەرلينگ، كونكيمەن جۇگىرۋ، شورت-ترەك، شايبالى حوككەي، شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، فريستايلدان پاراللەلدى موگۋل بويىنشا باق سىنايدى.

سپورت ءتۇرى مەن سپورتشىلاردىڭ ەسىمدەرى:

بياتلون:

الەما قارابايەۆا

يلياس حاسەنوۆ

ەۆەلينا مەزەنسيەۆا

انتون رەدكين

ماريا ۆوروبيەۆا

كيريلل زوتوۆ

تاۋ شاڭعى سپورتى:

روستيسلاۆ حوحلوۆ

الەكساندرا سكوروحودوۆا

كەرلينگ:

مەرەي تاستەمىر

يبراگيم تاستەمىر

كونكيمەن جۇگىرۋ سپورتى:

رۋسلان ءجانادىلوۆ

ميحايل ماتريۋحين

الينا شۋمەكوۆا

كريستينا شۋمەكوۆا

شاڭعى جارىستارى:

بەرىك بورانبايەۆ

اۋباكىر توتانوۆ

ميلانا مامەدوۆا

ۆيولەتتا ميتروپولسكايا

شاڭعىمەن تۇعىردان سەكىرۋ:

يليا ميزەرنىح

يليا شيلنيكوۆ

سوفيا شيشكينا

الەنا سۆيريدەنكو

فريستايل-موگۋل:

يۋليا فەكليستوۆا

دەنيس راسترۋبا

شورت-ترەك:

مەيىرجان تولەگەن

ەراسىل شىڭعىسحان

اناستاسيا استراحانسەۆا

پولينا ومەلچۋك

شايبالى حوككەي 3x3:

تەمىرلان ايبول ۇلى

بەكسۇلتان ماقىش

ارسەني كۋچكوۆسكي

ءادىلحان ساتتار

نيكيتا كۋلاكوۆ

ماتۆەي رەشەتكو

راسۋل تۇرسىنوۆ

ارمان تولەن

جاحانگەر تىلەۋحان

تاير بيگارينوۆ

ەگور كراۆچەنكو

رومان ميچۋروۆ

ءانۋار احمەتجانوۆ

شاڭعى قوسسايىسى:

ارمان قۋانىش

جاس وسپىرىمدەر وليمپياداسىندا قازاقستان تۋىن كىمدەر الىپ شىعادى

وڭتۇستىك كورەيانىڭ كانۆوندو قالاسىندا وتەتىن IV قىسقى جاس وسپىرىمدەر وليمپياداسىندا قازاقستان تۋىن باتىس قازاقستان جانە سولتۇستىك قازاقستان وبلىستارىنىڭ سپورتشىلارى الىپ شىعادى.

жасөспірімдер олимпиадасы
فوتو: ادىلەت ءبىرىمقۇلوۆ/kazinform

اتاپ ايتساق، «ۇلتتار شەرۋى» كەزىندە قازاقستان تۋىن كونكيمەن جۇگىرۋدەن پەتروپاۆلدان ۇلتتىق قۇرامانىڭ مۇشەسى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان الىپ شىعادى. بۇل سپورتشىلار جارىستارداعى جوعارى جەتىستىكتەرى ءۇشىن عانا ەمەس، سونىمەن قاتار حالىقارالىق ارەناداعى جەڭىسكە دەگەن جىگەرى ءۇشىن تاڭدالعان.

اتاپ ايتساق، كريستينا شۋماكوۆا - كونكيمەن جۇگىرۋ سپورتىنان ق ر سپورت شەبەرى، ءوزىنىڭ جاسى ساناتىنداعى قازاقستان رەسپۋبليكاسىنىڭ چەمپيونى، 2023 -جىلعى الەم كۋبوگىنىڭ يتالياندىق كەزەڭىنىڭ كۇمىس جۇلدەگەرى.

ال ەكىنشى تۋ ۇستاۋشى سپورتشىمىز ەراسىل شىڭعىسحان - شورت- ترەكتەن سپورت شەبەرىنە كانديدات، ءوزىنىڭ جاسى ساناتىنداعى قازاقستان رەسپۋبليكاسىنىڭ چەمپيونى، سونداي- اق «ازيا بالالارى» 2023 حالىقارالىق جارىسىنىڭ كۇمىس جۇلدەگەرى.

كانۆون-2024: جەڭىمپازدار قانداي مەدالدارمەن ماراپاتتالادى

وسىعان دەيىن وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنىڭ جەڭىمپازدارى مەن جۇلدەگەرلەرىنە قانداي مەدالدار بەرىلەتىنىن جازعان بولاتىنبىز.

جاس وسپىرىمدەر اراسىنداعى IV قىسقى وليمپيادا ويىندارىنىڭ جۇلدەگەرلەرىنە بەرىلەتىن مەدالدىڭ اتاۋى - «جارقىراعان بولاشاق» بولادى.

