كالاشنيكوۆ اۆتوماتىنىڭ قازاقستانداعى ءوندىرىسى نەگە توقتاپ تۇر
ونەركاسىپ جانە قۇرىلىس ۆيتسە-ءمينيسترى ازامات بەيىسبەكوۆ كالاشنيكوۆ اۆتوماتىنىڭ قازاقستانداعى ءوندىرىسى نەگە توقتاپ تۇرعانىن ايتتى، دەپ حابارلايدى Kazinform.
«ءبىر جىلدارى قازاقستاندا ا ك-74 اۆتوماتتارى وندىرىلەدى دەگەن اقپارات شىققان. سول قارۋدىڭ ءوندىرىسى ءبىزدىڭ ەلدە جولعا قويىلدى ما؟» دەپ سۇرادى جۋرناليست سەنات وتىرىسىنان كەيىن.
ازامات بەيىسبەكوۆتىڭ ايتۋىنشا، اقمولا وبلىسىندا «تىنىس» دەگەن كاسىپورىن اۆتومات وندىرىسىمەن اينالىسقان.
«ءسىز ايتىپ وتىرعان ءوندىرىس سول جەردە ۇيىمداستىرىلدى. الايدا قازىر بەلسەندى شىعارىلىپ جاتقان ءونىم جوق. ويتكەنى نارىق پەن قاجەتتىلىك شەكتەۋلى» - دەدى ۆيتسە-مينيستر.
سونداي-اق، ول جوسپار بويىنشا زاۋىتتاعى ءوندىرىستىڭ جەرگىلىكتى ۇلەسى جىل سايىن ارتىپ وتىرۋ كەرەك بولعانىن ايتادى.
«ءبىراق، جاڭا ايتقانىمداي، قاجەتتىلىك شەكتەۋلى. قازىرگى تاڭدا ەلىمزدە قارۋ-جاراق ەكسپورتىنا شەكتەۋ قويىلعانىن بىلەسىزدەر. سوندىقتان، ءوندىرىس قازىر ۋاقىتشا توقتاتىلدى»، - دەدى ازامات بەيىسبەكوۆ.
