جۇزىك، ساقينا، تيىن: تاريحي جادىگەرلەر مەملەكەتكە قايتارىلدى
استانا. KAZINFORM - قايتارىلعان جادىگەرلەر ۇلتتىق مۋزەيدىڭ قورىنا سالتاناتتى تۇردە تاپسىرىلدى، دەپ حابارلايدى «قايتارىلعان اكتيۆتەردى باسقارۋ كومپانياسى» ج ش س.
اتالعان ارتەفاكتىلەر مەملەكەتتىك مەنشىككە قايتارىلىپ، «قايتارىلعان اكتيۆتەردى باسقارۋ كومپانياسى» ج ش س- نە بەرىلگەن بولاتىن. ولاردىڭ تاريحي جانە مادەني قۇنى جوعارى بولۋى مۇمكىن ەكەنىن ەسكەرىپ، باسقارۋشى كومپانيا مادەنيەت جانە اقپارات مينيسترلىگىنە جۇگىنگەن ەدى.
بۇيىمداردىڭ ءتۇپنۇسقالىعىن انىقتاۋ مەن ساراپتامالىق باعالاۋ جاساۋ ءۇشىن ارتەفاكتىلەر ۇلتتىق مۋزەيگە جىبەرىلدى. مۋزەيدەگى ساراپشىلاردىڭ قورىتىندىسى بويىنشا بۇل جادىگەرلەر تەمىر ءداۋىرىنىڭ ەرتە كەزەڭى مەن ورتا عاسىرعا ءتان جوعارى قۇندىلىققا يە. سونىڭ ناتيجەسىندە ەلىمىزدىڭ زاڭدارى مەن بەلگىلەنگەن راسىمدەرگە سايكەس قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتى باعا جەتپەس قازىنانى ۇلتتىق مۋزەيدىڭ مۇرا قورىنا بەرۋ تۋرالى شەشىم قابىلدادى.
ساراپتامالىق قورىتىندىعا سايكەس اتالعان بۇيىمدار ب. ز. د. VII عاسىردان ب. ز. III عاسىرىنا دەيىنگى كەزەڭىنە جاتادى جانە ەجەلگى كوشپەلى حالىقتاردىڭ مادەنيەتىنە ءتان، ناقتى ايتقاندا ساقتاردىڭ «اڭ ءستيلى» مانەرىندە جاسالعان. قولونەردىڭ بۇل ءتۇرى جوعارى كوركەمدىك شەبەرلىكپەن بىرگە ساقتاردىڭ گرەكتەرمەن، پارسىلارمەن، قىتايلارمەن جانە باسقا دا كورشى حالىقتارمەن تىعىز مادەني بايلانىستا بولعانىن بايقاتىپ وتىر.
تاپسىرىلعان بۇيىمداردىڭ ىشىندە:
- بۇركىتتىڭ باسى بەينەلەنگەن مەتال بۇيىم؛
-اراب جازۋى بار جۇزىك؛
- ءمۇيىزدى اڭ بەينەلەنگەن (تاۋ ۇستىندە) تىك بۇرىشتى پلاستينا؛
- قاناتتى ارىستان، پىراق (قاناتتى جىلقى)، قارعىعان بارىس پەن بۇعىنىڭ مۇسىندەرى؛
- 15 كونە تيىن؛
- شيىرشىق تۇرىندەگى ەكى جۇزىك؛
- ارىستاننىڭ باسى بەينەلەنگەن ساقينا بار.
تاپسىرىلعان جادىگەرلەردىڭ جالپى سالماعى 118 گرامنان اسادى. ەرەكشە اتاپ وتەرلىك جايت - بۇيىمدار شەكىمە، بەدەرلەۋ جانە «گراۆيروۆكا» ادىستەرىمەن جاسالعان، بۇل دالا مادەنيەتىنىڭ ستيليستيكالىق ەرەكشەلىكتەرى مەن گرەك، پارسى جانە شىعىس ونەرىنىڭ ىقپالىن كورسەتەدى.
- ق ر باس پروكۋراتۋراسى جانىنداعى اكتيۆتەردى قايتارۋ كوميتەتى مەن قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ ۇيلەسىمدى جۇمىسىنىڭ ناتيجەسىندە ۇلتتىق يگىلىك رەتىندە تانىلعان قۇندى زاتتار رەسمي تۇردە مەملەكەتتىك مەنشىككە بەرىلىپ، ۇلتتىق مۋزەي قورىنا تابىستالدى. بۇل مەملەكەت باسشىسى اتاپ وتكەن ماڭىزدى قاعيداتتىڭ جارقىن دالەلى، ياعني ءاربىر قايتارىلعان اكتيۆ ەل يگىلىگىنە جۇمسالۋى ءتيىس. بۇگىن ءبىز وسى قاعيداتتىڭ ناقتى جۇزەگە اسقانىنا كۋا بولدىق - بۇل اكتيۆ حالقىمىزدىڭ مادەني مۇراسىنىڭ ءبىر بولىگىنە اينالدى، - دەدى «قايتارىلعان اكتيۆتەردى باسقارۋ كومپانياسى» ج ش س- ءنىڭ باس ديرەكتورى قۋانىشبەك مۇقاش.
جاقىن ارادا وسى ارتەفاكتىلەر ۇلتتىق مۋزەيدىڭ ەكسپوزيتسيالارىنا قويىلىپ، كوپشىلىكتىڭ نازارىنا ۇسىنىلادى.
ايتا كەتەيىك، بۇگىندە قايتارىلعان اكتيۆتەر وڭىرلەردى دامىتۋعا جۇمسالىپ جاتىر. اتاپ ايتساق، جامبىل وبلىسىندا 5 اۋىز سۋ نىسانىنىڭ قۇرىلىسىنا قارجى ءبولىندى.
س ق و- دا قايتارىلعان اكتيۆتەر ەسەبىنەن 33 الەۋمەتتىك جوبا ىسكە اسىرىلىپ جاتىر.
سونداي-اق ۇلىتاۋ وبلىسىندا بيىل قايتارىلعان اكتيۆتەر ەسەبىنەن 11 نىسان سالىنادى.
ودان بولەك پاۆلودار اۋىلدارىندا قايتارىلعان اكتيۆتەر ەسەبىنەن امبۋلاتوريالار بوي كوتەرەدى.
