كامبودجا مەن ساۋد ارابياسى قىتايداعى قىسقى ازيا ويىندارىنا العاش رەت قاتىسادى

بەيجىڭ. KAZINFORM - قىتاي حالىق رەسپۋبليكاسىنىڭ مەملەكەتتىك كەڭەسى (ۇكىمەت) باسپا ءسوز قىزىمەتى بۇگىن باسپا ءسوز ماسليحاتىن وتكىزىپ، IX قىسقى ازيا ويىندارىنىڭ دايىندىق بارىسىمەن تانىستىردى.

قىسقى ازيا ويىندارىن ۇيىمداستىرۋ كوميتەتى باس حاتشىسىنىڭ ورىنباسارى، حاربين قالالىق حالىق ۇكىمەتى مەرىنىڭ ورىنباسارى چجان حايحۋانىڭ ايتۋىنشا، ازيانىڭ تروپيكالىق ايماعىندا ورنالاسقان ەلدەرى قىسقى سپورتقا قىزىعۋشىلىعى ارتىپ كەلە جاتىر.

ونىڭ ايتۋىنشا، نەپال، بۋتان، ءۇندىستان، سينگاپۋر، مالايزيا، تايلاند، بىرىككەن اراب امىرلىكتەرى، كۋۆەيت جانە باتىس ازياداعى باسقا ەلدەر سپورتشىلارى تاۋ شاڭعى جارىسىنا قاتىسۋعا ءوتىنىش بەرگەن.

سونداي-اق، كامبودجا مەن ساۋد ارابياسى قىسقى ازيا ويىندارىنا العاش رەت قاتىسقالى وتىر.

ايتا كەتەرلىگى، قىسقى ازيا ويىندارى وتەتىن جارىس الاڭدارى مەن ارەنالار، يابۋلي تاۋ شاڭعىسى كۋرورتىنداعى تەمىرجول ينفراقۇرىلىمىن جاڭارتۋ جۇمىستارى اياقتالدى.

بۇعان دەيىن حابارلاعانىمىزداي، 2025-جىلى حاربين قالاسىندا وتەتىن ءدۇبىرلى دودا تاريحتا ەڭ كوپ ەل قاتىسقان قىسقى ازيادانىڭ ءبىرى بولماق.

سونىمەن قاتار، ۇ و ك وكىلدەرى حاربين قالاسىندا وتكەن قىسقى ازيا ويىندارىنا دايىندىق سەمينارىنا قاتىسقان ەدى.

اۆتور مۇحتار حاليموللا