كامەلەتكە تولماعاندار ىستەرى جونىندەگى كوميسسيا جۇمىسىنا وزگەرىس ەنگىزىلەدى
استانا. KAZINFORM - قازاقستاندا كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيالار بەلسەندى جۇمىس جۇرگىزىپ جاتىر.
وقۋ-اعارتۋ مينيسترلىگىنىڭ مالىمەتىنشە، وسى جىلدىڭ توعىز ايىندا 30 مىڭنان استام بالاعا كوميسسيا جۇمىسى اياسىندا قاجەتتى كومەك كورسەتىلدى. قولداۋ ءبىلىم الۋعا قولجەتىمدىلىكتى، پسيحولوگيالىق، قۇقىقتىق جانە الەۋمەتتىك كومەكتى، سونداي-اق وڭالتۋ ءىس-شارالارىن قامتىدى.
بۇگىنگى تاڭدا ەلىمىزدە بالالار قۇقىقتارىنىڭ بۇزىلۋىنىڭ الدىن الۋ جانە ولارعا كومەك كورسەتۋ بويىنشا مەملەكەتتىك ورگاندار مەن ۇيىمداردى ۇيلەستىرۋدە نەگىزگى ءرول اتقاراتىن 235 كوميسسيا قىزمەت ەتەدى.
ولاردىڭ جۇمىس تيىمدىلىگىن ارتتىرۋ ءۇشىن 2024-جىلى نورماتيۆتىك بازاعا ەلەۋلى وزگەرىستەر ەنگىزۋ جوسپارلانۋدا. ونىڭ ىشىندە جاعدايدى باسقارۋ (كەيس-مەنەدجمەنت) جانە مەديتسينالىق-الەۋمەتتىك ەسەپكە الۋ مودەلىن ەنگىزۋ بار.
«وتباسىن قولداۋ ورتالىقتارىمەن ءوزارا ءىس-قيمىلعا ەرەكشە نازار اۋدارىلاتىن بولادى. بۇل قيىن ومىرلىك جاعدايلارداعى بالالاردى جانە ولاردىڭ وتباسىلارىن كەشەندى سۇيەمەلدەۋدى قامتاماسىز ەتۋگە مۇمكىندىك بەرەدى. سونداي- اق، وبلىستىق، قالالىق جانە اۋداندىق كوميسسيالار اراسىنداعى ءوزارا ارەكەتتەسۋى ناقتى اجىراتىلاتىن بولادى. بۇل بالالاردىڭ قۇقىقتارىن قورعاۋ جۇيەسىنىڭ جالپى تيىمدىلىگىن ارتتىرادى جانە مەملەكەتتىك باسقارۋ دەڭگەيلەرى اراسىنداعى ءىس-قيمىلداردى ۇيلەستىرۋدى جاقسارتىپ، مۇقتاج بالالارعا كومەك كورسەتۋدى ايتارلىقتاي جىلدامداتادى»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
اتالعان شارالار بالالاردىڭ قۇقىقتارىن قورعاۋ جۇيەسىن نىعايتۋعا جانە ومىرلىك قيىن جاعدايعا تاپ بولعان ءاربىر بالاعا ۋاقىتىلى، ساپالى كومەكتى قامتاماسىز ەتۋگە باعىتتالعان.
بيىل 9 ايدا بالاسىنا دۇرىس ءتالىم-تاربيە بەرە الماعان 345 ادام اتا-انا قۇقىعىنان ايىرىلعانىن جازعان بولاتىنبىز.
