«كابيرحان» قاتىسقان ات بايگەسىنىڭ رەجيسسەرى كوشپەندىلەر ويىنىنا كەلدى
استانا. KAZINFORM - بريتاندىق رەجيسسەر دجوناتان ەدۆاردس «قازاقستان» تەلەراديوكورپوراتسياسىنىڭ شاقىرۋىمەن استانادا ءوتىپ جاتقان V دۇنيەجۇزىلىك كوشپەندىلەر ويىنىنا كەلدى. بۇل تۋرالى «Qazaqstan» ۇلتتىق تەلەارناسى حابارلادى.
الەمدىك دەڭگەيدەگى ات جارىستارى مەن سپورتتىق شارالاردىڭ رەجيسسەرى 13-قىركۇيەك كۇنى «Qazsport» تەلەارناسىنان تىكەلەي ەفيردە كورسەتىلەتىن بايگەنىڭ ترانسلياتسياسىنا رەجيسسەرلىك ەتەدى. بۇگىن «قازاقستان» تەلەراديوكورپوراتسياسىنىڭ ءتۇسىرلىم توبىمەن بىرگە «قازانات» يپپودرومىندا بولىپ، كورپوراتسيانىڭ تەحنيكالىق مۇمكىندىكتەرىمەن تانىستى.
دجوناتان ەدۆاردس - 20 جىلدان استام تاجىريبەسى بار سپورت رەجيسسەرى. رەگبي، بادمينتون، ترياتلون، اۆتو، موتوسپورت، گولف، حوككەي جانە ات سپورتىنان حالىقارالىق جارىستارعا، ونىڭ ىشىندە قازاقستاندىق سايگۇلىك «كابيرحان» قاتىسقان دۋبايداعى «Al Maktoum Challenge» تۋرنيرىنە رەجييسەرلىك ەتكەن.
كوشپەندىلەر ويىندارى اياسىنداعى ات جارىسى «Qazsport» تەلەارناسىنان 13-قىركۇيەك كۇنى استانا ۋاقىتىمەن ساعات 09.00 دەن باستاپ كورسەتىلەدى. تىكەلەي ەفير ترانسلياتسياسى ارنانىڭ You Tube, Facebook, Tik-Tok جەلىسىندەگى پاراقشالارى ارقىلى تاراتىلادى.
ەسكە سالا كەتەيىك، جىل باسىندا قازاقستاندىق سايگۇلىك كابيرحان دۋبايدا وتكەن جارىستا توپ جارعان ەدى. تالاي شەتەلدىكتى تاڭداي قاقتىرعان تۇلپار قازاقستاننىڭ اتىن الەمگە تانىتتى.
