چەك بولماسا، دۇكەن يەسى ساتىپ الۋشىنىڭ تاۋاردى قايتارۋ تالابىنان باس تارتا الا ما

تاۋاردى قايتارۋ، ايىرباستاۋ نەمەسە باعاعا قاتىستى داۋلار - تۇتىنۋشىلار ءجيى كەزدەسەتىن ماسەلەلەر. كوپ جاعدايدا ازاماتتار چەك جوعالعاندا ءوز قۇقىقتارىن پايدالانا المايمىز نەمەسە جەڭىلدىكپەن الىنعان تاۋاردى قايتارۋعا بولمايدى دەپ ويلايدى. الايدا قازاقستان رەسپۋبليكاسىنىڭ زاڭناماسىندا تۇتىنۋشىلاردىڭ قۇقىقتارى قورعالعان.
Kazinform ءتىلشىسى شىعىس قازاقستان وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى اندرەي تروەگلازوۆتان تۇتىنۋشىلاردى تولعاندىراتىن ەڭ وزەكتى سۇراقتاردىڭ جاۋابىن الدى.
- تاۋارلىق نەمەسە فيسكالدىق چەكتىڭ بولماۋى وزدىگىنەن تاۋاردى قايتارۋدان باس تارتۋعا نەگىز بولا المايدى. ق ر «تۇتىنۋشىلاردىڭ قۇقىقتارىن قورعاۋ تۋرالى» زاڭىنىڭ 18-بابى 2-تارماعى مەن 30-بابى 1-تارماعىنا سايكەس، ساتىپ الۋشى تاۋاردى ءدال وسى دۇكەننەن العانىن وزگە دالەلدەر ارقىلى راستاي الادى. مۇنداي دالەلدەرگە كۋاگەرلەردىڭ ايعاقتارى، فوتو نەمەسە بەينەجازبالار، بانك كارتاسىمەن جاسالعان تولەم تۋرالى ۇزىندىلەر جانە ساتىپ الۋ فاكتىسىن دالەلدەيتىن باسقا دا قۇجاتتار جاتادى، - دەپ ءتۇسىندىردى ول.
سونداي-اق ەگەر ساتىپ الىنعان تاۋاردىڭ ولشەمى، ءتۇسى نەمەسە باسقا دا سيپاتتامالارى سايكەس كەلمەسە، ساتىپ الۋشى ونى ايىرباستاۋدى تالاپ ەتۋگە قۇقىلى. بۇل ءۇشىن تاۋار پايدالانىلماعان بولۋى، تۇتىنۋشىلىق قاسيەتتەرى ساقتالۋى، پلومبالارى مەن جاپسىرمالارى بۇلىنبەۋى جانە ساتىپ الۋ فاكتىسى راستالۋى قاجەت. وسىنداي جاعدايدا ساتۋشى تاۋاردى ايىرباستاۋعا مىندەتتى. ەگەر قاجەتتى تاۋار ساتىلىمدا بولماسا، تۇتىنۋشىعا تولەنگەن قاراجات تولىق كولەمدە قايتارىلۋى ءتيىس.

- ساۋدا ورىندارىندا ءجيى كەزدەسەتىن تاعى ءبىر ماسەلە - سورەدەگى باعا مەن كاسساداعى باعانىڭ سايكەس كەلمەۋى. زاڭنىڭ 24-بابى 1-تارماعىنا سايكەس، ساتۋشى تۇتىنۋشىعا تاۋار تۋرالى، ونىڭ ىشىندە باعاسى جونىندە دۇرىس ءارى ۋاقىتىلى اقپارات بەرۋگە مىندەتتى. سوندىقتان تۇتىنۋشى تاۋاردى سورەدە كورسەتىلگەن باعا بويىنشا ساتۋدى تالاپ ەتۋگە تولىق قۇقىلى، - دەيدى اندرەي تروەگلازوۆ.

ءوز سوزىندە ول جەڭىلدىكپەن نەمەسە اكتسيا كەزىندە ساتىپ الىنعان تاۋارلارعا قاتىستى دا كەڭ تاراعان جاڭساق پىكىردى جوققا شىعاردى. مۇنداي تاۋارلار دا زاڭ تالاپتارىنا ساي بولسا، ياعني پايدالانىلماعان جانە تاۋارلىق كۇيى ساقتالعان جاعدايدا ايىرباستالادى نەمەسە قايتارىلادى.

- سوندىقتان «اكتسيامەن الىنعان تاۋار قايتارىلمايدى» دەگەن جازۋ نەمەسە اۋىزشا ءتۇسىندىرۋ زاڭ تالاپتارىنان جوعارى تۇرمايدى. تۇتىنۋشىلارعا ساتىپ الۋ كەزىندە تولەمدى راستايتىن قۇجاتتاردى ساقتاۋعا كەڭەس بەرەمىز. دەگەنمەن چەك جوعالعان كۇننىڭ وزىندە، زاڭدا كوزدەلگەن وزگە دالەلدەر ارقىلى ءوز قۇقىقتارىن قورعاۋعا مۇمكىندىك بار. ەڭ باستىسى، تۇتىنۋشى ءوز قۇقىقتارىن ءبىلىپ، قاجەت بولعان جاعدايدا زاڭ اياسىندا تالاپ قويا الۋى ءتيىس، - دەيدى دەپارتامەنت باسشىسىنىڭ ورىنباسارى.