كانۆون-2024: وليمپيادانىڭ بويتۇمارى استاناعا كەلدى
وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنىڭ بويتۇمارى استاناعا كەلدى، دەپ حابارلايدى Kazinform.
ق ر تۋريزم جانە سپورت مينيسترلىگىنىڭ باسپا ءسوز قىزمەتى ءمالىم ەتكەندەي، وليمپياداعا دايىندىق جونىندەگى شتابتىڭ جۇمىسى جالعاسىپ جاتىر.
كانۆونداعى جاس وسپىرىمدەر اراسىنداعى قىسقى وليمپيادا قارساڭىندا شتاب كەڭسەسىندە تۋريزم جانە سپورت ءمينيسترى ەرمەك مارجىقپايەۆ پەن كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجو تە-يك كەزدەستى.
كورەيا رەسپۋبليكاسىنىڭ ەلشىسى قازاقستانمەن تۋريزم جانە سپورت سالاسىندا ءوزارا ىنتىماقتاستىقتا جۇمىس ىستەۋگە مۇددەلى ەكەندىگىن جەتكىزدى.
كەزدەسۋ بارىسىندا ەكى ەلدىڭ وكىلدەرى ويىنداردى تالقىلاپ، وسى جارىستان، قازاقستاندىق سپورتشىلاردان قانداي ناتيجە كۇتەتىنىنە قاتىستى وي ءبولىستى.
جيىن سوڭىندا كورەيا رەسپۋبليكاسىنىڭ ەلشىسى جاس وسپىرىمدەر وليمپياداسىنىڭ بويتۇمارىن سىيلاپ، قازاقستان سپورتشىلارىنا الداعى بايراقتى باسەكەدە ساتتىلىك تىلەدى.
«كانۆونداعى جاس وسپىرىمدەردىڭ قىسقى وليمپياداسىنىڭ بويتۇمارى ءبىزدىڭ شتاب كەڭسەسىندە ءوز ورنىن تاۋىپ، الداعى ءتورت جىلدىقتىڭ باستى باسەكەسىنە قاتىساتىن قىز-جىگىتتەرىمىزگە ساتتىلىك الىپ كەلەدى دەگەن سەنىمدەمىز»، - دەدى ەرمەك مارجىقپايەۆ.
ەسكە سالا كەتەيىك، IV قىسقى جاس وسپىرىمدەر وليمپياداسى بيىل 19-قاڭتار مەن 1- اقپان ارالىعىندا وڭتۇستىك كورەيانىڭ كانۆون قالاسىندا وتەدى.
قازاقستان نامىسىن سپورتتىڭ بەس ءتۇرى مەن 10 ديستسيپلينا بويىنشا 42 سپورتشى قورعايدى. اتاپ ايتار بولساق، بياتلون، كەرلينگ، كونكيمەن جۇگىرۋ، شورت-ترەك، شايبالى حوككەي، شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، فريستايلدان پاراللەلدى موگۋل بويىنشا باق سىنايدى.
اۆتوركۇنسۇلتان وتارباي
