كانەلو دايىندالا بەر - جانىبەك ءالىمحان ۇلى

31-قازاندا ساۋد ارابياسىنىڭ ەر-رياد قالاسىندا كانەلو مەن كريستيان مبيللي اراسىندا جەكپە-جەك ءوتتى. مەكسيكالىق بوكسشى تورەشىلەردىڭ ءبىراۋىزدان شىعارعان شەشىمىمەن جەڭىسكە جەتىپ، ەكىنشى ورتا سالماقتا WBC تۇجىرىمى بويىنشا الەم چەمپيونى اتاندى.

جەكپە-جەكتەن كەيىن جانىبەك ءالىمحان ۇلى كانەلوعا ۇندەۋ جاسادى.

«دايىن بول! مەن كەلە جاتىرمىن»، - دەپ جازدى قازاقستاندىق.

كانەلو مەن مبيللي اراسىنداعى كەزدەسۋگە دەيىن-اق قازاقستاندىق بوكسشى كەلەسى جىلعا جوسپارلارىن بەلگىلەپ قويعان بولاتىن. ول مامىردا وسى جەكپە-جەكتىڭ جەڭىمپازىمەن كەزدەسكىسى كەلەتىنىن مالىمدەدى.

«قاڭتاردا مەن سۋپەر ورتا سالماقتا چەمپيوندىق اتاقتى جەڭىپ الامىن. ال مامىردا وسى جەكپە-جەكتىڭ جەڭىمپازىمەن كەزدەسىپ، تيتۋلداردى بىرىكتىرگىم كەلەدى»، - دەپ جازدى ءالىمحان ۇلى.

جانىبەك ءالىمحان ۇلى 2027-جىلعى 23-قاڭتاردا العاش رەت جاڭا سالماق دارەجەسىندە شارشى الاڭعا شىعادى. ونىڭ قارسىلاسى - جەڭىلىس كورمەگەن دانيالىق بوكسشى ياكوب بانك، ال باسكە WBO نۇسقاسى بويىنشا بوس تۇرعان الەم چەمپيونى اتاعى تىگىلەدى.

ايتا كەتەيىك، جانىبەك ءالىمحان ۇلى مەن ونىڭ كومانداسى رينگتە ءالى دە ونەر كورسەتىپ جۇرگەن ەڭ بەدەلدى بوكسشىلاردىڭ بىرىمەن جۇدىرىقتاسۋ نيەتى تۋرالى كوپتەن بەرى ايتىپ ءجۇر.

كانەلو دەگەن كىم؟

36 جاستاعى مەكسيكالىق ساۋل الۆارەس - الەمدەگى ەڭ تانىمال بوكسشىلاردىڭ ءبىرى. ول سۋپەر ورتا سالماقتا بوكستان ابسوليۋت الەم چەمپيونى بولعان، سونداي-اق، باسقا دا سالماق دارەجەلەرىندە باق سىناعان.

ونىڭ كاسىپقوي بوكستاعى ەسەبىندە 68 جەكپە- جەك بار، ونىڭ 63 ىندە جەڭىسكە جەتكەن (39 ى مەرزىمىنەن بۇرىن).

ونىڭ قازاقستاندىق گەننادي گولوۆكينمەن تەكەتىرەسى بوكس تاريحىندا ماڭگى قالادى. 2017-2022-جىلدار ارالىعىندا ولار ءۇش رەت كەزدەسىپ، بارلىق جەكپە-جەك تولىق راۋندتارعا سوزىلدى. العاشقى كەزدەسۋدە تورەشىلەر تەڭ ناتيجە تىركەسە، ەكىنشى جانە ءۇشىنشى جەكپە-جەكتە جەڭىستى مەكسيكالىققا بەردى.

قازىر كانەلونىڭ ەشقانداي چەمپيوندىق تيتۋلى جوق - ول بىلتىر تورەشىلەر شەشىمىمەن جەڭىلىپ، بەلبەۋلەرىن تەرەنس كروۋفوردقا بەرىپ قويعان ەدى. سونىمەن قاتار، ونىڭ فرانسيالىق كريستيان مبيلليمەن ەكىنشى ورتا سالماقتا WBC تيتۋلى ءۇشىن جەكپە-جەگى جوسپارلانعان بولاتىن.