كادرلىق رەزەرۆكە الىنعان پەداگوگ مەكتەپكە كونكۋرسسىز ديرەكتور بولىپ تاعايىندالادى
استانا. KAZINFORM - «بىلىمدەگى وزگەرىستەردىڭ 1000 كوشباسشىسى» جوباسىنا قاتىسىپ رەزەرۆكە الىنعان قاراپايىم پەداگوگ شالعايداعى اۋىل مەكتەبىنە كونكۋرسسىز ديرەكتورى بولىپ تاعايىندالادى.
بۇل تۋرالى بۇگىن اتالعان جوبا قاتىسۋشىلارىنا سەرتيفيكات تاپسىرۋ راسىمىندە وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ ءتوراعاسى قانىبەك جۇماشيەۆ ايتتى.
«قازاقستاندا 2023-جىلى تۇڭعىش رەت ءبىلىم بەرۋ سالاسىندا «بىلىمدەگى وزگەرىستەردىڭ 1000 كوشباسشىسى» جاڭا جوباسى باستالعان بولاتىن. بۇل جوبا پرەزيدەنتتىك جاستار كادرلىق رەزەرۆى سياقتى ءبىلىم بەرۋ سالاسىندا كادرلىق رەزەرۆتى قالىپتاستىرۋعا باعىتتالعان. بۇرىن ءبىلىم بەرۋ جۇيەسىندە مەكتەپتەردىڭ، ءبىلىم بەرۋ ۇيىمدارىنىڭ باسشىلارىن تاعايىنداۋ كونكۋرس ارقىلى جانە نەگىزىنەن مامانداردىڭ بىلىكتىلىگىنە، جيناعان ەڭبەك وتىلىنە قاراي جۇزەگە اسىرىلدى. ءبىراق، الەمدىك تاجىريبەنى زەرتتەي كەلە بايقاعانىمىز، ەۋروپا ەلدەرىندە، ا ق ش- تا ءبىلىم بەرۋ ۇيىمدارىنىڭ باسشىلارىن تاعايىنداۋ ارنايى دايىندىقتان وتكەننەن كەيىن عانا جۇزەگە اسىرىلادى. وسىنى ەسكەرە كەلە وقۋ-اعارتۋ مينيسترلىگى ارنايى باعدارلاما جاساپ، 4 ساتىدان وتەتىن وقۋدى ۇيىمداستىردى»، - دەدى ول.
ونىڭ اتاپ وتۋىنشە، بىلتىر بۇل جوباعا مەكتەپ ديرەكتورلارىنىڭ 8 مىڭنان استام ورىنباسارى قاتىستى. 4 ساتىدان وتكەن 207 ادام كادرلىق رەزەرۆكە الىندى. ال ولاردىڭ 170 ءى مەكتەپ ديرەكتورى بولىپ تاعايىندالدى.
«ولاردىڭ باسقا مامانداردان ايىرماشىلىعى كادرلىق رەزەرۆكە الىنعان مامان كونكۋرسسىز باسشىلىققا تاعايىندالادى. رەزەرۆتەن ديرەكتورلىق لاۋازىمعا تاعايىندالعان پەداگوگقا «جوعارى دەڭگەيدەگى باسشى» دەگەن ارنايى سانات بەرىلەدى. ولاردىڭ جالاقىسى 2 ەسەگە دەيىن وسەدى. بۇل جوبانىڭ ماقساتى - باسقارۋ جۇيەسىن كۇشەيتۋ، سول ارقىلى ءبىلىم ساپاسىن ارتتىرۋ»، - دەدى كوميتەت ءتوراعاسى.
قانىبەك جۇماشيەۆتىڭ دەرەگىنشە، بيىل جوباعا 13 مىڭنان استام ادام قاتىستى. ونىڭ ىشىندە 376 ادام كادرلىق رەزەرۆكە ءوتتى.
«جوبانىڭ بيىلعى ايىرماشىلىعى قاراپايىم پەداگوگتاردىڭ دا قاتىسۋىنا مۇمكىندىك بەردىك. ولار مەكتەپ ديرەكتورىنىڭ ورىنباسارى لاۋازىمىنا كونكۋرسسىز تاعايىندالادى. سونىمەن قاتار، شالعاي اۋىلدارداعى مەكتەپتەردە كادر جەتىسپەيدى. ولارعا ديرەكتور بولىپ باراتىن مامانداردىڭ دا ۇلەسى از. سوندىقتان، ءبىز كادرلىق رەزەرۆكە ەنگەن قاراپايىم پەداگوگتەردى شالعاي اۋىلداعى مەكتەپكە ديرەكتور بولامىن دەسە، كونكۋرسسىز نەگىزدە تاعايىندايمىز. كادرلىق رەزەرۆكە ەنگەن پەداگوگتەر ءبىلىم سالاسىنا جاڭا لەپ اكەلەدى دەپ وتىرمىز»، - دەدى ول.
بۇعان دەيىن حابارلاعانىمىزداي، قازاقستاندا پرەزيدەنتتىڭ كادرلىق رەزەرۆىنە ىرىكتەۋ ەرەجەسى وزگەرتىلدى.
