كۇن كۇرت سۋىتىپ، ۇسىك جۇرەدى: قىركۇيەكتە اۋا رايى قانداي بولادى

استانا مەن الماتىدا توپىراق بەتىنە ۇسىك ءتۇسۋى دە ىقتيمال. «قازگيدرومەت» 2026-جىلدىڭ قىركۇيەگىنە ارنالعان كونسۋلتاتيۆتىك بولجامىن جاريالادى.

ەل بويىنشا تەمپەراتۋرا قانداي بولادى؟

قىركۇيەكتە قازاقستاننىڭ كوپ بولىگىندە ورتاشا ايلىق اۋا تەمپەراتۋراسى 9+15+ گرادۋس شاماسىندا بولادى. وڭتۇستىك-باتىستا، سونداي-اق سولتۇستىك-باتىس پەن ورتالىقتىڭ جەكەلەگەن اۋداندارىندا 16+22+ گرادۋس كۇتىلەدى.

جالپى، قىركۇيەكتە اۋا تەمپەراتۋراسى كليماتتىق نورما شاماسىندا بولادى. تەك باتىس قازاقستان وبلىسىنىڭ باسىم بولىگىندە، اتىراۋ جانە ماڭعىستاۋ وبلىستارىنىڭ باتىسىندا ورتاشا ايلىق تەمپەراتۋرا نورمادان شامامەن 1 گرادۋس جوعارى بولۋى مۇمكىن.

سولتۇستىك پەن شىعىستا جاۋىن-شاشىن كوپ بولادى

قىركۇيەكتە ەلىمىزدىڭ كوپ بولىگىندە جاۋىن-شاشىن مولشەرى كليماتتىق نورما شاماسىندا بولادى. ال كەي وڭىرلەردە جاڭبىر ادەتتەگىدەن كوبىرەك جاۋۋى مۇمكىن.

سولتۇستىك قازاقستان مەن پاۆلودار وبلىستارىندا، اقمولا جانە باتىس قازاقستان وبلىستارىنىڭ باسىم بولىگىندە جاۋىن-شاشىن مولشەرى نورمادان جوعارى بولادى دەپ بولجانىپ وتىر. سونداي-اق اباي وبلىسىندا، شىعىس قازاقستان وبلىسىنىڭ سولتۇستىگىندە، قاراعاندى وبلىسىنىڭ قيىر سولتۇستىگىندە، قوستاناي وبلىسىنىڭ سولتۇستىك-شىعىسىندا جانە اتىراۋ وبلىسىنىڭ سولتۇستىك-باتىسىندا جاۋىن-شاشىن مولىراق ءتۇسۋى مۇمكىن.

ال قىزىلوردا مەن تۇركىستان وبلىستارىنىڭ باسىم بولىگىندە جاڭبىر از جاۋادى. اقتوبە وبلىسىنىڭ وڭتۇستىگىندە، جامبىل وبلىسىنىڭ سولتۇستىك-باتىسىندا جانە ماڭعىستاۋ وبلىسىنىڭ وڭتۇستىك- شىعىسىندا دا جاۋىن-شاشىن مولشەرى كليماتتىق نورمادان تومەن بولادى دەپ كۇتىلەدى.

استانادا كۇن كۇرت سۋىتىپ، ۇسىك ءجۇرۋى مۇمكىن

استانادا قىركۇيەكتىڭ ورتاشا اۋا تەمپەراتۋراسى 12,2+ گرادۋس بولادى دەپ بولجانىپ وتىر.

ايدىڭ العاشقى ونكۇندىگى اۋا رايىنىڭ كۇرت وزگەرۋىمەن باستالادى. العاشقى كۇندەرى كۇندىز اۋا تەمپەراتۋراسى 27+32+ گرادۋسقا دەيىن كوتەرىلسە، كەيىن 13+18+ گرادۋسقا دەيىن تومەندەيدى. تۇندە دە كۇن ايتارلىقتاي سالقىنداپ، تەمپەراتۋرا 15+20+ گرادۋستان 1+6+ گرادۋسقا دەيىن تۇسەدى. وسى كەزدە توپىراق بەتىندە 2 گرادۋسقا دەيىن ۇسىك ءجۇرۋى مۇمكىن. كەيىن كۇن قايتا جىلىپ، تۇندە 5+10+، كۇندىز 17+226+ گرادۋس بولادى.

