جىلدار وتە ءۇمىت سونگەن. 12 جىل بۇرىن بالاسىنان كوز جازىپ قالعان ايەل بالاسىمەن قاۋىشتى

كوكشەتاۋلىق الەكساندرا مانتىسكايا 12 جىل بويى كوز جازىپ قالعان بالاسىن ىزدەۋمەن وتكىزگەن. ونىڭ ۇلى بۇل ۋاقىتتا ۋريۋپينسك بالالار ۇيىندە بولعان، - دەپ حابارلايدى Liter.kz.

الەكساندرا مانتىسكايا وسىدان 12 جىل بۇرىن كوكشەتاۋدا جۇمىس تابا الماي، بەس جاسار بالاسىمەن رەسەيگە جۇمىس ىستەۋگە كەتكەن. كەلگەن سوڭ قۇجاتتارىن جوعالتىپ العانىن بايقاعان.

«سودان پوليتسيا مەنى الىپ كەتتى. بالانى دا الىپ كەتتى، سەبەبى قۇجاتتارىم بولعان جوق، ولار مەن بالانى ۇرلاپ كەتتى دەپ قورىقتى. ۇلىمدى قايتا قازاقستانعا قايتاردى. قۇجاتتارىمدى جوعالتىپ الدىم دەپ ارىز جازدىم، «قازاقستاندا جاساتۋىڭ كەرەك» دەپ ۋاقىت سوزدى. مەنى دەپورتاتسيالاۋدى ءوتىندىم، ءبىراق قانداي دا ءبىر سەبەپتەرمەن ولار مۇنى دا ىستەمەدى. سودان بەيرەسمي تۇردە تازالىقشى بولىپ جۇمىسقا ورنالاستىم. مەن ساپارعا اقشا جينادىم، ءبىراق ولار ەلدەن شىعارماي قويدى. وسى ۋاقىت بويى مەن بالامنىڭ قايدا ەكەنىن جانە ەلدەن قالاي شىعارىمدى بىلمەدىم. باسقا امالىم بولمادى، باردىم، تىركەلىپ ءجۇردىم، كەيىن دەپورتاتسيالاندىم»، - دەيدى الەكساندرا.

ءبىراز ۋاقىت رەسەيدە جۇمىس ىستەگەن ايەل تەلەفون ساتىپ العان، كەيىن قازاقستاننان تۋىستارىن تاۋىپ العان. ءبىراق ول ەلگە كەلگەن سوڭ بالانى قايدان ىزدەيتىنىن بىلمەدى. قامقورشىلىق ورگاندارى ونى «انالار ءۇيىنىڭ» ۇيلەستىرۋشىسىمەن بايلانىستىرعان، سول كەزدە ول بالانىڭ ۋريۋپينسك بالالار ۇيىندە ەكەنىن ءبىلدى.

ۇزاق جىلداردى بالالار ۇيىندە وتكىزگەن اناتولي - كوپ سويلەمەيتىن ادام. بالا اناسىنان كوز جازىپ قالعان كۇنى دالاعا سەرۋەندەۋگە شىققان، كەيىن بىرەۋلەر ونى ىزدەپ كەلىپ، اناسىنان الىپ كەتكەن. ونىڭ ايتۋىنشا، بالالار ءۇيىنىڭ ءىشى جىلى، تاماق بەرەدى دەيدى. ءبىراق وسى ۋاقىت بويى ول ارا-تۇرا اناسى تۋرالى ويلاعانىن ايتتى. جىلدار وتە ونى «قايتا كورەمىن» دەگەن ءۇمىت سونگەن.

بۇگىندە اناتولي 17 جاستا، ول 10-سىنىپتا وقيدى، اۆتوسلەسار بولۋدى جوسپارلاپ وتىر.