ەكۆادوردا ەسىرتكى مافياسى مەن ەلدىڭ قارۋلى كۇشتەرى قاقتىعىسىپ جاتىر

  ەكۆادور مافياسى پرەزيدەنت جاريالاعان توتەنشە جاعدايعا جاۋاپ رەتىندە بۇكىل ەلدە تارتىپسىزدىكتەر مەن قاقتىعىستار ۇيىمداستىردى.

ەسىرتكى كارتەلىنىڭ مۇشەلەرى تىكەلەي ەفيردە تەلەارنانى باسىپ الىپ، بىرنەشە پوليتسيا قىزمەتكەرىن كەپىلگە الدى، تۇرمەلەردە بۇلىك شىعاردى. Kazinform بۇل تۋرالى BBC گە سىلتەمە جاساپ حابارلايدى.

جاڭا پرەزيدەنت دانيەل نوبوا سەيسەنبى كۇنى 22 مافيالىق توپتى لاڭكەستىك ۇيىم دەپ اتاپ، ەلدە ىشكى قارۋلى قاقتىعىس ءجۇرىپ جاتقانىن ايتتى.

ءبىر كۇن بۇرىن تۇرمەدەن مافيالىق توپتاردىڭ ءبىرىنىڭ جەتەكشىسى جوعالىپ كەتكەننەن كەيىن پرەزيدەنت نوبوا ەلدە توتەنشە جاعداي جاريالادى. توتەنشە جاعداي پوليتسيا مەن اسكەريلەرگە كەڭەيتىلگەن وكىلەتتىلىكتى، قوعامدىق جيىندارعا تىيىم سالۋدى جانە كومەندانتتىق ساعاتتى قامتاماسىز ەتەدى.

ەكۆادورداعى الەۋمەتتىك جەلى قولدانۋشىلارى سەيسەنبى كۇنى كوشەلەردەگى قارۋلى ادامداردى، ورتەنگەن كولىكتەردى، ءتىپتى جارىلىستاردىڭ ۆيدەولارى مەن فوتوسۋرەتتەرىن جاريالادى.

سەيسەنبى كۇنى كەشكىسىن پوليتسيا قاقتىعىستار كەزىندە 10 ادامنىڭ قازا تاپقانىن حابارلادى.

تەلارنانى باسىپ الۋ

سەيسەنبى كۇنى بەتپەردە كيگەن ءبىر توپ قارۋلى ادام تىكەلەي ەفير كەزىندە گۋاياكيل پورتىنداعى TC تەلەستۋدياسىنا باسىپ كىردى. ولار تەلەارنا قىزمەتكەرلەرىنە ەدەنگە جاتۋدى بۇيىردى. كادر سىرتىندا اتىس پەن ايقاي ەستىلدى.

كوپ ۇزاماي تىكەلەي ەفير ءۇزىلدى. ارتىنشا قارۋلانعان ادامدار تەلەارنا عيماراتىنان شىعىپ، ءبىراز ۋاقىتتان كەيىن پوليتسيا ولاردىڭ بارلىعى قاماۋعا الىنعانىن ايتىپ، ەدەندە قولدارى بايلانعان ادامداردىڭ سۋرەتتەرىن جاريالادى.

ەكۆادور پوليتسياسىنىڭ باسشىسى سەزار ساپاتا جۋرناليستەرگە 13 ادامنىڭ ۇستالعانىن، ولاردان بىرنەشە اتىس قارۋى، ەكى گراناتا مەن جارىلعىش زات تابىلعانىن ايتتى.

پوليتسيانىڭ حابارلاۋىنشا، تەلەارنانىڭ بارلىق قىزمەتكەرلەرى امان.

پوليتسيا مەن اسەريلەرگە شابۋىل

ەكۆادور جانە حالىقارالىق باسپا ءسوزدىڭ حابارلاۋىنشا، دۇيسەنبى جانە سەيسەنبى كۇندەرى ەلدىڭ ءار ايماعىندا، ونىڭ ىشىندە ەل استاناسى كيتودا جەتى ەكۆادور پوليتسياسىنىڭ قىزمەتكەرى كەپىلگە الىنعان.

كۋەنكا قالاسىندا بەلگىسىز بىرەۋلەر اسكەري جۇك كولىگىنە قولدان جاسالعان بومبا لاقتىرعان. پوليتسيانىڭ حابارلاۋىنشا، ەسمەرالدا پروۆينتسياسىندا ءۇش رەت جارىلعىش زات قولدانىلعان.

ەكۆادوردىڭ تاعى بىرنەشە جەرىندە جارىلىس بولدى.

بىرنەشە قالادا قاراقشىلار كولىكتەردى ورتەپ جىبەردى. سونىمەن بىرگە كيتودا پوليتسيا وتقا ورانعان ءبىر كولىكتەن گاز باللوندارىن تاپتى، قىلمىسكەرلەر ولاردى جارىلۋى مۇمكىن دەپ كۇتكەن بولۋى مۇمكىن.