ەكىنشى ونكۇندىكتە دە كۇن بىردە جىلىنىپ، بىردە سالقىندايدى. الدىمەن تۇنگى تەمپەراتۋرا 10+15+، كۇندىز 22+27+ گرادۋسقا دەيىن كوتەرىلەدى. كەيىن قايتا سالقىنداپ، تۇندە 1+6+، كۇندىز 13+18+ گرادۋس بولادى. توپىراق بەتىندە 2 گرادۋسقا دەيىن ۇسىك ءجۇرۋى ىقتيمال. ونكۇندىكتىڭ سوڭىنا قاراي كۇن قايتا جىلىنادى.

ءۇشىنشى ونكۇندىكتىڭ باسىندا سالقىن اۋا رايى كۇتىلەدى. تۇندە تەمپەراتۋرا 1+6+، كۇندىز 6+11+ گرادۋسقا دەيىن تومەندەيدى. كەيىن ازداپ جىلىپ، تۇندە 5+10+، كۇندىز 11+16+ گرادۋس شاماسىندا بولادى.

قىركۇيەكتە ەلوردادا جاڭبىرلى ءارى جەلدى كۇندەر دە بولادى. ءبىرىنشى ونكۇندىكتىڭ باسى مەن ورتاسىندا، ەكىنشى ونكۇندىكتىڭ ورتاسىندا جانە ءۇشىنشى ونكۇندىكتىڭ باسىندا جاڭبىر جاۋىپ، جەلدىڭ ەكپىنى سەكۋندىنا 15-20 مەترگە دەيىن كۇشەيۋى مۇمكىن. ەكىنشى جانە ءۇشىنشى ونكۇندىكتەردىڭ سوڭىندا تۇمان تۇسەدى دەپ بولجانعان. سونداي-اق كەي كۇندەرى بۇرشاق جاۋىپ، داۋىل تۇرۋى ىقتيمال.

الماتىدا قىركۇيەكتىڭ سوڭىندا ۇسىك ءجۇرۋى مۇمكىن

الماتىدا قىركۇيەكتىڭ ورتاشا اۋا تەمپەراتۋراسى 17,5+ گرادۋس بولادى دەپ بولجانىپ وتىر. بۇل كليماتتىق نورماعا (18+ گرادۋس) جاقىن.

ءبىرىنشى ونكۇندىكتە كۇن بىرتىندەپ سالقىندايدى. تۇندە اۋا تەمپەراتۋراسى 14+19+ گرادۋستان 4+9+ گرادۋسقا دەيىن، كۇندىز 26+31+ گرادۋستان 16+21+ گرادۋسقا دەيىن تومەندەۋى مۇمكىن.

ەكىنشى ونكۇندىكتە كۇن قايتا جىلىنادى. تۇندە 8+13+، كۇندىز 22+27+ گرادۋسقا دەيىن كوتەرىلەدى. كەيىن قايتا سالقىنداپ، تۇندە 3+8+، كۇندىز 15+20+ گرادۋس بولادى. ونكۇندىكتىڭ سوڭىنا قاراي اۋا تەمپەراتۋراسى تاعى كوتەرىلەدى دەپ كۇتىلەدى.

ءۇشىنشى ونكۇندىكتە كۇن بىرتىندەپ سۋىتادى. تۇنگى تەمپەراتۋرا 8+13+ گرادۋستان 1+6+ گرادۋسقا دەيىن، ال كۇندىز 20+25+ گرادۋستان 12+17+ گرادۋسقا دەيىن تومەندەيدى. وسى ۋاقىتتا توپىراق بەتىندە 1 گرادۋسقا دەيىن ۇسىك ءجۇرۋى ىقتيمال.

قىركۇيەكتە الماتىدا وتكىنشى جاڭبىر جيى جاۋىپ، كەي كۇندەرى جەلدىڭ ەكپىنى سەكۋندىنا 15 مەترگە دەيىن كۇشەيۋى مۇمكىن. ءبىرىنشى جانە ەكىنشى ونكۇندىكتە نايزاعاي ويناپ، ەكىنشى ونكۇندىكتىڭ باسىندا داۋىل تۇرۋى ىقتيمال. سونداي-اق ايدىڭ ەكىنشى ونكۇندىگىنىڭ سوڭىندا تۇمان ءتۇسۋى مۇمكىن.

«قازگيدرومەت» مالىمەتىنشە، ءبىر ايعا جاسالعان بولجام كونسۋلتاتيۆتىك سيپاتتا. سوندىقتان اۋا رايى تۋرالى مالىمەتتەر جاڭا دەرەكتەرگە قاراي ناقتىلانىپ وتىرادى.