سونداي-اق، وليمپيادا مەدالىنىڭ ديزاينىن جاساۋعا 2023 -جىلى 120 مەملەكەتتەن 3000 نان استام ۇمىتكەر قاتىسقانىن، سولاردىڭ اراسىنان تەك، 27 جاستاعى برازيليا ازاماتى دانتە اكيرا ۋۆايدىڭ تۋىندىسى ۇزدىك دەپ تانىلعانى بەلگىلى بولدى.

جاس وسپىرىمدەر وليمپياداسى: قورجىنىمىزدا قانشا جۇلدە بار

قازاقستاندىق جاس وسپىرىمدەر كانۆون وليمپياداسىنا دەيىن ءۇش ويىنعا قاتىسقان بولاتىن. بۇگىن قازاقستان قۇراماسى وسىعان دەيىنگى ويىنداردا قانشا مەدال جەڭىپ العانىن ەسكە تۇسىرە كەتۋدى ءجون سانادىق.

2012 -جىل: ينسبرۋك (اۋستريا) وليمپياداسى

قازاقستان قۇراماسى قىسقى جاس وسپىرىمدەر وليمپياداسىنا العاش 2012 -جىلى ينسبرۋكتە وتكەن ويىنداردا ءوز ونەرىن ورتاعا سالدى. قازىرگە دەيىنگى ەڭ ۇلكەن جەتىستىگىمىز دە سول العاشقى اۋستريا جەرىندە تىركەلگەن بولاتىن.

اتاپ ايتساق، ۇلتتىق قۇراما مۇشەلەرى 2012 -جىلى ينسبرۋكتە 1 كۇمىس جانە 2 قولا مەدالعا قول جەتكىزدى. ناتيجەسىندە جالپى كوماندالىق ەسەپتە 23-ورىنعا تابان تىرەگەن ەدى. اتالعان باستى دودادا گالينا ۆيشنيەۆسكايا-شەپورەنكو سپرينتتە كۇمىس جۇلدە، سوسىن ءىز كەسۋ سايىسىندا قولا مەدالعا قول جەتكىزدى.

ال سەرگەي مالىشيەۆ كلاسسيكالىق جۇرىسپەن 10 شاقىرىم جارىستا مارە سىزىعىن ءۇشىنشى بولىپ كەسىپ، قولا جۇلدەمەن ماراپاتتالىپ قايتتى.

2016 جىل: ليللەحاممەر (نورۆەگيا) وليمپياداسى

قازاقستان جاس وسپىرىمدەرى ەكىنشى رەت 2016 -جىلى ليللەحاممەردە (نورۆەگيا) وتكەن وليمپيادا ويىندارىندا باق سىنادى. ناتيجەسىندە جەرلەستەرىمىز ءباسى بيىك باسەكەنى 2 قولا مەدالمەن اياقتادى. وسىلايشا جالپى كوماندالىق ەسەپتە 26-ورىندى مىسە تۇتتى.

نورۆەگيا تورىندە ءبىر قولا جۇلدەنى بياتلونشى ارينا پانتوۆا سپرينتتە جەڭىپ السا، ەكىنشى جۇلدەنى ەل قورجىنىنا ەليزابەت تۇرسىنبايەۆا مانەرلەپ سىرعاناۋ سپورتىنان سالدى.

2020 -جىل: لوزاننا (شۆەيتساريا) وليمپياداسى

قازاق سپورتشىلارى ءۇشىنشى رەت 2020 -جىلى لوزاننادا (شۆەيتساريا) وتكەن قىسقى ويىندارعا قاتىستى. وكىنىشكە قاراي، ەل نامىسىن قورعاۋعا بارعان 26 اتلەتىمىزدىڭ بىردە-ءبىرى جەڭىس تۇعىرىنان كورىنە المادى.

ايتا كەتەيىك، كانۆون-2024 جاس وسپىرىمدەر اراسىنداعى IV قىسقى وليمپيادا ويىندارى 19-قاڭتاردا اشىلادى جانە 1-اقپانعا دەيىن پحەنچحان 2018 قىسقى وليمپيادا ويىندارىن قابىلداعان وڭتۇستىك كورەيانىڭ كانۆون پروۆينسياسىندا وتەدى. وڭتۇستىك كورەياداعى جاس وسپىرىمدەر وليمپيادا ويىندارىنا الەمنىڭ 50 ەلىنەن 1800 سپورتشى قاتىسادى دەپ جوسپارلانعان. جەتى سپورت تۇرىنەن (15 ءپان) 81 مەدال جيىنتىعى ويناتىلادى.

 

اۆتور

كۇنسۇلتان وتارباي

سوڭعى جاڭالىقتار