جۇمىسقا كەشىككەن قىزمەتكەر باستىعىن سوتقا بەرىپ، ميلليونداعان وتەماقى الدى

الايدا جۇمىس بەرۋشى ماسەلە وسىمەن اياقتالدى دەپ ويلاعانىمەن، قىزمەتكەر سوتقا جۇگىنىپ، ناتيجەسىندە شامامەن 27 مىڭ دوللار وتەماقى الۋعا مۇمكىندىك الدى، دەپ حابارلايدى Malim.kz.

وقيعاداعى ەڭ تاڭعالارلىعى - ايەلدىڭ جۇمىسقا ءبىر-ەكى رەت ەمەس، 176 رەت كەشىككەنى.

ول 2012-جىلدىڭ جەلتوقسانىنان باستاپ كوز كلينيكاسىندا وپتومەتريست بولىپ جۇمىس ىستەگەن. قىزمەتكەردىڭ جۇمىس ۋاقىتى تاڭعى 9:00 دەن 13:30 عا دەيىن جانە تۇستەن كەيىن 15:30 دان 19:30 عا دەيىن بەلگىلەنگەن.

الايدا كومپانيانىڭ جۇمىس ۋاقىتىن تىركەۋ دەرەكتەرىنە سايكەس، قىزمەتكەر بىرنەشە جىل ىشىندە جۇمىسقا 176 رەت كەش كەلگەن. كەشىگۋلەردىڭ باسىم بولىگى بىرنەشە مينۋتتى عانا قۇراعانىمەن، جۇمىس بەرۋشى مۇنىڭ پاتسيەنتتەردى قابىلداۋعا اسەر ەتكەنىن العا تارتقان. سەبەبى كلينيكاداعى تەكسەرۋ پروتسەسىنىڭ العاشقى كەزەڭى ءدال وسى ماماننىڭ جۇمىسىنا بايلانىستى بولعان.

176 رەت كەشىكسە دە، سوت نەگە قىزمەتكەردى جاقتادى؟

2023-جىلى كومپانيا ايەلدى جۇمىستان شىعارۋ تۋرالى شەشىم قابىلدايدى. كەشىگۋدەن بولەك، وعان ۇجىمدىق جۇمىسقا جەتكىلىكتى ارالاسپاۋ جانە جۇمىس بارىسىنداعى مىنەز-قۇلقىنا قاتىستى دا ءبىرقاتار كىنا تاعىلعان.

ءبىراق ءىس سوتقا جەتكەندە كۇتپەگەن جاعداي انىقتالدى.

سۋديا جۇمىس بەرۋشىنىڭ قىزمەتكەردىڭ كەشىگۋلەرىن ۇزاق ۋاقىت بويى ءبىلىپ، وعان ءتيىستى تارتىپتىك شارا قولدانباعانىنا نازار اۋداردى. ايەلگە بۇعان دەيىن كەشىككەنى ءۇشىن رەسمي ەسكەرتۋ دە، تارتىپتىك جازا دا بەرىلمەگەن. كومپانيا بىرنەشە جىل بويى مۇنداي ءتارتىپتى قابىلداپ كەلگەن سوڭ، بىردەن جۇمىستان شىعارۋ تىم قاتاڭ شارا دەپ باعالاندى.

ناتيجەسىندە سوت جۇمىستان شىعارۋدى نەگىزسىز دەپ تانىعان. قىزمەتكەرگە 24806 ەۋرو، ياعني شامامەن 27 مىڭ دوللار كولەمىندە وتەماقى تولەۋ قاراستىرىلدى.