كانۆونداعى جاس وسپىرىمدەر وليمپياداسى وتەتىن نىسانداردى قار باسىپ قالدى

استانا. KAZINFORM - سەنبى كۇنى وڭتۇستىك كورەيادا 2024-جىلى جاس وسپىرىمدەردىڭ قىسقى وليمپياداسى وتەتىن پروۆينتسيانىڭ ءبىراز بولىگىنە قالىڭ قار جاۋدى.

كانۆوندو پروۆينتسياسىنىڭ اكىمشىلىگى قولايسىز كۇن رايىنا بايلانىستى توتەنشە جاعداي رەجيمى ەنگىزىلگەنىن حابارلادى، دەپ جازدى Yonhap اقپارات اگەنتتىگى.

كورەيا مەتەورولوگيالىق باسقارماسىنىڭ مالىمەتىنشە، 20- قاڭتار كۇنى جەرگىلىكتى ۋاقىت بويىنشا ساعات 21:00 دەگى جاعدايعا سايكەس، كانۆوندو پروۆينتسياسىنىڭ كاننىن قالاسىندا شامامەن 41,6 س م قار جاۋدى.

پروۆينتسيانىڭ تاۋلى ايماقتارىندا قالىڭ قار تۋرالى ەسكەرتۋ كۇشىندە، ويتكەنى جەكسەنبىگە دەيىن قار ودان دا كوپ جاۋادى، دەپ حابارلادى Yonhap.

جەرگىلىكتى بيلىك سەنبى كۇنى حابارلاعانداي، قاردى تازالاۋعا 5 مىڭنان استام ادام جانە 700 گە جۋىق ارنايى تەحنيكا جۇمىلدىرىلعان. سەنبى كۇنى جاۋعان قالىڭ قار وڭتۇستىك كورەيانىڭ كانۆوندو پروۆينتسياسىندا 2024-جىلى وتەتىن جاس وسپىرىمدەر اراسىنداعى قىسقى وليمپيادا ويىندارىنداعى ءبىرقاتار شارانى توقتاتتى.

وڭتۇستىك كورەياداعى جاس وسپىرىمدەر اراسىنداعى IV قىسقى وليمپيادا ويىندارى جۇما كۇنى باستالىپ، 1- اقپانعا دەيىن جالعاسادى. كانۆون-2024 ويىندارىنا 80 گە جۋىق ەلدەن جينالعان 1800 سپورتشى قاتىسادى. مۇندا سپورتتىڭ 7 تۇرىنەن 15 باعدارلاما بويىنشا 81 مەدال جيىنتىعى ويناتىلادى.