كامەلەتكە تولماعانداردىڭ قاۋىپسىزدىگىنە قاتىستى زاڭ جوباسىندا بالالاردى وتباسىنان الىپ كەتۋ قاراستىرىلعان با
استانا. KAZINFORM - ءماجىلىستىڭ قاراۋىنداعى كامەلەتكە تولماعانداردىڭ قاۋىپسىزدىگى تۋرالى زاڭ جوباسىندا بالالاردى وتباسىنان الىپ كەتۋ ماسەلەسى قاراستىرىلماعان.
اتاپ ايتقاندا، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلىسپە قۇجات ءبىرىنشى وقىلىمدا قارالدى. وتىرىس بارىسىندا ەلىمىزدە بالانى وتباسىنان اجىراتۋ قانداي جاعدايدا بولاتىنى سۇرالدى.
«الەۋمەتتىك جەلىلەردى سارالاي كەلە، جۇرتشىلىق زاڭ جوباسىندا يۋۆەنالدى يۋستيتسيا نورمالارى قامتىلعانىنا، وتباسىنا كەدەرگىسىز كىرۋگە رۇقسات ەتىلگەنىنە، بالالاردى وتباسىنان الىپ كەتۋگە جانە ولاردى بالالار ۇيىنە تاپسىرۋعا قاتىستى نورمالار بار دەپ الاڭداپ وتىرعانىن بايقادىق. زاڭ جوباسىن قاراپ شىقتىم، ءبىراق ونداي نورمالاردى تاپپادىم. زاڭ جوباسىندا مۇنداي نورمالار بار ما؟ جالپى، ءقازىر قازاقستاندا بالانى وتباسىنان الىپ كەتۋگە بولا ما؟»، - دەپ سۇرادى دەپۋتات سەرگەي پونوماريەۆ.
اتالعان زاڭ جوبالارى بويىنشا بايانداما جاساعان ءماجىلىس دەپۋتاتى جۇلدىز سۇلەيمەنوۆا قاراستىرىلعان قۇجاتتاردا يۋۆەنالدى يۋستيتسياعا بايلانىستى ەشقانداي نورما ەنگىزىلمەگەنىن ايتتى.
«قاراستىرىلۋى مۇمكىن دە ەمەس. نەگە؟ سەبەبى ءبىز بالانىڭ وتباسىندا تاربيلەنگەنىن، وسكەنىن قالايمىز. سونىمەن قاتار، الداعى ۋاقىتتا جەتىمدەر ءۇيى سەكىلدى ينستيتۋتىنىڭ بىرتىندەپ جويىلۋىنا كۇش سالامىز. بۇگىن تالقىلانعان زاڭ جوباسىندا بالالاردى وتباسىنان الىپ كەتۋ ماسەلەسى قاراستىرىلماعان»، - دەدى ج. سۇلەيمەنوۆا.
ءوز كەزەگىندە وقۋ-اعارتۋ ۆيتسە-ءمينيسترى ەدىل وسپان قاراستىرىلعان زاڭ جوبالارىندا بالالاردى وتباسىنان ءماجبۇرلى الىپ كەتۋ نورمالارى ۇسىنىلماعانىن راستادى.
«بۇل ماسەلە مينيسترلىكتە قارالمادى. سوندىقتان الەۋمەتتىك جەلىلەردە تارالىپ جاتقان قاۋەسەت شىندىققا جاناسپايدى»، - دەدى ە. وسپان.