تۇرمەدەگى تارتىپسىزدىكتەر

ەكۆادوردىڭ 24 پروۆينتسياسىنىڭ التاۋىنداعى تۇرمەلەردە تارتىپسىزدىكتەر بولدى، كەيبىر جاعدايلاردا كۇزەتشىلەر كەپىلگە الىندى، دەپ حابارلادى ەكۆادور تۇرمە باسشىلىعى SNAI.

ارنايى پوليتسيا مەن اسكەري جاساقتار ەل و ر و، لوحا، چيمبوراسو، سوتوپاشي، اسۋاي جانە پيچينچا پروۆينتسيالارىنداعى تۇرمەلەردەگى تارتىپسىزدىكتەردى باسۋعا ءماجبۇر بولدى. ارتىنشا اسكەريلەر تۇرمە اۋلالارىندا ساربازداردىڭ قورشاۋىندا تۇرعان جارتىلاي جالاڭاش تۇتقىنداردىڭ سۋرەتتەرىن جاريالادى.

سەيسەنبى كۇنى اند تاۋىنداعى تۇرمەدەن 32 تۇتقىن قاشىپ شىقتى، ولاردىڭ اراسىندا لوس- لوبوس مافيا توبىنىڭ جەتەكشىسى فابريسيو كولون پيكو دا بار. ول ەلدىڭ باس پروكۋرورىن ءولتىرۋدى جوسپارلادى دەگەن ايىپپەن جۇما كۇنى عانا قاماۋعا الىنعان بولاتىن.

قاشقىنداردىڭ 20 سى دەرەۋ ۇستالدى، ءبىراق قالعاندارى ءالى قاشىپ ءجۇر، ولاردىڭ قاتارىندا پيكو دا بار.

پرەزيدەنت نوبوا تۇرمەدەگى تارتىپسىزدىكتەر- ونىڭ تۇزەۋ مەكەمەسىن باقىلاۋعا الۋ ارەكەتىنە مافيانىڭ رەاكتسياسى ەكەنىن ايتتى.

كورشىلەر شەكارا كۇزەتىن نىعايتىپ جاتىر

پەرۋ ۇكىمەتى سەيسەنبى كۇنى ەكۆادورمەن سولتۇستىك شەكارادا توتەنشە جاعداي جاريالادى. پرەمەر-مينيستر البەرتو وتارولا پوليتسياعا كومەكتەسۋ ءۇشىن شەكاراعا قوسىمشا كۇش جىبەرىلەتىنىن مالىمدەدى.

ىشكى ىستەر ءمينيسترى شەكاراعا قوسىمشا پوليتسيا بولىمشەلەرى جونەلتىلەتىنىن بۇعان دەيىن دە حابارلاعان. كورشىلەس ەل تارتىپسىزدىكتەر مەن زاڭسىزدىقتاردان قاشقان ەكۆادورلىقتار ەلگە قاشىپ كىرەدى دەپ قاۋىپتەنەدى.

بۇلىك نەدەن باستالدى

وتكەن جىلدىڭ قازان ايىندا ەكۆادورداعى پرەزيدەنت سايلاۋىندا جەڭىسكە جەتكەن دانيەل نوبوا ەلدە ورىن العان قىلمىس تولقىنىن اۋىزدىقتاۋعا ۋادە بەردى.

ەكۆادور ۇزاق ۋاقىت بويى ءوزارا شيەلەنىستەرى بار ەكى ءىرى كوكاين ءوندىرۋشى ەل - كولۋمبيا مەن پەرۋدىڭ ورتاسىندا تىرشىلىك ەتىپ كەلە جاتقان تىنىش ارال. ءبىراق سوڭعى جىلدارى ەسىرتكى مافياسىنىڭ توپتارى بۇل ەلدە دە كۇشەيدى.

ەكۆادوردا كىسى ءولتىرۋ كورسەتكىشى 2018-2022 -جىلدار ارالىعىندا ءتورت ەسەگە ءوستى. 2022 -جىلى 17 ميلليون حالقى بار ەلدە 7800 ادام قازا تاپتى. سول جىلى پوليتسيا 220 توننا ەسىرتكى تاركىلەدى.

تۇرمەلەردەگى قاندى قاقتىعىستار بولەك ماسەلەگە اينالدى: 2021 -جىلدىڭ اقپان ايىنان بەرى 460 تان استام تۇتقىن قازا تاپتى.

بريتاندىق Financial Times گازەتى جازعانداي، مافيا ەكۆادوردا 2007-2017 -جىلدار ارالىعىندا بيلىك ەتكەن سولشىل پرەزيدەنت رافاەل كوررەا تۇسىندا وركەندەي باستادى. ونىڭ تۇسىندا بيلىك تىنىق مۇحيتىنداعى ەكۆادور پورتتارى ارقىلى ەسىرتكى تاسىمالىنا كوز جۇما قارادى.

ءبىراق ەسىرتكى ساۋداسى بانديتيزمگە ۇلاستى، ال كوررەانىڭ مۇراگەرلەرى بۇدان بىلاي ونىمەن كۇرەسە المادى.

اۆتور

ەربول جانات