جىگىتتەردىڭ ۇيلەنگىسى كەلمەۋىنىڭ كەيبىر سەبەپتەرى

ۇيلەنگەن دوستارىنا قاراپ وتباسىلىق ومىرگە اسىقپايتىن جاندار كوپ. قازىر ۇيلەنبەي جۇرگەن ەر-ازاماتتار بارشىلىق ەكەنى جاسىرىن ەمەس. پسيحولوگ ماماندار ۇيلەنۋگە اسىقپاۋدىڭ بىرنەشە سەبەبىن ۇسىنىپتى.

وتكەن كۇندەر ساتسىزدىگى 

كەيبىر ەر ازاماتتاردىڭ سۇيىكتىسى ۇسىنىسىنان باس تارتسا نەمەسە وپاسىزدىق جاساسا، قايتا قارىم-قاتىناس قۇرىپ، ۇيلەنۋگە دەگەن نيەتى قاشۋى مۇمكىن. 

ۋاقىتى جوق

كارەرا قۋىپ ءجۇرىپ قارىم-قاتىناس ورناتۋ وتە قيىن. نەگىزگى ماقسات قىزمەتتە ءوسۋ، بيزنەس اشۋ، قاراجات تابۋ بولعان كەزدە، قىزبەن كەزدەسىپ، ونى اندا-مۇندا اپارۋعا ۋاقىتى تاپشى. وتباسىلىق ءومىر - بۇل تەك اقشا تاۋىپ، ۇيگە كەلىپ تاماقتانىپ، ۇيىقتاپ قايتا جۇمىسقا كەتەتىن ەمەس. بۇل دا مول جاۋاپكەرشىلىكتى قاجەت ەتەتىن، جۇگى اۋىر جۇمىستاردىڭ ءبىرى. ال قوس جۇمىستى قاتار الىپ ءجۇرۋ كەيبىر جانداردىڭ قولىنان كەلە بەرمەيدى.

جاۋاپكەرشىلىكتەن قورقاتىندار دا بار

مىندەت پەن جاۋاپكەرشىلىكتەن قورقۋ - بۇل ەر ازاماتتىڭ وتباسىن قۇرۋعا اسىقپاۋىنىڭ كەڭ تارالعان سەبەبىنىڭ ءبىرى.

بويداق ومىرمەن قوشتاسقىسى كەلمەۋى مۇمكىن 

ۇيلەنگەن دوستارىنا قاراپ وتباسىلىق ومىرگە اسىقپايتىن جاندار كوپ. تاماعىڭ دايىن، سۇيەتىن، قۇرمەتتەيتىن جان بار، ءبىراق سول ادام تەلەفونىڭدى تەكسەرەدى، بۇرىنعىداي ۇيگە كەشتەتىپ قايتۋ، قالاساڭ دوستارىڭنىڭ ۇيىندە قونىپ قالۋ دەگەن بولمايدى. جالپى العاندا ەركىندىگىنەن اجىراعىسى كەلمەيتىندەر بار.

قىزدارمەن سويلەسە الماۋ

بۇل دا ءجيى كەزدەسەتىن سەبەپتەردىڭ ءبىرى. قىزدارعا امانداسۋدان ارى اسا المايتىن جىگىتتەر دە بار. اڭگىمەسىن ۇيلەستىرىپ اكەتە المايتىن، ءۇنسىز جىگىتتەرمەن قاتار كەزدەسۋدە كوپ سويلەپ، تەك ءوزى تۋرالى ايتىپ نەمەسە ورىنسىز قالجىڭدايتىن جاندار دا قىزدى وزىنەن الىستاتىپ الىپ جاتادى. 

نەكەنىڭ باياندى بولۋىنا كۇمانمەن قاراۋ

«ءبىز ءبىر-بىرىمىزدەن تەز جالىعامىز، قازىر ءبارى جاقسى كەيىن جامان ايەل بولىپ كەتسە قايتەمىن...» دەگەن سەكىلدى جامان ويلار ميىن جاۋلاپ العان جاندار دا كەزدەسەدى. ەگەر الدىن-الا وسىنداي ويلار مازالاسا، بۇل كەلەشەكتە شىندىققا اينالىپ قالۋدا عاجاپ ەمەس. 

وزىنە دەگەن سەنىمسىزدىك

كەيبىر جىگىتتەر وزىنە سەنىمسىز كەلەدى. وزگەلەردىڭ تارتىمدىلىعىنا، بايلىعىنا نەمەسە شەشەندىگىنە قاراپ، مەن مۇنداي ەمەسپىن عوي دەگەن وزىنە سەنىمسىزدىك قىزعا سويلەۋگە، ۇيلەنۋگە كەدەرگى كەلتىرۋى مۇمكىن. 

دايىنداعان: ە. بازاربايەۆا